Minisitiri w’ingabo mu Rwanda Gen. James Kabarebe yatorewe kuyobora Inama y’Abaministiri b’Ingabo n’umutekano mu bihugu 10 bizatanga abasirikare mu mutwe w’ubutabazi ibihuza (EASF) asimbura Raychelle Awuor Omamo Minisitiri w’ingabo muri Kenya.
Gen Kabarebe yatorewe mu nama y‘Abaministiri b’ingabo n’umutekano mu bihugu 10(u Burundi, Comoros, Djibouti, Ethiopia, Kenya, Rwanda, Seychelles, Somalia, Sudan na Uganda), yari iteraniye mu Rwanda, ikemeza ishyirwaho rya EASF.
Umugaba mukuru w’Ingabo z’u Rwanda, Gen Patrick Nyamvumba, nawe yahawe kuyobora Komite y’Abagaba bakuru b’ingabo muri ibyo bihugu bizatanga ingabo za EASF.
Minisitiri Gen. James Kabarebe yashimangiye ko ubufatanye bw’ibihugu buzatuma imitwe ya Al Shabab, FDLR, RNC n’abandi bizatsindwa.
Mu karere ka Afurika y’Uburasirazuba n’ahandi muri Afurika, ngo henshi hari ibibazo byihutirwa by’umutekano muke, ku buryo gushyiraho uwo mutwe bitagomba gutegereza mu mpera z’umwaka wa 2015 nk’uko Afurika Yunze Ubumwe (AU) ibiteganya, ahubwo muri Afurika y’Uburasirazuba ngo bazashyiraho EASF mu mpera za 2014, nk’uko byemejwe n’Umuyobozi wa komite itegura izo ngabo (EASFCOM), Amb. Chanfi Issimail.
Ministiri w’Ingabo w’u Rwanda, Gen James Kabarebe yijeje ko ubufatanye bw’ibihugu buzatuma imitwe ya Al Shabab, FDLR, RNC n’abandi, ngo bazatsindwa.
Ministiri w’Ingabo w’u Rwanda, Gen James Kabarebe yagize ati“Turaza gufata iya mbere dufashe ibihugu bifite umutekano muke bitewe n’imitwe y’iterabwoba nka Al Shabab iteza umutekano muke muri Uganda, muri Kenya na Somalia.”
Umuvugizi w’Ingabo z’u Rwanda, Brig Gen Joseph Nzabamwita, yabwiye Abanyamakuru ko uyu mutwe uzazana ibisubizo by’umutekano mu karere.
Yagize ati“Mboneyeho kuvuga ko FDLR n’abo bafatanya na RNC, abo mwumva mu bihugu by’i Burayi batekereza guhungabanya umutekano w’Abanyarwanda; izi ni zimwe mu ngamba zafatiwe hamwe nk’ibihugu byose kugira ngo dukome mu nkokora abo bahungabanya umutekano w’ibihugu; abo twababwira ko akabo gashobotse.”
Abaminisitiri b’ingabo n’Abagaba bakuru b’ingabo z’ibihugu bya Afurika y’Uburasirazuba ngo zisanzwe n’ubundi zifite ubushobozi bwo kwitabara no gutabara ibindi bihugu, badategereje ingabo z’Umuryango w’Abibumbye; kuko ngo ari zo zirimo kugarukana amahoro mu bihugu byo muri Afurika n’ahandi.
EASF iterwa inkunga n’ibihugu by’inshuti birimo iby’u Burayi nka Denmark, byijeje gutanga inkunga mu bya tekiniki na bimwe mu bikoresho, nk’uko bitangazwa na Col Soren Knudsen ukorera Ambasade y’icyo gihugu cya Denmark muri Kenya.
Ibihugu bya Afurika bizajya byohereza ingabo zabyo za EASF aho rukomeye, ni u Burundi, Comoros, Djibouti, Ethiopia, Kenya, Rwanda, Seychelles, Somalia, Sudan na Uganda.
Umugabane wa Afurika ugizwe n’uturere dutanu (Amajyaruguru, Uburengerazuba, Amajyepfo, Uburasirazuba n’agace ka Afurika yo hagati); aho buri karere karimo gutegura ingabo zo kujya zitabara aho rukomeye kugera mu mpera z’umwaka wa 2015.
Iyi nama yari yatangiye kuwa Gatatu w’iki cyumweru, umunsi wa mbere wibanze ku kureba uko uyu mutwe, EASF, watangira. Iyi nama yashojwe byemejwe ko mu mpera z’uyu mwaka uyu mutwe ugomba gutangira.
TANGA IGITEKEREZO