Mu rubanza rw’abashinjwa gushaka guhitana Kayumba, muramu we arashyirwa mu majwi

Mu rubanza rw’abashinjwa gushaka guhitana Kayumba, muramu we arashyirwa mu majwi


Yanditswe kuya 21-02-2012 - Saa 09:04'

Johannesburg : Ubwo urubanza rw’abashinjwa gushaka guhitana Kayumba Nyamwasa imbere y’iwe rwasubukurwaga kuri uyu wa Mbere, umwe mu bapolisi batanga ubuhamya ku ruhande rw’ubushinjacyaha yatangarije urukiko ko gutabwa muri yombi kw’ abaregwa muri Kamena 2010 kwakozwe n’Umunyarwanda Frank Ntwali kandi atari umwe mu bapolisi babishinzwe.

Nk’uko amakuru agera ku IGIHE.com abitangaza, Frank Ntwali (muramu wa Kayumba Nyamwasa) yavuzweho cyane kuri uyu wa Mbere, ubwo umupolisi (wiswe umutangabuhamya numero 3) yatangarizaga urukiko uko bane muri batandatu baregwa batawe muri yombi. Yabajijwe niba koko ariwe wabataye muri yombi atangira abyemeza, nyuma aza kwivuguruza avuga ko ari Frank Ntwali wabafataga akabashyikiriza polisi y’Afurika y’Epfo.

Abajijwe uwo Frank Ntwali ari we, uwo mutangabuhamya yavuze ko atamuzi, gusa ngo niwe wazanaga abaregwa, akabashyikiriza polisi, ndetse ngo niwe wasemuriraga bamwe muri bo batashoboraga kuvuga icyongereza. Uwo mupolisi yabajijwe uko yemeye gufata abantu azaniwe n’umuntu utari umupolisi, asubiza ko yabonaga Ntwali agendana n’abapolisi bo mu mutwe ushinzwe kurwanya udutsiko tw’abagizi ba nabi (Organized Crime Unit), bityo atekereza ko nawe ari umupolisi.

Uri iburyo ni Frank Ntwali, muramu wa Kayumba Nyamwasa

Izina Pascal Kanyandekwe ryavuzwe na Frank Ntwali

Nk’uko byagenze mu rubanza rw’abashinjwaga gushaka guhitana Kayumba Nyamwasa mu bitaro rwasojwe, Umunyarwanda Pascal Kanyandekwe nawe ni umwe mu baregwa muri uru rubanza rw’abashinjwa gushaka guhitana Kayumba ku ikubitiro. Ubwo umutangabuhamya yabazwaga uwavuze ngo bafate Kanyandekwe, yasubije ko Ntwali yasemuriraga bamwe mu bashinjwa ariwe waje kuvuga iryo zina, ngo abapolisi bararyandika bakeka ko ryavuzwe n’abo basemurirwaga.

Ati “Bavugaga ururimi ntumva, Ntwali asemura. Niwe rero waje kuvuga iryo zina…”

N’abaregwa baracyivuguruza

Uretse abatangabuhamya, bamwe mu baregwa nabo bagiye batanga ubuhamya mu minsi yabanje, nyuma bakabuvuguruza imbere y’urukiko, aho byagaragaraga ko babutanze bashyizweho igitutu cyangwa bahawe ruswa. Amakuru atugeraho avuga ko bamwe banagize ibibazo by’ubuzima kubera iyicarubozo bakorewe ngo bakunde bemere ibyo bashinjwaga bataragera mu rukiko cyangwa batange ubuhamya butari bwo kuri bagenzi babo baregwa.

Urubanza rurakomeza kuri uyu wa Kabiri, aho urukiko rukomeza kumva abatangabuhamya. Gusa nk’uko IGIHE.com yari yabibatangarije mu nkuru zahise, Frank Ntwali ari mu bazakorwaho n’uru rubanza, ndetse byitezwe ko ashobora kubazwa n’urukiko ku ruhare rwe, kandi ngo ntibizaruhanya kuko nawe akunda kwitabira urubanza nk’umuturage usanzwe.

TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!

IBITEKEREZO