IGIHE.com > Amakuru > U Rwanda
Abarwanyi ba FDRL bateye u Rwanda

Abarwanyi ba FDRL bateye u Rwanda


Yanditswe kuya 27-11-2012 - Saa 10:12' na Olivier Muhirwa

Guhera mu rukerera rwo kuri uyu wa kabiri tariki ya 27 Ugushyingo 2012, abarwanyi bo mu mutwe wa FDRL urwanya Leta y’u Rwanda bambutse umupaka bava muri Congo batera ibirindiro by’ingabo z’u Rwanda biri mu Murenge wa Cyanzarwe, mu Karere ka Rubavu ko mu Burengerazuba bw’u Rwanda.

Umwe mu banyamakuru bari yo yatangarije IGIHE ko bane mu barwanyi ba FDRL bahasize ubuzima, ariko ku ruhande rw’u Rwanda ntabwo turamenya uko byifashe. Ubwo twandikaga iyi nkuru imirwano yari igikomeje.

Ibirindiro byatewe ni ibiri i Muti mu murenge wa Cyanzarwe ndetse n’ibiri ahitwa i Kinogo mu murenge wa Bugeshi. Mu mirwano ikaze yabereye mu kibaya cya Cyanzarwe haguye abarwanyi ba FDLR batatu ndetse abaturage bavuye mu byabo kubera amasasu.

Mu Murenge wa Bugeshi ho haguye umurwanyi wa FDLR umwe. Muri iki gitondo, urusaku rw’amasasu rwagabanutse mu murenge wa Cyanzarwe ariko i Bugeshi aracyumvikana.

Tuganira n’Umuyobozi w’Akarere ka Rubavu Sheik Bahame Hassani, yahamije aya makuru ndetse avuga ko byatumye asubika urugendo yari agiyemo i Kigali. Nta makuru menshi yaduhaye kuko ubwo twavuganaga yari arimo kwerekeza aho ibi byabereye.

Bivugwa ko abarwanyi ba FDLR bahawe imbunda n’ibikoresho n’igisirikare cya Congo Kinshasa, mu rwego rwo guhashya umutwe wa M23 urwanya Leta ya Congo nk’uko byemezwa na raporo y’impuguke za Loni.

Amakuru mashya:

Amakuru mashya atugeraho mu masaha ya saa sita z’amanywa zo kuri uyu wa Kabiri atangazwa n’Umuyobozi w’Akarere ka Rubavu, ni uko umusore umwe w’imyaka 20 yaguye mu mirwano yashyamiranyije ingabo z’u Rwanda n’Abarwanyi ba FDRL. Aba barwanyi kandi ngo bari baturutse mu Kirunga cya Nyamuragira ho muri Congo.

Andi makuru ni uko kugeza ubu abaturage benshi bari bahunze imirwano bongeye gusubira mu ngo zabo, mu gihe ingabo n’abaturage bakomeje guhiga bukware abarwanyi baba basigaye bihishe.

Dore ahatewe ku ikarita:

Aho hari akaziga niho hatewe

Turakomeza kubibakurikiranira.

TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!

IBITEKEREZO