Mu rwego rwo gukomeza guha icyubahiro Abatutsi bazize Jenoside, mu murenge wa Rwaniro mu Karere ka Huye, hateganijwe ijoro ryo kwibuka no gushyingura mu cyubahiro imibiri 3,000 y’abazize Jenoside yakorewe Abatutsi. Icyo gikorwa kikazaba mu mpera z’icyi cyumweru.

Umurenge wa Rwaniro ahahoze ari muri Komini Rusatira, mu mateka yaho ni hamwe mu hifashishijwe indege mu kwica Abatutsi kubera amateka yaho. Abahahungiye mbere bose birwanagaho bishoboka ku buryo nta bitero by’interahamwe byashoboraga kuhisukira. Ariko haje gukoreshwa uburyo bukomeye batashoboraga guhangana na bwo.

Kayitare JMV ukuriye itsinda “Icyizere Survivors” ritegura igikorwa cyo kwibuka ku nshuro ya 19 Jenoside yakorewe Abatutsi kizabera i Rwaniro, yatangarije IGIHE ko ku itariki ya 18 hateganijwe umugoroba wo kwibuka na ho ku ya 19 Gicurasi 2013 hakaba umuhango wo gushyingura imibiri igera ku bihumbi bitatu. Indi mibiri y’Abatutsi bazize Jenoside bari batuye muri ako gace ishyinguye mu nzibutso ziri i Songa na Ruhashya. Yagize ati “Imibiri 3000 ni yo izashyingurwa mu rwibutso rushya rwuzuye mu murenge wa Rwaniro, Akagari ka Mwendo.”

Kayitare atangaza ko abarokotse Jenoside yakorewe Abatutsi bo mu murenge wa Rwaniro bashimira Leta y’u Rwanda yabafashije kubaka urwibutso ruha icyubahiro ababo bazize Jenoside yakorewe Abatutsi.

Kayitare asaba Abakomoka muri ako gace bose kuzitabira kwifatanya n’abandi mu mugoroba wo kwibuka ndetse no mu gikorwa cyo gushyingura mu cyubahiro imibiri y’abazize Jenoside yakorewe Abatutsi.