Minisitiri Mukeshimana yasabiye imbabazi mu ruhame ku ibura ry’amafunguro mu nama

Yanditswe na Philbert Girinema
Kuya 16 Kamena 2016 saa 06:28
Yasuwe :
0 0

Minisitiri w’Ubuhinzi n’Ubworozi, Geraldine Mukeshimana, yasabye imbabazi abitabiriye inama nyafurika ku bushakashatsi mu buhinzi, ku makosa yaba yarayigaragayemo ababwira ko ‘atari wo muco w’u Rwanda’.

Iyi nama ihuje abashakashatsi mu by’Ubuhinzi ku mugabane wa Afurika , yatangiye kuva tariki ya 13 kugera kuya 16 Kamena 2016.

Ni inama u Rwanda rwitezeho kungukiramo byinshi birufasha mu iterambere ry’ubuhinzi bugakorwa mu buryo bujyanye n’igihe.

Mu mugoroba witiriwe ‘Rwanda Day’ wo gusangiza abanyamahanga baturutse impande zitandukanye z’isi ibyiza by’u Rwanda; Minisitiri Mukeshimana yashimiye abitabiriye iyi nama ndetse asaba n’imbabazi aho bitagenze neza ashimangira ko bitari mu muco w’u Rwanda.

Ikibazo cyagaragaye muri iyi nama ni aho hari abantu bamwe babuze amafunguro bitewe n’ibyo Minisitiri Mukeshimana yise ‘imitegurire itaragenze neza’.

Imbere y’imbaga yiganjemo abanyamahanga yari yitabiriye umugoroba wo gusangira ‘Gala Dinner’; Minisitiri Mukeshimana yasabye imbabazi ku makosa yose yaba yaragaragaye.

Yabwiye abitabiriye ati “Ndakeka mwaguwe neza i Kigali kandi ndashaka gusaba imbabazi ku kintu icyari cyo cyose cyaba cyarabaye. Niba hari ikintu cyabaye aho mwari muri mu mudoka muri kujya hanze cyangwa ikindi; ntabwo ariko u Rwanda ruteye. Twita ku bashyitsi. Niba hari uwagiye hanze yagaruka ntabashe kubona ifunguro cyangwa icyayi, ibyo ntabwo ariko u Rwanda rumeze. U Rwanda ni igihugu gikunda abantu, cyita ku bantu.”

Minisitiri Geraldine Mukeshimana yemeje ko amakosa yabaye nta n'umwe yahungabanyije

Bamwe mu bitabiriye iyi nama bashimye uko bakiriwe mu Rwanda ndetse bagaragaza ko bateganya kugaruka kuko bagiye hari byinshi badasuye birimo ingagi n’indi misozi myiza itatse igihugu.

Umunyazambia waganiriye na IGIHE yagize ati “ Nabaga muri hotel nziza. Abakozi bayo bampaga icyo nasabaga cyose, nakunze u Rwanda uko ruteye kuko buri gitondo nabyukaga ndeba hirya no hino. Nakunze imisozi ndetse ndateganya kuzagaruka kureba ingagi.”

Ubwo yaganiraga n’abanyamakuru, Minisitiri Mukeshimana yatangaje ko usibye igisa n’agatotsi ko kubura amafunguro, ibindi byagenze neza; ashimangira ko nta n’umuntu wahungabanyijwe nako.

Ati “ Inama ingana gutya ntabwo ijya ibura ibibazo, habaye ibibazo bijyanye n’imitegurire bari abantu benshi. Nigeze kubona mu binyamakuru bandika ibijyanye no kuba ibiryo ari bike. Biriya ntabwo ari ikosa rya hotel. Ni ikosa ry’imitegurire murabizi mu Rwanda ntabwo tubuze ibiryo, ntabwo ari ukwakira abashyitsi tunaniwe, habayemo ikosa ry’imitegurire. Minisiteri twabifashe, twabyemeye, twanasabye imbabazi mu ruhame bivuze ko uko bigaragara ni agatotsi kajemo ariko ntabwo byabarakaje cyane. Igikuru ni uko tubifata neza nka minisiteri bikadufasha no gutegura inama ziri imbere.

Dr Charity Kruger, umuyobozi wa FARA, Umuryango wateguye iyi nama, yavuze ko abari bitabiriye abenshi bazagaruka kugira ngo batembere ‘iki gihugu cyiza’.

Yashimiye u Rwanda uko rwakiriye inama ndetse ko mu gihe kiri imbere ibindi bihugu nabyo bizakira abanyarwanda neza.

Iyi nama yahuje abantu bo ku mugabane wa Afurika bakora ubushashatsi mu buhinzi, u Rwanda ruzayungukiramo kuba rwabona amoko y’imyumbati yihanganira indwara, amoko y’ingano abashaka kuba yakwera ahandi hatari mu misozi miremire ikonje; n’ibindi biteza imbere ubuhinzi; igice gikorwa n’abanyarwanda benshi.

Minisitiri Mukeshimana ubwo yasabaga imbabazi imbere y'imbaga yari iteraniye muri Serena Hotel
Umuyobozi wa FARA, Dr Charity Kruger, yashimiye u Rwanda uko rwakiriye iyi nama
Dr Charity Kruger yahawe na Minisitiri Mukeshimana impano iriho igishushanyo cy'inka
Minisitiri w'Ubucuruzi n'Inganda, François Kanimba, aramutsa abitabiriye uyu mugoroba
Abanyamahanga benshi bishimiye imbyino za kinyarwanda
Minisitiri w’Ubuhinzi n’Ubworozi, Mukeshimana Geraldine, yasobanuriye Inteko Rusange ya Sena ingamba zafashwe mu kuvanaho inzitizi zibangamiye ishyirwa mu bikorwa rya gahunda yo guhunika igamije guhangana n’ibibazo by’ibura ry’ibiribwa

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza