Perezida Kagame na Macron bashyigikiye byeruye kandidatire ya Mushikiwabo ku buyobozi bwa OIF

Yanditswe na Karirima A. Ngarambe, Philbert Girinema
Kuya 23 Gicurasi 2018 saa 06:31
Yasuwe :
4 0

Perezida w’u Bufaransa, Emmanuel Macron, yashyigikiye mu buryo bweruye kandidatire ya Minisitiri w’Ububanyi n’Amahanga w’u Rwanda, Louise Mushikiwabo, ku mwanya w’ubunyamabanga bukuru bw’Umuryango Mpuzamahanga w’Ibihugu bikoresha ururimi rw’Igifaransa [OIF].

Mu kiganiro bagiranye n’abanyamakuru nyuma yo gushyikirana byamaze amasaha asaga atanu ku gicamunsi cy’uyu wa Gatatu tariki 23 Gicurasi 2018, abakuru b’igihugu Macron na Kagame bagaragaje ubushake budafunguye bwo kuganisha umubano w’ibihugu byombi mu bihe bishya bigiye kurangwa n’imikoranire ya bugufi ku ngingo zireba ibihugu byombi ndetse n’umugabane w’Afurika muri rusange.

Mu ngingo nyinshi bavuzeho, imwe mu z’ingenzi bagarutseho ni irebana na kandidatire ya Minisitiri Louise Mushikiwabo. Ubwo umunyamakuru yabazaga aba bakuru b’ibihugu bombi icyo batekereza ku kwiyamamaza kwa Mushikiwabo ku kuyobora OIF [Organisation Internationale de la Francophonie], Perezida Kagame usanzwe ari umukoresha w’uyu mu minisitiri, ku nshuro ya mbere mu buryo bweruye yagaragaje ko uku kwiyamamaza yakwishimira mu gihe byaba byashyigikiwe n’ibihugu bigize OIF.

Perezida Kagame yagize ati “U Rwanda rwari rusanzwe ari umunyamuryango wa Francophonie, ntabwo twigeze duhagarara. Ubwo twasabwaga gutanga umusanzu, bijyanye n’ibi bihe bishya, twishimiye kugira uruhare mu gutanga abayobozi nka Mushikiwabo mu gihe bishyigikiwe n’abanyamuryango.”

Perezida Macron weruye uburyo asanga umutima wa Francophonie kuri ubu uherereye muri Afurika, yavuze ko buri wese wifuza kugeza aheza uyu muryango kuri ubu atabigeraho atishingikirije urubyiruko rwo ku mugabane wa Afurika, ku buryo ku bwa Macron "Kandidatire ku buyobozi bwa Francophonie yaba iturutse muri kimwe mu bihugu bya Afurika, niyo yaba ifite ishingiro cyane".

Macron yongeyeho kandi ko "by’akarusho iyo kandidatire yaza ari iy’umugore kuko ariho byarushaho kugira ishingiro", ati "Ku bw’iyo mpamvu, nibaza ko Minisitiri w’Ububanyi n’Amahanga w’u Rwanda, Louise Mushikiwabo, afite ubushobozi bwose bukenewe ndetse n’ubunararibonye bwose busabwa kugira ngo akore iyi mirimo."

Yakomeje agira ati "Avuga [Mushikiwabo] adategwa ururimi rw’Igifaransa mu gihugu kiyoborwa na Perezida ukunze kuvuga mu Cyongereza, ariko kandi na kimwe cya kabiri muri iki gihugu kugeza magingo aya baracyakoresha ururimi rw’Igifaransa, bihabanye cyane n’ibyo benshi bakunze kuvuga hanze aha. Iki gihugu ni kimwe mu bigize Francophonie mu buryo busesuye." Perezida Macron yavuze adashidikanya ko "Kugira umukandida w’umugore w’umunyafurika ni ingenzi", ati "kubera izo mpamvu nzayishyigikira”.

Uru ruzinduko rwa Perezida Kagame i Paris rubaye nyuma y’iminsi mike hatangajwe amakuru y’uko Minisitiri w’Ububanyi n’Amahanga w’u Rwanda, Louise Mushikiwabo, ategerejweho gutanga kandidatire ku buyobozi bw’Umuryango Mpuzamahanga uhuriwemo n’ibihugu bivuga Igifaransa uko ari 84.

Amatora y’Umunyabanga Mukuru w’uyu muryango ategerejwe mu Nteko Rusange yawo ya 17 izabera i Yerevan muri Armenia kuva ku wa 11 na 12 Ukwakira 2018.

Byavugwaga ko u Bufaransa bushyigikiye kandidatire ya Mushikiwabo ariko nta muntu n’umwe wari wabitangaje ku mugaragaro.

OIF ni umuryango usanzwe uyoborwa n’umugore, Michaëlle Jean, w’imyaka 60 y’amavuko wavukiye muri Haiti gusa akaba afite ubwenegihugu bwa Canada.

Ni uwa gatatu uyoboye uyu muryango kuva washingwa. Babiri bamubanjirije bombi ni abagabo bakomoka muri Afurika aribo Boutros Boutros-Ghali wo mu Misiri na Abdou Diouf, Umunya- Sénégal wubashywe mu gihugu cye [Yanitiriwe inyubako iberamo inama zikomeye twagereranya na Convention Centre y’i Kigali].

Iyi OIF kandi ni umuryango ufite inkomoko mu myaka ya 1970 ariko iri zina warifashe mu 2005.

Ku wa 20 Werurwe 1970 nibwo hasinywe amasezerano ashyiraho ishami rirengera ubufatanye n’umuco mu bihugu 21, bigizwemo uruhare na Léopold Sédar Senghor wayoboraga Sénégal, Habib Bourguiba wa Tunisia, Hamani Diori wa Niger n’Igikomangoma Norodom Sihanouk cya Cambodia.

Magingo aya, uyu muryango ugizwe n’ibihugu 57 na za Guverinoma, bitatu bitari ibinyamuryango ku buryo bwuzuye na 20 by’indorerezi. U Rwanda ni kimwe mu bihugu byawinjiyemo utaritwa izina ufite uyu munsi mu 1970.

Igifaransa ni ururimi rwemewe n’amategeko mu bihugu 29 ku Isi, aho muri byo 22 ari ibyo ku mugabane wa Afurika. Ibindi bitari ibya Afurika bikoresha uru rurimi ni nk’u Bubiligi, Canada, u Bufaransa, Haiti, Luxembourg, u Busuwisi na Vanuatu. Gikoreshwa kandi no mu birwa nka Saint Lucia, Dominica na Monaco.

Mu myaka ine ishize, u Rwanda rwerekeje amaso ku bihugu byo mu Burengerazuba bwa Afurika byiganjemo ibikoresha Igifaransa muri politiki yarwo yo gushaka kwagura umubano no guharanira inyungu zabwo mu mfuruka zose z’Isi.

Kuba u Bufaransa bushyigikiye kandidatire ya Mushiwabo ku buyobozi bwa OIF ni ikimenyetso cy’ibyo aba bayobozi bombi batangaje by’uko biyemeje imikoranire mishya hagati y’ibihugu ireba ahazaza.

Perezida Kagame na Macron bagiranye ikiganiro n'itangazamakuru
Abanyamakuru batandukanye barimo abaturutse mu Rwanda bitabiriye ikiganiro na Perezida Kagame na Macron
Perezida Macron yeatangaje ko ashyigikiye kandidatire ya Minisitiri w’Ububanyi n’Amahanga w’u Rwanda, Louise Mushikiwabo ku buyobozi bwa OIF

Amafoto: Village Urugwiro


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza