Abaturage bo mu mirenge ya Shyara na Musenyi yo mukarere ka Bugesera, bavuga ko babangamiwe bikomeye no kubura inzira yumutse, bigatuma abaturage bayoboka iy’igishanga cy’Umurago aho bakoresha amato ngo babashe guhahirana, abadashoboye bakaba bahura n’ibyago byo kurigita muri icyo gishanga.

Iki gishanga cy’Umurago kirimo amazi menshi aturuka mu Ruzi rw’akanyaru ndetse n’ikiyaga cya Cyohoha.

Aba baturage bavuga ko bakwihutishirizwa kubakirwa umuhanda uhuza iyo mirenge, bityo bakabasha kwiteza imbere no guteza ibikorwa byabo imbere.

Ubusanzwe kugira ngo iyi mirenge ihahirane bagenda amasaha atari make nk’uko umwe muri bo waganiriye na IGIHE abivuga.

Ngo kugira ngo bagere i Shyara bava Musenyi bibasaba kugenda amasaha arenze arindwi aho bazenguruka mu kagari ka Gicaca ko mu murenge wa Mareba, bagakomeza na Ruhuha bakabona kugera i Shyara .

Mbere ngo aba baturage bakoreshaga amatiyo manini y’amazi ya Electrogaz yari muri iki gishanga bakambuka, ariko Kuri ubu ayo matiyo ntayagihari ku buryo byatumye bakoresha ubwato bw’ibiti budafite ubwishingizi mu gukora ingendo zo mu mazi.

Kwambuka igishanga, hambuka uwifite gusa ku mufuka, abandi bamwe bakarigita

Kwambuka mu bwato mu gishanga cy’Umurago, ni ukwishyura amafaranga 150, waba ufite umutwaro cyangwa igare nabyo bikishyurirwa ukwabyo.

Umwe mu baturage bahaturiye yatangarije ikinyamakuru Imvaho Nshya, ko bibakomereye bikabije kuko usanga bamwe ari nta n’amikoro bafite yababashisha kwishyura ikiguzi cyo kwambutswa.

Uyu muturage yagize ati: “kubera ko ntamikoro mfite, kwambuka simbibasha. Sinkirirwa njya no guhinga amasambu mfite ari muri Shyara mvuye aha i Musenyi.”

Nyirahatangimana Mariya wo muri Gicaca, we avuga ko kwigabiza kwambuka iki gishanga ari ukwishora kuko hari ubwo urigita, ngo nawe byamubayeho ahita ahacika yemera kureka kujya guhinga isambu ye iri hakurya (i Shyara).

Gukora umuhanda biri mu bikorwa

Umuyobozi w’akarere ka Bugesera, Rwagaju Louis, yatangarije IGIHE ko umuhanda watangiye gukorwa mu gihe cy’amezi umunani ukazaba wuzuye.

Yagize ati: “Twatanze isoko. Rwiyemezamirimo yamaze gusinya amasezerano yo kuzakora uyu muhanda. Uyu muhanda uzaba wuzuye mu gihe cy’amezi umunanini. Ubusanzwe bahanyuraga uko hameze ariko nk’akarere twatangiye kububakira umuhanda uzabagabanyiriza urugendo bakoraga n’ibyago bashoboraga guhuriramo narwo.”

Meya Rwagaju, avuga ko uyu muhanda uzafasha cyane abaturage b’ imirenge yombi bibafashe no kutazenguruka ku Ruhuha n’ahandi, noneho ibirometero bakoraga mu rugendo bigabanukeho 1/3 kubyo bakoraga.

Ati: “Aho kuzenguruka Nyagihanika na Mareba, n’ahandi ku bajyaga ku masoko ya Nyamata, Nyanza, Ruhuha na Kigali, ingendo zizoroha ku mpande zose.”

[email protected]