Amafoto n’ubuhamya bw’abiyunze n’ababiciye muri Jenoside yakorewe Abatutsi

Yanditswe na
Kuya 7 Mata 2014 saa 11:31
Yasuwe :
0 0

Mu kwezi gushize, gafotozi Pieter Hugo yatembereye mu majyepfo y’u Rwanda nyuma y’imyaka 20 miliyoni y’abantu bishwe muri Jenoside yakorewe Abatutsi, maze afata amafoto anaganira n’abantu biyunze mu buryo budasanzwe.
Ifoto imwe igaragaza umugore ufashe ku rutugu rw’umugabo wamwiciye se. Indi ikagaragaza umugore wifotoza n’uwamusenyeye ndetse se akagira uruhare mu iyicwa ry’umugabo we n’abana be.
Aba bemeye gufotorwa bagaragaza imbaraga zishyirwa mu bwiyunge bakorana n’umuryango utegamiye kuri (...)

Mu kwezi gushize, gafotozi Pieter Hugo yatembereye mu majyepfo y’u Rwanda nyuma y’imyaka 20 miliyoni y’abantu bishwe muri Jenoside yakorewe Abatutsi, maze afata amafoto anaganira n’abantu biyunze mu buryo budasanzwe.

Ifoto imwe igaragaza umugore ufashe ku rutugu rw’umugabo wamwiciye se. Indi ikagaragaza umugore wifotoza n’uwamusenyeye ndetse se akagira uruhare mu iyicwa ry’umugabo we n’abana be.

Aba bemeye gufotorwa bagaragaza imbaraga zishyirwa mu bwiyunge bakorana n’umuryango utegamiye kuri leta AMI (Association Modeste et Innocent) uhuza abagize uruhare muri Jenoside hamwe n’abiciwe.

François Sinzikiramuka wagize uruhare muri jenoside (ibumoso) na Christophe Karorero warokotse

Sinzikiramuka, wagize uruhare muri Jenoside: “Namusabye imbabazi kuko umuvandimwe we yishwe ndeba. Yambajije impamvu nemeye icyaha maze musubiza ko nabikoze nk’uwarebereye sinabasha gutabara. Ryari itegeko ry’abayobozi. Namubwiye abamwishe nabo bamusaba imbabazi.”

Karorero, warokotse: “Rimwe na rimwe ubutabera ntibutanga igisubizo kinyura umuntu — imanza zimwe zigaragaramo ruswa. Ariko iyo hajemo gutanga imbabazi ku bushake, uzitanze aranyurwa akaruhuka bikarangira. Iyo wuje uburakari, ushobora guta umutwe. Nyamara ubwo natangaga imbabazi numvise nduhutse.”

Jean Pierre Karenzi wagize uruhare muri jenoside na Viviane Nyiramana warokotse

Karenzi: “Sinari ntuje kandi iyo namubonaga isoni zaranyicaga. Nyuma yo guhugurwa ku bijyanye n’ubumwe n’ubwiyunge nagiye iwe musaba imbabazi. Hanyuma mukora mu ntoki kandi kugeza ubu tubanye neza.”

Nyiramana: “Yishe data na basaza banjye babiri. Yakoranye ubu bwicanyi hamwe n’abandi bantu, ariko yaje wenyine ansaba imbabazi. Hamwe n’abandi bagize uruhare muri jenoside bari muri gereza, banyubakiye inzu baranayisakara. Naramutinyaga ariko naramubabariye ibintu bisubira mu buryo kandi meze neza muri jye.”

Godefroid Mudaheranwa wagize uruhare muri jenoside na Evasta Mukanyandwi warokotse

Mudaheranwa: “Natwitse inzu ye. Naramuteye ngo mwice hamwe n’abana be ariko Imana yarabakijije barahunga. Ubwo narekurwaga mu buroko numva iyo mubona nari guhita nirukanka. AMI yadufashije mu mahugurwa nza guhitamo kumusaba imbabazi. Kugirana umubano mwiza n’umuntu wakoreye amahano — turashima Imana.”

Mukanyandwi: “Naramwanga. Ubwo yazaga iwanjye agapfukama imbere yanjye akansaba imbabazi, kuba yari akomeje byankozeho bituma nzimuha. Ubu iyo ntabaje arantabara kandi iyo mpuye n’ikibazo ndamuhamagara.”

Juvenal Nzabamwita wagize uruhare muri jenoside na Cansilde Kampundu warokotse

Nzabamwita: “Nangije bikomeye umutungo we ndanasahura. Namaze imyaka icyenda n’igice mu buroko. Ubwo natahaga numvise ko ari ngombwa gusaba imbabazi uwo nakoreye amahano. Namwijeje ko nzamuhora hafi mu buryo bwose nshoboye. Data umbyara yagize uruhare mu kwica abana be, bityo numvise ari ngombwa kumusaba imbabazi mbikuye ku mutima.”

Kampundu: “Umugabo wanjye yari yihishe abantu baramuhiga baramwica kuwa Kabiri. Bwaracyeye baragaruka bica abahungu banjye babiri. Natekerezaga ko abakobwa banjye barusimbutse ariko babakuye aho umugabo wanjye yavukaga barabica babajugunya mu musarani. Natanze imbabazi kubera ko ntashoboraga kugarura abo nakundaga. Sinashoboraga kubaho nigunze, ntekereza igihe naba ndwaye uwandwaza cyangwa ndi mu byago uwo natabaza, bityo mpitamo gutanga imbabazi.”

Deogratias Habyarimana wagize uruhare muri jenoside na Cesarie Mukabutera warokotse

Habyarimana: “Ubwo nari nkiri mu buroko, Perezida Kagame yavuze ko abazasaba imbabazi bakemera ibyaha bazarekurwa. Nari mu ba mbere babikurikije. Njyeze hanze nasanze ari ngombwa gusaba imbabazi abo niciye. Umubyeyi Mukabutera Caesarea ntiyibwiraga ko nari mu bagize uruhare mu kwica abana be, ariko namubwiye uko byagenze. Ubwo yampaga imbabazi ibyatumaga andeba nabi byose byarashize.”

Mukabutera: “Benshi muri twe twahuye n’amadayimoni y’intambara inshuro nyinshi bigatuma nibaza impamvu naremwe. Umutima warankomangaga ukambwira uti ‘ntibikwiye kwihorera’. Byamfashe igihe ariko nza kumva ko twese turi Abanyarwanda. Jenoside yatewe n’ubuyobozi bubi bwatumye abaturanyi n’abavandimwe bashwana. Uwo wababariye aba umuturanyi mwiza mufatanya gutegura inzagihe nziza.”

François Ntambara wagize uruhare muri jenoside na Epiphanie Mukamusoni warokotse

Ntambara: “Muri Jenoside yakorewe Abatutsi mu 1994 nagize uruhare mu kwica umwana w’uyu mugore. Ubu turi mu itsinda rimwe riharanira ubumwe n’ubwiyunge. Nta rwikekwe ruri hagati yacu haba nijoro cyangwa ku manywa. Narotaga nabi kubera ibyo nakoze ariko ubu ndyama neza. Iyo turi kumwe tuba turi nk’abavandimwe.”

Mukamusoni: “Yishe umwana wanjye nyuma aza kunsaba imbabazi. Nahise muha imbabazi kuko yakoreshejwe ahubwo ari amadayimoni. Nayuzwe n’uburyo yatanze ubuhamya bw’uko yakoze icyaha kuko iyo ubihishe bikomeza kugukurikirana. Ntaramubabarira ntishaboraga kunyegera ariko ubu mufata nk’umwana wanjye.”

Dominique Ndahimana wagize uruhare muri jenoside na Cansilde Munganyinka warokotse

Ndahimana: “Ubwo natekerezaga gusaba imbabazi. Nari naratakaje ubumuntu kubera ibyo nakoze ariko ubu ndi umuntu nk’abandi.”

Munganyinka: “Nyuma yo kwirukanwa mu gace nari ntuyemo , Dominique n’abandi basahura, nasigaye ntagira aho nikinga. Amaze kunsaba imbabazi navuze ko ntacyo mfite cyo gutunga abana banjye mubaza nti ‘uzamfasha kurera abana banjye?” Icyumweru gikurikiyeho Dominique yaje hamwe n’abarokotse n’abahoze ari imfungwa bakoze jnoside. Barengaga 50 maze batwubakira inzu. Kuva ubwo numva merewe neza kandi mfote amahoro mu mutima.”

Laurent Nsabimana wagize uruhare muri jenoside na Beatrice Mukarwambari warokotse

Nsabimana: “Nagize uruhare mu gusenya inzu ye kuko twari tuzi ko nyirayo yapfuye. Twatekerezaga ko inzu zasigaye nta ba nyirazo ari ngombwa kuzisenya ngo tubone inkwi. Imbabaze ze zanyeretse ko ari umuntu ufite umutima.”

Mukarwambari: “Iyo umuntu aje akugana nta rwango afite, nubwo hari amakuba yabaye, uramwakira ukamuha icyo agushakaho. Gutanga imbabazi binga n’impuhwe.”

Inkuru ya The New York Times yashyizwe mu Kinyarwanda na Elisée Mpirwa


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza