Madamu Jeannette Kagame yitabiriye ibiganiro ku iterambere ry’umugore mu bucuruzi mpuzamahanga

Yanditswe na Cyprien Niyomwungeri
Kuya 20 Nzeri 2017 saa 11:58
Yasuwe :
0 0

Madamu Jeannette Kagame yitabiriye ibiganiro ku ‘guteza imbere umugore mu bucuruzi mpuzamahanga’, ashima ibikorwa by’urubuga ‘SheTrades’ rukomeje gufasha abagore kwitabira ubucuruzi mpuzamahanga.

Ibi biganiro bishamikiye ku nama y’inteko rusange ya Loni byabaye ejo ku wa 19 Nzeri binitabirwa na Gudlaugur Thór Thórdarson, Minisitiri w’ububanyi n’amahanga wa Iceland; Cherie Blair, Umugore wa Tony Blair wahoze ari Minisitiri w’Intebe w’u Bwongereza; Burhan Gafoor, Ambasaderi wa Singapore muri Loni; Monica Geingos, umugore w’Umukuru w’igihugu cya Namibia n’abandi.

SheTrades ni urubuga rw’ikigo mpuzamahanga cy’ubucuruzi ‘ITC’, rumaze umwaka umwe rutangiye, rufite intego y’uko abagore bagera kuri miliyoni bazarushyirwaho mu 2020 rukabahuza n’amasoko, rukabafasha kumenyekanisha ibicuruzwa byabo ku Isi yose, rukabahuza n’abaguzi n’abandi bacuruzi, rukabahugura kandi rukabereka amahirwe y’ishoramari ahari.

Madamu Jeannette Kagame yashimye ibikorwa by’uru rubuga by’umwihariko uruhare rumaze kugira mu iterambere ry’umunyarwandakazi binyuze mu gufasha abakora ubucuruzi kubwagura no kugera ku masoko cyane cyane ayo ku rwego mpuzamahanga.

Muri Werurwe uyu mwaka nibwo urubuga SheTrades rwatangijwe ku mugaragaro mu Rwanda. Icyo gihe, Madamu Jeannette Kagame yavuze ko uru rubuga rusanze hari byinshi Guverinoma y’u Rwanda ikomeje gukora kugira ngo umugore agire ubwigenge ku bukungu ; guha abagore urubuga mu byemezo na politiki bishyirwaho, kongera umubare w’abagerwaho na serivisi z’imari, gahunda nka Girinka, guha umwihariko ubucuruzi bwabo n’izindi.

Gusa yavuze ko muri rusange abagore bo ku Isi yose hari inzitizi bahura nazo zirimo politiki z’ibihugu, umuco, kugera kuri serivisi z’imari, icyuho mu bumenyi no kutagira amakuru, zikwiye gukurwaho kugira ngo ubucuruzi bw’abagore bugere ku ruhando mpuzamahanga.

Yagize ati “Hari byinshi bigomba gukorwa mu guteza imbere umugore mu rwego rw’imari, hakurwaho inzitizi zose kugira ngo bitabire cyane ibikorwa bigamije ubukungu, kandi bizibe icyuho mu buringanire ari nako biteza imbere ubukungu bw’igihugu.”

Yongeyeho ko ibi bizagerwaho hashyirwaho politiki zifungurira amarembo bose, zorohereza abacuruzi mu rwego rw’akarere na mpuzamahanga kandi abagore bakagera kuri serivisi z’imari mu buryo bworoshye.

Abahanga bavuga ko guteza imbere abagore mu bucuruzi bizatuma uburinganire muri uru rwego bugerwaho ndetse bikongera tiriyoni 28 z’amadolari ku musaruro mbumbe w’Isi mu 2025.

Madamu Jeannette Kagame kandi yanitabiriye inama y’ihuriro ry’abagore b’abakuru b’ibihugu bya Afurika rirwanya Sida, OAFLA, yigaga ku bufatanye mpuzamahanga mu kubyaza umusaruro amahirwe y’abaturage benshi Afurika ifite.

Madamu Jeannette Kagame ari kumwe n’Umuyobozi Mukuru wa ITC, Arancha Gonzalez (wa gatatu uturutse ibumoso) n’abashyigikiye SheTrades
Madamu Jeannette Kagame ubwo yari mu gikorwa cya SheTrades cyabereye muri Leta Zunze Ubumwe za Amerika ahari kubera Inteko Rusange y’Umuryango w’Abibumbye
Abantu b’ingeri zitandukanye bari bitabiriye ibi biganiro bigamije iterambere ry’umugore mu bucuruzi mpuzamahanga

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza