U Rwanda ntirwigeze ruhindura aho rwari ruhagaze ku kibazo cya Libiya- Mushikiwabo

U Rwanda ntirwigeze ruhindura aho rwari ruhagaze ku kibazo cya Libiya- Mushikiwabo


Yanditswe kuya 31-01-2012 - Saa 10:51'

Ubwo hasozwaga inama y’abakuru b’ibihugu na za Guverinoma by’umuryango w’Afurika Yunze Ubumwe i Addis Abeba muri Ethiopia, Ministiri w’Ububanyi n’Amahanga n’Ubutwererane Louise Mushikiwabo yavuze ko u Rwanda rutigeze ruhindura aho rwari ruhagaze ku kibazo cya Libiya.

Minisitiri Mushikiwabo wavuze mu izina rya Perezida Kagame yagaragaje ko u Rwanda rwashyigikiye abaturage ba Libiya mu rugamba rwo kwibohora ingoma ya Kadhafi, kandi n’ubu ruracyemera ko byari bikwiye.

Yagize ati: “U Rwanda rwari ruri ku ruhande rw’abaturage ba Libiya mu rugamba rwabo rwo gukuraho umugabo umwe (Kadhafi) dusanga yari atakiri uwo kwizerwa kubera ibibi yakoreraga abaturage be. Aho niho u Rwanda rwari ruhagaze icyo gihe kandi na n’ubu niho rugihagaze”.

Mushikiwabo yemeza ko Kadhafi yakoreshaga umutungo w’igihugu cya Libiya ku nyungu ze bwite, kandi ngo ntiyubahaga n’abayobozi bagenzi be.

Yongeyeho ati: “Intumwa z’u Rwanda muri iyi nama twemeza ko abenshi turi hano tuzi neza uburyo ki Kadhafi yadufataga, sinatinya no kuvuga ko nta cyubahiro yahaga abenshi muri twe duteraniye aha”.

Mu bihugu by’Afurika hagaragaye kutavuga rumwe ku kibazo cya Libiya, cyane cyane ku birebana n’ukuntu amahanga yaje gufasha abarwanyaga ubutegetsi bwa Kadhafi avuga ko aje kurengera abaturage.

Bimwe mu bihugu byavugaga ko amahanga atagomba kuza mu kibazo cya Libiya ahubwo kigomba gushakirwa umuti n’ibihugu by’Afurika binyuze mu biganiro. Ibyo bihugu byasangaga amahanga aje kwivanga mu bibazo by’Afurika.

Iki kibazo cy’amahanga yivanga mu bibazo by’Afurika Minisitiri Mushikiwabo yemeza ko n’u Rwanda rwahuye nacyo, ariko yanenze ko kivugwaho iyo ibihugu bimwe na bimwe byahuye nacyo, ku bindi ntikivugwe. Ariko na none ngo uko kwivanga kw’amahanga mu bibazo by’ibihugu by’Afurika hari igihe bitizwa umurindi n’ibibazo igihugu kifitiye.

Yagize: “Iyo uko kwivanga kw’amahanga kubayeho bigahurirana n’intege nke ziri mu gihugu mu birebana n’imiyoborere no gukora ibyo abaturage bifuza bitera ikibazo gikomeye”.

Minisitiri Mushikiwabo Louise ubwo yagezaga ijambo ku bari mu nama
Minisitiri Mushikiwabo Louise ubwo yagezaga ijambo ku bari mu nama

Mushikiwabo yasabye ko iki kibazo cy’amahanga yivanga mu bibazo by’Afurika kigomba kuganirwaho ku buryo bwimbitse; abayobozi b’Afurika bakagifatira ingamba ntikijye kigarukwaho buri gihe nta ngamba gifatirwa. Ibyo kandi ngo bigomba kujyana n’icyitwa ubutabera mpuzamahanga nacyo ibihugu by’Afurika bikunze kunenga cyane.

TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!

IBITEKEREZO