Mali yiyemeje kuganiriza Kambanda na Bagosora ku kubohereza mu Rwanda

Yanditswe na Prudence Kwizera
Kuya 10 Werurwe 2017 saa 05:35
Yasuwe :
0 0

Minisitiri w’Ubutabera n’Uburenganzira bwa Muntu wa Mali, Me Mamadou Ismaïla Konaté, yatangiye inzira yo kuba Abanyarwanda bafungiye muri icyo gihugu kubera ibyaha bya Jenoside yakorewe Abatutsi bakoherezwa mu Rwanda kuharangiriza ibihano.

Mali ni kimwe mu bihugu byasinyanye amasezerano n’Urukiko Mpuzamahanga (ICTR) i Mpanabyaha rwashyiriweho u Rwanda i Arusha, ajyanye no gufasha kurangiza ibihano abahamijwe ibyaha bya Jenoside yakorewe Abatutsi, no kubacumbikira igihe barangije ibihano.

Muri icyo gihugu hafungiwe abahamijwe ibyaha bya Jenoside yakorewe Abatutsi barimo Jean Kambanda wari Minisitiri w’Intebe wa Guverinoma yiyise iy’abatabazi wakatiwe igifungo cya burundu, Col. Theoneste Bagosora ufatwa nka ‘moteri’ ya Jenoside, Ngeze Hassan, n’abandi barimo Ferdinand Nahimana wayoboye RTLM uheruka kurekurwa.

Kubw’amasezerano Mali ifitanye na ICTR ko kuba ik yagirana amasezerano n’ibindi bihugu mu gucumbikira abo yakiriye, hagaragazwa ko n’u Rwanda rushobora kubohererezwa.

Minisitiri w’Ubutabera n’Uburenganzira bwa muntu muri Mali, Me Mamadou Ismaïla Konaté, wagiriye uruzinduko mu Rwanda rw’iminsi itanu yatangiye kugeza kuwa 9 Werurwe 2017, yasuye Gereza Mpuzamahanga ya Mpanga ashima urwego iriho, n’uburyo imfungwa zifatwa. Ahamya ko Abanyarwanda bari muri Mali azababwira ibyo yiboneye.

Yagize ati “Twakiriye imfungwa zigera kuri 20 z’abanyarwanda, kuri ubu 16 baracyari mu gereza, ningera mu gihugu cyanjye nzababwira ko mu Rwanda hari gereza nziza yubahiriza uburenganzira bwa muntu, mbabwire ko nta mpamvu yo kutaza mu Rwanda kuharangiriza ibihano.”

Umunyamabanga Uhoraho muri Minisiteri y’Ubutabera, Isabelle Kalihangabo, yavuze ko mu masezerano mpuzamahanga bishoboka ko ibihugu byohererezanya imfungwa, kandi u Rwanda rwifuza ko Abanyarwanda bataha.

Yagize ati “Biri mu bimugenza [Minisitiri Mamadou Konaté] tuzagira igihe gihagije cyo kubiganiraho no kureba ko bishoboka, ngira ngo yahasuye (Gereza mpuzamahanga ya Mpanga) yirebeye, icyo twifuza ni uko abo Banyarwanda bataha iwabo, ngira ngo afite amakuru meza yo kubashyira.”

Minisitiri Mamadou Konaté yasoje uruzinduko rwe uyu wa Kane, taliki ya 09 Werurwe 2017, nyuma yo kugirana ibiganiro na Minisitiri w’Ubutabera w’u Rwanda, Johnston Busingye.

Minisitiri w’Ubutabera n’Uburenganzira bwa Muntu wa Mali, Me Mamadou Ismaïla Konaté
Minisitiri w’Ubutabera n’Uburenganzira bwa Muntu wa Mali, Me Mamadou Ismaïla yasuye Gereza ya Mpanga

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza