IGIHE.com > Amakuru > U Rwanda
Leon Mugesera mu rubanza rwe yikomye Uganda na Loni

Leon Mugesera mu rubanza rwe yikomye Uganda na Loni


Yanditswe kuya 28-01-2013 - Saa 11:57' na James Habimana

Kuri uyu wa mbere tariki ya 28 Mutarama 2013, Leon Mugesera yakomeje kwisobanura mu rubanza aregwamo n’ubushinjacyaha birimo kugira uruhare muri Jenoside yakorewe Abatutsi, ariko mu kwisobanura kwe yikomye igihugu cya Uganda ko ari cyo cyatumye Jenoside iba mu Rwanda, we abona adakwiriye kubibazwa.

Urubanza rwatangiye saa mbiri n’igice za mu gitondo, aho Mugesera yatangiye yisobanura avuga uko umutekano w’u Rwanda wari umeze mbere y’umwaka wa 1990. Avuga ko mu gihugu nta kibazo cyari gihari ko ibibazo byavutse nyuma y’itariki ya 1 Ukwakira.

Akomeza avuga ko we atabazwa kugira uruhare muri Jenoside yakorewe Abatutsi kuko ngo yagize amahirwe yo koherezwa mu butumwa muri Canada no muri Leta Zunze Ubumwe za Amerika aho yagenda ngo yagaragarazaga ko ashakira amahoro abanyarwanda.

Si igihugu cya Uganda Mugesera yikomye cyonyine, kuko yanavuze ko Umuryango w’Abibumbye na wo ukwiye kubazwa impamvu utatabaye Abanyarwanda igihe Jenoside yabaga. Asaba ko Boutros Boutros Ghali wari Umunyamabanga Mukuru w’Umuryango w’Ubumwe bwa Afurika na Khoffi Anan wari Umunyamabanga Mukuru w’Umuryango w’Abibumbye bagombye kuza mu butabera bw’u Rwanda gutanga ibisobanuro kuri Jenoside yakorewe Abatutsi.

Ikindi yagarutseho ku birebana n’uko umutekano wari wifashe mu Rwanda mbere ya 1990, avuga ko Ambasaderi Ndagijimana JMV ngo yari ahagarariye u Rwanda mu Bufaransa kandi ngo nyina wari utuye i Cyangugu yari Umututsi. Anavuga ko MRND nta ruhare yigeze igira mu kwica Abantu.

Nyuma yo gufata ikiruhuko, Ubushinjacyaha bwahawe umwanya bityo bugaragaza ukutishimira imyiregurire ya Mugesera buvuga ko isa n’itandukira umurongo w’imiburanishirize.

Mugesera we yavuze ko yahawe uburenganzira bwo kuvuga ku byo atumvikanyeho n’ubushinjacyaha, maze asaba ko bwakihangana bukubaha ubwo burenganzira bwe.

Urukiko rwavuze ko ibyo Mugesera arimo kugaragaza ari ibyo atumvikanyeho n’ubushinjacyaha mu kirego rwashyikirijwe, rwemeza ko agomba gukomeza kugaragaza zimwe mu mvugo zakoreshejwe n’ubushinjacyaha batumvikanaho.

Uru rubanza rurakomeza kuri uyu wa kabiri saa mbiri n’igice za mugitondo.

TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!

IBITEKEREZO