HDI yerekanye icyuho mu myigishirize y’amasomo ku myororokere

Yanditswe na Emma-Marie Umurerwa
Kuya 7 Ukuboza 2017 saa 07:54
Yasuwe :
0 0

Umuryango Nyarwanda wita ku buzima HDI, ugaragaza ko kuba hari abagifata ubuzima bw’imyororokere nka kirazira bitiza umurindi ingaruka ziva mu gukora imibonano mpuzabitsina mu rubyiruko.

Iyi ngingo yagarutsweho mu nama y’iminsi ibiri iteraniye i Kigali yahurije hamwe imiryango itandukanye itegamiye kuri leta n’abandi bafatanyabikorwa mu bijyanye n’ubuzima bahuriye hamwe ngo baganire ku cyakorwa kugira abantu bose basobanukirwe n’ibijyanye n’ubuzima bw’imyororokere.

Umuyobozi Mukuru wa HDI, Dr Kagaba Aflodis, yavuze ko u Rwanda rwakoze byinshi bigamije gufasha Abanyarwanda gusobanukirwa ubuzima bw’imyororokere ariko ko hakiri imbogamizi ishingiye ku muco.

Yagize ati “U Rwanda rwateye intambwe ariko ikibazo kiracyari uko hakiri akazi kenshi ko gukora kugira ngo urubyiruko rugire ubumenyi buhagije n’ubushobozi bwo kwifatira icyemezo ku bijyanye n’ubuzima bw’imyororokere, kuko iyo batabimenye usanga aribyo bibyara za nda zitifuzwa, Sida n’ibindi.”

Yavuze ko imbogamizi zigishingiye ahanini ku muco aho abantu bakigira ipfunwe ryo kuvuga ibijyanye n’imibonano mpuzabitsina ku mugaragaro, bagatinya kubibwira abana babo bigatuma bafata ibyemezo bibi.

Rita Benitha Nakobedetse waturutse mu Burundi, yavuze ko iwabo bafite ikibazo cy’uko ababyeyi badatinyuka kubwira abana babo ibijyanye n’imyororokere bigatuma hari n’abakura batazi uburyo bwo kwiyitaho.

Yagize ati “Ababyeyi bakwiye kumenya ko igitsina ari igice cy’umubiri nk’uko umuntu avuga amaboko cyangwa amatwi, kuko uko kutabivuga ni ko gutuma abana bajya mu mico mibi kuko baba batabizi.”

Hakomeje kugenda havugwa inda zitateguwe ku bakobwa bakiri bato n’indahekana ku bashakanye, HDI n’Umuryango utegamiye kuri Leta washinzwe mu 2005, itangaza ko ahanini usanga ibyo byose biterwa no kudasobanukirwa n’ibijyanye n’ubuzima bw’imyororokere.

Umuyobozi Mukuru wa HDI, Dr Kagaba Aflodis, yavuze ko hakiri imbogamizi ishingiye ku muco mu gusobanura ubuzima bw’imyororokere
Iyi nama yitabiriwe n'abantu b'ingeri zose
Dr Kagaba Aflodis yavuze ko hakiri abagira ipfunwe ryo kuvugira mu ruhame ibijyanye n'imibonano mpuzabitsina
Rita Benitha Nakobedetse yavuze ko iwabo mu Burundi bafite ikibazo cy’uko ababyeyi badatinyuka kubwira abana babo ibijyanye n’imyororokere
Abitabiriye inama bafata ifoto y'urwibutso

Amafoto: Muhizi Serge


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza