Amashyaka ya baringa yabaho ate mu Rwanda?- Prof Shyaka

Yanditswe na Philbert Girinema
Kuya 14 Ugushyingo 2016 saa 08:58
Yasuwe :
0 0

Umuyobozi w’Ikigo cy’Igihugu gishinzwe Imiyoborere (RGB), Prof Shyaka Anastase, asanga amashyaka yose afite agaciro kayo, kandi katayabuza kwitabira amatora ya Perezida wa Repubulika ateganyijwe muri kanama 2017.

Uyu muyobozi anyomoza imvugo ikunze kuvugwa ko mu Rwanda hagaragara amashyaka, bamwe bita mato babona asa n’abereyeho guherekeza andi mu bikorwa bya politiki mu Rwanda.

Abibwira gutyo ngo baribeshya. Ati “Oya, amashyaka ya baringa se yabaho ate mu Rwanda? Ukurikije imitwe ya politiki iri mu Rwanda ugiye kubabaza ngo hari uwa baringa uri mu Rwanda, waba ubahemukiye. Amashyaka wayita baringa ute?”

Gusa ntahakana ko amashyaka atanganya imbaraga, kuko ngo Abanyarwanda bafite uburenganzira bwo kugira amashyaka manini n’amato.

Ku bijyanye n’umusanzu wa buri shyaka, ngo nibyo byerekana ko nta rya baringa ririho. Ati “Niba umtwe wa Politiki uhagarariwe mu Nteko Ishinga Amategeko urawugira baringa ushingiye kuki? Niba ugaragara mu bitekerezo nubwo waba utari mu Nteko Ishinga Amategeko ariko ukaba utanga ibitekerezo wawugira baringa kubera iki?”

Umunyamabanga Nshingwabikorwa w’ihuriro ry’imitwe ya politiki yemewe mu Rwanda (NFPO), Burasanzwe Oswald yavuze ko imitwe ya politiki (amashyaka) ikorera mu Rwanda ikorera mu bwisanzure.

Ati “ Buri mutwe wa politiki ufite ubwisanzure mu mikorere yawo, niyo mpamvu usanga mu gihe cy’ihigana nk’iri rigiye kuza mu minsi iri imbere ifite uburenganzira bwo gutanga umukandida, igashyiraho umurongo wa politiki wawo ndetse buri mutwe ukagira intego zawo, ubwisanzure bwabo ndetse na manifesto yawo.”

Prof Shyaka yavuze ko imitwe ya politiki yemewe mu Rwanda ari iyanditswe na RGB ku buryo buzwi, ntawushobora kwiyita umutwe utaranditswe n’icyo kigo.

Ati “Nta mitwe ya politiki itemewe mu Rwanda ibaho. Ikibaho hashobora kubaho amatsinda, ariko ikintu mu Rwanda twita umutwe wa politiki , uba wemewe, uba ari umutwe wa politiki wemewe, niba utemewe ntushobora kuba umutwe wa politiki, ubwo se wavuga ko ari uwo mu kihe gihugu? Kandi nta no kuvuga ngo hari uwo bangiye, ntawuraza, ntawurangeraho, ntawe ndabona yandika avuga ngo turifuza kuba umutwe wa politiki muri iki gihugu, ntabwo turabibona kandi uzaza akuzuza ibyo amategeko ateganya tuzamwakira.”

Mu matora aheruka imitwe ine yatanze abakandida muri 11 akorera mu Rwanda.

Umuyobozi w’Ikigo cy’Igihugu gishinzwe Imiyoborere (RGB), Prof Shyaka Anastase

Urifuza kuduha amakuru? Hamagara iyi nimero 4546
Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza