Kwamamaza

Nta nzara iri mu Rwanda-Tony Nsanganira

Yanditswe kuya 28-06-2016 saa 12:14' na Ntakirutimana Deus


COMMENTS: 21

Hirya no hino mu Rwanda abaturage barimo gutaka ko bahuye n’inzara yatewe no kubura umusaruro; Umunyamabanga wa Leta ushinzwe ubuhinzi n’ubworozi, Tony Nsanganira avuga ko kuba icyo kibazo cyugarije bamwe, bitavuze ko igihugu cyose gifite inzara.

Intara y’Uburasirazuba ikunda guhura n’ikibazo cyo kubura imvura igihe kinini, izuba rikangiza ibihingwa bitandukanye nkuko byagaragaye mu mwaka wa 2015 kugeza muri 2016.

Hiyongeraho ko mu duce dutandukanye tw’u Rwanda, igiciro cy’ikiguzi cy’ibiribwa cyagiye kizamuka.

Imibare igenda igaragazwa ivuga ko abasaga ibihumbi 12 bamaze kugirwaho ingaruka n’iyi nzara.

Ibyo byatumye leta itabara abaturage bo mu turere twa Kayonza na Kirehe babuze ibiribwa.

Nubwo bimeze gutyo, ntawe ukwiye kuvuga ko u Rwanda rwahuye n’ikibazo cy’inzara kubera impamvu zerekanwa n’Umunyamabanga wa Leta muri Minisiteri y’Ubuhinzi n’Ubworozi(Minagri), Tony Nsanganira ubwo yaganiraga n’ikigo cy’igihugu cy’itangazamakuru(RBA).

Yagize ati “Umuntu yavuga ko ari ikibazo cy’ibiribwa bidahagije bitewe n’ibibazo byabaye [...]ariko ntabwo umuntu yavuga ko ari ikibazo kiri mu gihugu hose, hari ibice by’igihugu biba birimo cyangwa byarahunitse umusaruro wifashishwa mu kugera mu bindi bice by’igihugu biba byaragize icyo kibazo.”

Kuba nta nzara iri mu Rwanda, byemezwa n’abayobozi batandukanye b’u Rwanda. Minisitiri w’Intebe Murekezi Anastase yatangaje ko nta nzara iri mu Rwanda, ubwo yaganiraga n’abanyamakuru kuri twitter, tariki ya 5 Gashyantare 2016.

Ahavugwaga inzara icyo gihe ni mu mirenge ya Musheri, Matimba, Rwimiyaga na Rwempasha muri Nyagatare ku buryo hari n’abari batangiye gusuhuka.Ubwo yabazwaga icyo leta igiye gukora kuri iki kibazo, Minisitiri w’Intebe yavuze ko hatangiye gahunda zo gufasha uduce tw’igihugu twahuye n’amapfa

Muri Gashyantare 2016, Minisitiri w’ubuhinzi n’Ubworozi Mukeshimana Geraldine na we yahakanye ko mu Rwanda hari inzara.Yagize ati “Niba hari imirenge yagize amapfa ntibivuze ko igihugu gishonje.”

Kuhira imyaka, igisubizo gihanzwe amaso

Hirya no hino mu Rwanda, leta yagite itangiza uburyo bwo kuhira imyaka, rimwe inafatanyije n’abikorera mu mishinga minini, ariko n’abaturage bakaba barayobotse iyo nzira. Kuri ubu hamaze kuhirirwa imyaka iri ku buso bugera kuri hegitari izisaga 45 .

Minagri imaze gushora miliyari zisaga 100 z’amafaranga y’u Rwanda mu bikorwa byo kuhira imyaka mu rwego rwo guhangana n’imihindagurikire y’ibihe.

Mu mwaka w’ingengo y’imari 2016/2017, hazifashishwa miliyari miliyari 15 z’amafaranga y’u Rwanda mu bikorwa byo kuhira, azunganirwa n’ibindi nk’ibyo by’abikorera, mu rwego rwo kuzamura umusaruro w’ubihinzi wihariye kimwe cya gatatu cy’umusaruro mbumbe w’igihugu (GDP).


Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Sunday 8 Mutarama 2017
Copyright © 2009 -2014 - IGIHE Ltd - All Rights Reserved