Rubavu: Abagore basabwe kwiyima abagabo mu buriri niba batikebesheje

Yanditswe na
Kuya 14 Gashyantare 2014 saa 12:59
Yasuwe :
0 0

Mu gihe kingana n’ukwezi kumwe, abagore bo mu murenge wa Bugeshi mu karere ka Rubavu basabwe ko batangira gufungira amazi n’umuriro abagabo babo, bakabakumira mu gikorwa cyo gutera urubariro igihe bazaba bakomeje kwinangira banga kwikebesha.
Abagore bo muri uyu murenge babisabwe n’umuyobozi w’ibitaro bya Rubavu Dr. Kanyankore William aho yabasabye ko bakora uko bashoboye bagafatira imyanzuro ihamye abagabo babo bakomeje kugenda baseta ibirenge mu kwikebesha. Yababwiye ko gutera urubariro (...)

Mu gihe kingana n’ukwezi kumwe, abagore bo mu murenge wa Bugeshi mu karere ka Rubavu basabwe ko batangira gufungira amazi n’umuriro abagabo babo, bakabakumira mu gikorwa cyo gutera urubariro igihe bazaba bakomeje kwinangira banga kwikebesha.

Abagore bo muri uyu murenge babisabwe n’umuyobozi w’ibitaro bya Rubavu Dr. Kanyankore William aho yabasabye ko bakora uko bashoboye bagafatira imyanzuro ihamye abagabo babo bakomeje kugenda baseta ibirenge mu kwikebesha. Yababwiye ko gutera urubariro n’umugabo udakebwe ari kimwe mu bikurura indwara zandurira mu mibonano mpuzabitsina cyane cyane kanseri y’inkondo y’umura ku bagore.

Dr. Kanyankore yagize ati “Bimaze kugaragara ko abagore bo mu karere ka Rubavu bitabira gahunda zibafasha kugira ubuzima bwiza kurusha abagabo. Igikorwa cyo kwikebesha nacyo ntabwo gikorwa uko bikwiye. Niyo mpamvu nsaba abagore bose ko nyuma y’ukwezi umubago umugabo utarisiramuza mwajya mumuhakanira ntatere urubariro kugeza igihe agiye kwisiramuza. Ndasaba kandi abagore bose ko uzajya abona umugabo we akomeje kwinangira yazajya yegera n’umuyobozi w’umurenge akamutekerereza.”

Nubwo Dr. Kanyankore avuga ko bafungira amazi n’umuriro abagabo mu gutera urubariro igihe batarikebesha, ntabwo abagabo bo mu murenge wa Bugeshi babikozwa kuko bemeza ko imyaka bafite nta mugore urarwara iyi ndwara.

Harerimana Telesphole waganiriye na IGIHE yavuze ko nta hantu umugore we yahera amwima ibyo ashaka mu buriri.

Harerimana yagize ati “Iyo tugiye gutera akabariro n’umugore wanjye tubanza kuganira kandi ndamuzi ntabwo rwose ashobora kunyima.”

Abajijwe niba hari gahunda afite yo kwisiramuza, yasubije ati “Iyi gahunda ntayo mfite kuko imyaka 47 mfite ntabwo nigeze nisiramuza kandi natangiye gutera akabariro mfite imyaka 15 gusa.”

Abagabo bagera kuri 12 baganiriye na IGIHE bemeza ko abagore babo badashobora kwanga ko batera akabariro nubwo baba batarikebesha.

Habyarimana Emmanuel ati “Umugore wanjye we, ni nawe untera akabaraga ko gutera akabariro.”

Nubwo abagore basabwa kwiyima abagabo mu gihe batikebesheje, haribazwa niba bitazakurura amakimbirane mu ngo kuko nka Karera w’imyaka 37 yabwiye IGIHE ati: "Nta soni kubuza umugore wanjye kumpa? Ubwo se yahera he anyima n’igihe tumaranye? Ntibyashoboka rwose!"

Dr. Kanyankore William yavuze ko mu bushakashatsi bwashyizwe ahagaragara bugaragaza ko imibonano mpuzabitsina ikorwa hagati y’umugabo udasiramuye n’umugore bitera kanseri y’inkondo y’umura. Gahunda yo gusiramura abagabo imaze imyaka irenga itatu itangiye mu Rwanda.

Nubwo bamwe mu bagabo badateganya kwikebesha, ngo ntibatekereza ko abagore babo bazabima ibyo bashaka mu buriri
Abagore batekereza uburyo baziyima abagabo babo niba batikebesheje

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza