Kwamamaza

Kaberuka na Lopes mu ntiti ziri gufasha Perezida Kagame kuvugurura Komisiyo ya AU

Yanditswe kuya 29-09-2016 saa 11:52' na Cyprien Niyomwungeri


Perezida Kagame yasabye abantu bane kumufasha gutegura impinduka muri Komisiyo y’Umuryango wa Afurika Yunze Ubumwe, AU, nk’uko yabisabwe mu nama yawo iheruka kubera i Kigali.

Inama ya 27 y’Umuryango wa Afurika Yunze Ubumwe, AU, yabereye mu Rwanda kuva kuwa 10 kugera ku ya 18 Nyakanga 2016, yahaye Perezida Kagame inshingano zo gutegura impinduka muri Komisiyo y’Umuryango wa Afurika Yunze Ubumwe, AU, ibizagerwaho bikazashyikirizwa inama y’abakuru b’ibihugu.

Umunya-Guinée-Bissau, Dr.Carlos Lopes w’imyaka 56 wari Umunyamabanga Mukuru Wungirije w’Umuryango w’Abibumbye akaba n’Umunyamabanga Nshingwabikorwa wa Komisiyo y’Ubukungu ya Afurika yatangaje ko ari umwe mu bo Perezida Kagame yasabye ko bamufasha gukora amavugurura muri Komisiyo ya AU n’izindi nzego zayo.

Mu kiganiro cyihariye na Monde Afrique, Lopes, yatangaje ko yamaze kwegura ku mirimo ye muri Loni yari amazeho imyaka ine, akaba mu mezi make azaba ari i Kigali afatanya na Perezida Kagame n’abandi bantu batatu yasabye kumufasha mu mavugurura ya AU.

Yagize ati “Ngiye kuba i Cap muri Afurika y’Epfo ariko mu mezi ari imbere nzamara igihe kinini i Kigali. Perezida Kagame n’abamuri hafi bahawe inshingano zo gukora amavugurura y’Umuryango wa Afurika yansabye kuba umwe mu itsinda rito rizakorana na we.”

Yakomeje agira ati “Turi bane na Donald Kaberuka wahoze ayobora Banki Nyafurika Itsura Amajyambere, Acha Leke wanditse raporo yamamaye izwi nka ‘Lions on the move’, na rwiyemezamirimo akaba n’umugiraneza w’Umunya-Zimbabwe, Strive Masiyiwa. Nzakomeza kuba umujyanama w’abakuru b’ibihugu bitandukanye.”

Kuvugurura imikorere ya Komisiyo ya AU n’izindi nzego, byagaragajwe mu nama yo muri Mutarama 2016, kugira ngo imikorere yayo ijyane n’ibiteganywa mu cyerekezo 2063 Afurika yihaye.

Amavugurura azakorwa mu miyoborere n’imikorere ya AU, azasobanura neza inshingano n’imikorere z’umuryango, ku buryo hagendewe kuri gahunda zihari n’abakozi bawo bashobora kwiyongera.

Hazavugururwa kandi amabwiriza agenga abakozi ba Komisiyo ya AU, uburyo bwo gupima uko inzego zigera ku byo ziyemeje, igenzura ry’imbere no hanze y’uru rwego [audit], kunoza gahunda y’uburyo abayobozi bakora ingendo, uburyo bwo gutanga amasoko n’andi mabwiriza ngenderwaho, hagamijwe ko ubushobozi buhari bukoreshwa neza.

Akimara guhabwa izo nshingano, Perezida Kagame yavuze ko yiteguye akazi yahawe kuko nk’umuyobozi adashobora guhunga inshingano.

Ati “Inshingano ni ukugerageza gushakira hamwe uburyo bwo gukora hagamijwe kugera ku musaruro mu bikorwa byacu, uburyo bwiza bwo kubigeraho kandi bitaduhenze, kugira ngo tutagira igihe kinini duta cyangwa se mu bijyanye n’ubushobozi.”

Yakomeje agira ati “Ni akazi gakomeye twahawe kandi turi abakozi b’uyu mugabane ntabwo twahunga inshingano zacu, tuzabikora kandi mu buryo bushoboka hashingiwe ku bushobozi dufite no gukorana n’abandi mbere na mbere.”

Dr.Carlos Lopes

Icyo wamenya ku bazafasha Perezida Kagame kuvugurura AU

Kuva muri 1988 kugeza ubu, Dr. Carlos Lopes yakoze imirimo itandukanye mu Muryango w’Abibumbye irimo Umunyamabanga Nshingwabikorwa wa Komisiyo y’Ubukungu ya Afurika, umwanya yariho muri Nzeri 2012. Yabaye Umuyobozi w’ikigo cy’Umuryango w’Abibumbye gishinzwe amahugurwa n’ubushakashatsi (UNITAR) kiri i Geneva mu Busuwisi.

Dr Donald Kaberuka afite impamyabumenyi y’ikirenga mu bijyanye n’ubukungu (PhD in Economics). Kuva mu mwaka wa 1987 yakoze mu bijyanye n’amabanki ndetse n’ubucuruzi mpuzamahanga mu gihe kigera ku myaka 10. Mu bigo bikomeye yakozemo icyo gihe harimo Umuryango Nyafurika Ushinzwe iby’Amakawa (OAIC) aho yari umuyobozi ushinzwe ubukungu.

Dr Donald Kaberuka

Mu 1997, Dr Donald Kaberuka yagizwe Ministiri w’Imari n’Igenamigambi w’u Rwanda, avamo atorewe kuyobora Banki Nyafurika Itsura Amajyambere, AfDB, asoza manda ze umwaka ushize.

Umunya-Cameroon, Acha Leke, ni umwe mu bagize ikigo gikora ubusesenguzi mu ngeri zitandukanye, McKinsey muri Afurika. Yamenyekanye kuri raporo yiswe ’Lions on the Move’ yo mu 2010.

Muri iyi raporo yagaragaje uko ishoramari muri Afurika ryazamutse rikava kuri miliyari 15 z’amadolari muri 2000 rikagera kuri miliyari 87 z’amadolari muri 2007, agaragaza uko abatuye imijyi ya Afurika babumbatiye isoko ry’ejo hazaza n’ibindi.

Leke yashinze ihuriro ryitwa ‘African Leadership Network’ rigamije gutoza abayobozi b’ejo hazaza.

Strive Masiyiwa, we ni rwiyemezamirimo akaba n’umugiraneza w’Umunya-Zimbabwe. Yashinze ndetse anayobora ibigo by’itumanaho byitwa Econet Wireless.

Yahawe ibihembo byinshi ku rwego mpuzamahanga mu bijyanye no gukora neza ubucuruzi no kugira neza, afatwa nk’umwe mu Banyafurika bafite umutima wa kimuntu.

Mu myaka 20 ishize, Masiyiwa yafashije abanyafurika ibihumbi 100 kwiga binyuze mu muryango yashinze n’abo mu muryango we. Yafashije imfubyi zirenga ibihumbi 40 kwiga, ndetse hari abo yafashije kwiga muri Kaminuza zo muri Amerika, u Bwongereza n’u Bushinwa.

Masiyiwa yateye inkunga imishinga myinshi ijyanye n’ubuzima n’ubuhinzi muri Afurika.

Umunya-Cameroon, Acha Leke

Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Wednesday 7 Ukuboza 2016
Copyright © 2009 -2014 - IGIHE Ltd - All Rights Reserved