Komisiyo y’Uburenganzira bwa Muntu yahaswe ibibazo n’abadepite bayigaya kutuzuza inshingano

Yanditswe na Richard Dan Iraguha
Kuya 26 Ukwakira 2015 saa 09:46
Yasuwe :
0 0

Kuri uyu wa 26 Ukwakira, ubwo Komisiyo y’Igihugu y’Uburenganzira bwa Muntu, NCHR yamurikiraga Inteko Ishinga Amategeko imitwe yombi incamake ya raporo y’ibikorwa byayo 2014-2015, bamwe mu badepite bagaragaje ko iyi komisiyo idakoresha neza ubushobozi bwayo mu gukemura ibibazo by’abaturage.

NCHR ivuga ko akenshi ibyo bibazo biba bifite inzego bigomba gukemukiramo kubera ko batazisimbura, ahubwo ngo icyo bakora ni ukugaragaza ibibazo bihari bagasaba abagomba kubikemura kubikurikirana.

Depite Mporanyi yavuze ko agendeye kuri raporo bashyikirijwe, hari ibirego byinshi by’abaturage barenganye iyi komisiyo yakira ariko ntigire icyo ibikoraho kandi ibifitiye ubushobozi.

Ati:” Mufite ibibazo byinshi by’abaturage mutakemuye mukavuga ngo mwasabye akarere ko kazabikemura. Njye mbona ari nk’uko umuntu yaba arwaye akajya kwa muganga, muganga wari ukwiye kumuvura akamubwira ko afite indwara ariko akamugira inama yo kwizivuza aho kumuvura. Icyo gihe ntacyo aba akumariye.[….]”

Depite Nikuze na Depite Ruku Rwabyom bagaragaje ko mu Rwanda cyane cyane mu mujyi wa Kigali hari abana bavuye mu mashuri bajya ku mihanda, komisiyo ikaba ntacyo ibikoraho mu rwego rwo gukemura iki kibazo.

Perezida wa Komisiyo y’Igihugu y’Uburenganzira bwa Muntu, Nirere Madeleine

Depite Nyirarukundo yagaragaje ko mu bigo ngororamuca hari igihe usangamo abantu bakuru bakoze ibyaha, bari bakwiye kuba babihanirwa bakajyanwa muri gereza.

Yagize ati:” Aba bantu bakuru bagakwiye kuba bari ahandi hajya abantu bakoze ibyaha bibangamira amategeko. Kuki babafata nk’abana bajyanwa mu bigo ngororamuco kandi barafatiwe mu byaha bibangamira amategeko y’igihugu. Kuki batabafunga?[…]”

Akomeza avuga ko ibi bigo bishyirwaho n’iteka rya Minisitiri w’Intebe, rikaba rireba abana bato batujuje imyaka y’ubukure bakoze ibyaha.

Perezida wa Komisiyo y’Igihugu y’Uburenganzira bwa Muntu, Nirere Madeleine yavuze ko bitewe n’uburyo inzego z’igihugu zubakitse, hari inzego zishinzwe gushyiraho amategeko ndetse n’izishinzwe kuyashyira mu bikorwa haka n’ubutabera. Icyo Komisiyo ikora ikurikirana imiyoborere myiza, ikagaragaza ibibazo bibangamira uburenganzira bwa muntu bakanagaragaza icyakorwa.

Ati:” Urugero iyo hari urubanza gitifu w’akagari cyangwa w’umurenge atarangije, ntago ari komisiyo izarurangiza, icyo komisiyo ikora ni ugukomeza gukurikira ku buryo ikibazo gikemuka. […]”

Yanavuze ko ikibazo cy’abana bata ishuri bakizi ahani kikaba giterwa n’ubukene, ukutumvikana kw’ababyeyi babo ndetse no kubura amafunguro yo ku manywa ku bana biga mu burezi bw’ibanze bw’imyaka icyenda.

Iyi raporo yashyikirijwe Inteko Ishinga Amategeko imitwe yombi, buri mutwe ku ukaba ugiye gutangira kuyigaho.

Komisiyo ifite ibirego birenga 250 by’Abaturage bahohotewe bitarakemuka harimo n’ibyo muri 2013.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza