Mu kiganiro n’abanyamakuru, umuvugizi wa Leta ya Congo Lambert Mende, yatangaje ko abarwanyi ba FDLR basigaye muri Congo bari hagati ya 800 na 900. Ibi yabivuze ubwo yashimangiraga ko igihugu cye kidafasha uyu mutwe.
Nk’uko tubikesha Ibiro Ntaramakuru by’u Rwanda(RNA) , Lambert Mende yatangaje ko kuva mu mwaka wa 2002, abarwanyi ba FDLR basigaye bari mu nsi ya 10% y’uko banganaga mbere. Akavuga ko uyu mubare ari mutoya kuko FDLR mu 2002 yari ifite abarwanyi babarirwa hagati y’ibihumbi 8000, ubu hakaba hasigaye ababarizwa hagati ya 800 na 900.
FDLR, ishinjwa na Leta y’u Rwanda kugira uruhare muri Jenoside yakorewe abatutsi, ndetse ko ari yo mpamvu bakomeje kwanga gutaha, ahubwo bihisha mu mashyamba ya Congo muri iyi myaka 18 ishize.
U Rwanda rwatangiye gukurikirana uyu mutwe mu mwaka w’1996 kuko zahungabanyaga umutekano warwo. Hanabayeho n’ibikorwa byinshi by’ingabo zishyize hamwe zihiga uyu mutwe mu mashyamba ya Congo, no muri operasiyo Umoja Wetu na Amani Leo, ahoCongo n’u Rwanda byafatanije bihangana n’uyu mutwe.
Ubu imibare ikomoka muri Banki y’Isi, ikigega gishinzwe gutera inkunga abavuye ku rugerero, igaragaza ko abagera ku 10.000 by’abarwanyi ba FDLR, aribo bamaze gutaha. Muri abo barwanyi basubijwe mu buzima busanzwe, habonekamo n’abasirikare bakuru nka Gen Maj Paul Rwarakabije usigaye ari Komiseri mukuru w’amagereza na Brig Gen. Jerome Ngendahimana ukuriye umutwe w’Inkeragutabara (Reserve Force).
N’ubwo bitoroshye kumenya imibare y’abasigaye mu mashyamba, hari imibare imwe n’imwe ivuga ko hari ibihumbi bigera kuri 3000.
Kugeza ubu Umutwe wa FDLR uyobowe na Mudacumura Sylvestre, ubu washyiriweho impapuro zimufata n’Urukiko Mpuzamahanga Mpanabyaha, kubw’ibirego ashinjwa byo kwibasira inyoko muntu mu Burasirazuba bwa Repubulika Iharanira Demokarasi ya Congo.
IKINYARWANDA
IKIRUNDI
ENGLISH
FRANÇAIS
Ahabanza
Abo Turibo
Serivisi
Twandikire
Ibirimo
