Ingabo za FARDC zagabye ibitero kuri M23 zinatwika iminara ya Vodacom
Imirwano yongeye kubura hagati y’umutwe wa M23 n’Ingabo za Repubulika Iharanira Demukarasi ya Congo - FARDC, ikaba iri kubera muri Kivu y’Amajyaruguru.

Iminara y’itumanaho ngo nayo yakongotse i Kibumba kubera ibisasu yakomeje kumishwaho n’ingabo za leta, nk’uko byakomeje kugaragara ku mbuga nkoranyambaga nyuma ya saa sita zo kuri uyu wa 22 Kanama 2013.

Ku rubuga rwa Twitter rwa Bertrand Bisimwa, umuvugizi w’inyeshyamba za M23, hagaragaye amakuru agira ati "Kajugujugu z’igisirikare cya Congo zikomeje kurasa iminara ya vodacom muri Kibumba. Ubu nonaha iminara iri kugurumana."

Amakuru dukesha urubuga Chimpreport aravuga ko ingabo za FARDC zatangiye gutera abarwanyi ba M23 guhera mu ijoro ryo kuri uyu wa 21 Kanama 2013, ibi bikaba byabaye intandaro y’ubwoba mu Burasirazuba bwa Congo ko hakongera kuba isibaniro ry’imirwano.

Amakuru arakomeza kuvuga ko ingabo za FARDC zateye iza M23 ahitwa Kanyarucinya na Mwaro ku km 7 uvuye i Goma.

Chimpreport ivuga ko imbunda ziremereye zakomeje kumvikana muri ibyo bice. Ingabo za Joseph Kabila ngo zari zifite ibikoresho bihagije ndetse n’ibikoresho bizifasha kureba neza mu mirwano.