00:00:00 IGIHE NETWORK KN KINYARWANDA EN ENGLISH FR FRANCAIS

Mu mezi 11 Muhizi na Eddy batangije Wanda Money Transfer, ntisiba kwaguka

Yanditswe na

Cyprien Niyomwungeri

Kuya 4 Gashyantare 2016 saa 08:18
Yasuwe :
0 0

Amezi abaye 11 Abanyarwanda Muhizi Marcellin na Eddy Kome batangije ikigo Wanda Money Transfer gitanga serivisi zo kohereza no kwakira amafaranga hagati y’u Rwanda n’u Bushinwa.

Wanda Money Transfer ifasha Abanyarwanda bakorera mu Bushinwa bashaka koherereza imiryango yabo amafaranga, abakora ubucuruzi n’abanyeshuri bakenera kohererezwa amafaranga n’ababyeyi babo cyangwa ababarera.

Icyo kigo cya ba rwiyemezamirimo b’Abanyarwanda cyemewe na Banki Nkuru y’Igihugu (BNR) n’Ikigo cy’Igihugu cy’Iterambere (RDB) muri Werurwe 2015, ngo gikemure imbogamizi zagaragaraga muri serivisi zo kohererezanya amafaranga hagati y’u Rwanda n’u Bushinwa.

Mu kiganiro IGIHE yagiranye na Muhizi Marcellin umwe mu bagishinze, yavuze ko bashinze icyo kigo bazirikana abakoreraga ingendo mu Bushinwa ariko bagahurirayo n’inzitizi zo kutabona amafaranga mu buryo bworoshye igihe bayakeneye, bitewe n’inzira yanyuragamo.

Yagize ati “Wabaga ugize ikibazo amafaranga akubanye make cyangwa hari ushaka kugutuma ikintu bikagorana cyane. Nkanjye nigeze gukenera amafaranga binsaba kwiyongeza icyumweru ngo nyabone.”

Muhizi avuga ko gutangiza icyo kigo hagati y’u Rwanda n’u Bushinwa batekerezaga ubucuruzi bw’u Rwanda muri iyi minsi bwerekeza mu Bushinwa, abanyeshuri bajya kwigayo, n’izindi nzitizi zari zihari bashakaga gukemura.

Yagize ati”Wajyaga kubona umucuruzi atwaye amafaranga mu masogisi yagera mu Bushinwa akabura uko amenyekanisha amafaranga ye, mbese ukabona ari inzitizi yari ibangamiye abantu.”

Ibyo byiyongeraho imbogamizi ishingiye ku mirongo ngengamikorere y’amabanki yo mu Bushinwa, aho iyo ugiye kubikuza amafaranga kuri izo banki uri umunyamahanga hari ingano uba utemerewe kurenza.

Muhizi Marcellin umwe mu batangije Wanda Money Transfer

Wanda Money Transfer yafunguye irindi shami

Kuva cyatangira, ikigo Wanda Money Transfer cyagiraga ishami rimwe gusa mu Rwanda riherereye i Nyabugogo mu mujyi wa Kigali n’irindi riri i Guangzhou mu Bushinwa.

Muhizi avuga ko abakiriya bishimiye serivisi bahabwa bakabasaba ko babegereza irindi shami mu mujyi rwagati. Iri shami rishya riherereye mu nyubako ndende izwi nka Kigali City Tower (KCT).

Yagize ati”Ubusanzwe twari dufite ishami Nyabugogo, dufunguye iri ngo duhe serivisi nziza abakiriya bacu kandi tunabegere kuko hari benshi bari hano mu mujyi rwagati. Ni ibitekerezo by’abakiriya bacu, ni ugukuraho imbogamizi y’uko twagiraga ishami rimwe.”

Akomeza avuga ko Wanda Money Transfer ikomeje gukura cyane kandi ifite icyerekezo cyo kwagura amashami mu Rwanda no mu mahanga, aho hatahiwe ku Gisenyi.

Ati”Turatekereza uko twaba ikigo kigera kuri buri Munyarwanda wese.”

Abayisunze barayivuga imyato

Abacuruzi, abanyeshuri n’abantu ku giti cyabo bakoresha Wanda Money Transfer, bavuga imyato serivisi nziza ihendutse kandi yihuta bahabwa.

Musoni Eugene ukorera ubucuruzi bw’ibijyanye n’abageni mu Rwanda n’Ubushinwa, yabwiye IGIHE ko yatangiranye na Wanda Money Transfer, kandi bimaze kumugeza ku nyungu nyinshi.

Yagize ati” Mbere y’uko itangira twoherezaga amafaranga tunyuze mu bindi bigo, bikadutinza kandi bikaduhenda. Nkatwe dukora ubucuruzi tuba twifuza ahantu hari inyungu kandi hatworohereza mu kazi kacu nko muri Wanda Money Transfer.”

Umwe mu banyeshuri biga mu Bushinwa mu mujyi wa Jinzhou, Thierry Ngomagitori, yongeyeho ko Wanda Money Transfer yabakijije gutonda imirongo mu mabanki yo mu Bushinwa, urugendo rwo mu mbeho, gutinda kw’amafaranga yoherejwe n’ibindi.

Yagize ati”Ubu twakira amafaranga aho turi hose mu buryo bwihuse nta guhangayika ngo banki ziradufungiraho, duhabwa serivisi nziza mu bwumvikane busesuye buranga abakozi ba Wanda Money Transfer. Mbese twaradabagiye.”

By’umwihariko abanyeshuri bashyiriweho serivisi yo kubashyirira amafaranga kuri konti zabo, igihe bayakenereye bakayafata.

Mu mezi 10 Wanda Money Transfer imaze kwakira abakiriya 1886. Kohereza amafaranga bisaba iminota itanu kandi ku giciro gito ugeraranyije n’abandi. Kohereza amadolarii 100 baguca amadolari 8, guhera ku bihumbi 3501- 5000 by’amadolari ni amadorali 80.

Wanda Money Transfer, icyitegererezo muri ba rwiyemezamirimo b’Abanyarwanda

Wanda Money Transfer ni kimwe mu bigo by’urubyiruko rw’Abanyarwanda rwatinyutse, rutekereza cyane ku gifitiye akamaro sosiyete Nyarwanda kandi gikenewe.

Muhizi avuga ko mu byabateye ishyaka rikomeye ryo gutekereza guhanga umurimo harimo na gahunda nziza ya Leta yo kwihangira imirimo no gushyigikira ababishaka bafite imishinga myiza. Ibyo ngo byababereye impamba ikomeye yatumye batinyuka.

Yagize ati”Ikintu gikomeye cyatumye dutinyuka ni ubworoherezwe Umunyarwanda afite mu gukora Business, iyo ushaka kuyikora buri rwego bireba ruragufasha, ni ikintu cyiza gikomeye cyane.”

Ku isonga Muhizi ashimira BNR ku bufasha butandukanye yabahaye kugeza batangiye imirimo yabo. Atanga inama ku rundi rubyiruko yo kudategereza ko umunyamahanga ariwe uzahanga umurimo, akaruha akazi.

Ikoranabuhanga ryo kohereza amafaranga ryagiye ryibasirwa n’abajura, kugeza ubu nta mbogamizi nk’iyo Wanda Money Transfer irahura na yo uretse impungenge z’abamaze kubona ibyo bakora bagatangira kubigana mu buryo bwa magendu.

Kome ari kumwe n'umukiriya wa Wanda Money Transfer
Kome na Marcellin batangije Wanda Money Transfer
Ibiro bya Wanda Money Transfer mu nyubako ya KCT

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .