Kwamamaza

Umuryango w’Abayisilamu wikomye abajyana abayoboke b’iri dini mu mutambagiro mutagatifu

Yanditswe kuya 17-01-2016 saa 10:23' na Ntakirutimana Deus


Umuryango w’Abayisilamu mu Rwanda (RMC) urataka kuvangirwa n’amasosiyete ajyana abayoboke bawo mu mutambagiro Mutagatifu (Hijja) ubera i Mecca uvuga ko batabyemerewe.

Buri mwaka i Mecca mu gihugu cya Arabia Saoudite haba umutambagiro uhuza abayisilamu batandukanye baturutse hirya no hino ku Isi. Abo mu Rwanda nabo bitabira uwo mutambagiro, guhera mu myaka ibiri ishize bakaba barajyanyweyo na RMC na sosiyete yitwa FAHICO.

Umuyobozi w’Umuryango w’Abayisilamu mu Rwanda, Mufti Kayitare Ibrahim yavuze ko abayisilamu mu Rwanda bafite itegeko ribagenga rigena ko ibikorwa by’abayisilamu mu Rwanda bihuzwa na RMC nta wundi ubyemerewe.

Umuyobozi w’Umuryango w’Abayisilamu mu Rwanda, Mufti Kayitare Ibrahim

Ni muri urwo rwego abakora ibikorwa bitandukanye byo kujyana abayisilamu bo mu Rwanda mu mutambagiro mutagatifu nabo batabyemerewe uretse RMC, ku buryo n’ushaka gukora ibikorwa by’ubugiraneza agomba kugirana amasezerano na RMC.

Yagize ati “RMC izakomeza gukora ibyo bikorwa kuko nta wundi ufite izo nshingano mu Rwanda. Gukorana n’izindi sosiyete byose binyuranyije n’amategeko.”

Mufti Kayitare yagaragaje ko abakora ibyo bikorwa bashaka kuvangira umuryango w’Abayisilamu ukazahagarikirwa abantu wemerewe kujyana muri uwo mutambagiro bakaba bagenda mu gikundi cy’abo mu bindi bihugu nk’uko byahoze kera.

Ati “ Ntitwakemerera ushaka gusenya idini ry’Abayisilamu ashaka kurisenya no kuricamo ibice.”

Umuryango w’Abayisilamu urataka igihombo

Abayisilamu bo mu Rwanda bajyaga mu mutambagiro mutagatifu batwawe n’igihugu cya Uganda. Nyuma baje gusaba uburenganzira bwo kugenda bitwa ab’u Rwanda, batari aba Uganda. Baje kubyemererwa ku bwumvikane bwa leta y’u Rwanda na Arabia Saoudite . Icyo gihe bemerewe imyanya y’abantu 400 buri mwaka, ariko kubera ko abajyayo atari benshi basaba ko bajya bajyana abantu 120.

Arabia Saoudite yarabibemereye , ariko ngo iyo batabashije kujyana abantu 120 bemeye, RMC yishyurira abasigaye ngo umubare yasabye wuzure, ikabishyurira ama-hotel n’ibindi bisabwa.

Icyo gihombo ikaba aricyo iheraho isaba sosiyete ziyivangira kubyirinda ndetse n’abayisilamu bose mu Rwanda bashaka kujya muri urwo rugendo rutagatifu kujya bayegera.

Bamwe mu bakomeye muri RMC basabye abayisilamu kujya bayitabaza akabatwara kuko ifite ubushobozi. Sheikh Abdoul Kalim Harerimana asanga kugendera hamwe byongera ubumwe bw’Abayisilamu mu Rwanda.

Sheikh Murangwa Jamiru ushinzwe ibijyanye n’umutambagiro mutagatifu yemeza ko bafite ubushobozi bwo ku buryo ngo n’abagize ikibazo cy’ubushobozi bagabanyirizwa.

Sosiyete zakomojweho zagize icyo zibivugaho

FAHICO, ni imwe muri sosiyete zimaze kujyana abayisilamu bo mu Rwanda muri uwo mutambagiro inshuro ebyiri. Yemeza ko ifite uburenganzira bwo kujyana abayisilamu bo mu Rwanda mu mutambagiro mutagatifu.

Mu kiganiro Umuvugizi wa FAHICO, Namahoro Hassan yagiranye na IGIHE yavuze ko bafite uburenganzira busesuye bwo kujyana abajya muri uwo mutambagiro. Yasobanuye ko uba ufite intego ebyiri, imwe yo gusenga n’iy’ubukerarugendo.

Leta ya Arabia Saoudite itegura uwo mutambagiro ngo yemerera imiryango y’Abayisilamu mu bihugu kujyana abayisilamu muri uwo mutambagiro ndetse na sosiyete zikora ibikorwa by’ubukerarugendo.

Yagize ati “Twese turabyemerewe, kuko abo mu Rwanda bajyanwa na AMUR (RMC) natwe, nka sosiyete y’ubukerarugendo ifitanye imikoraniye n’ikigo cyo muri Amerika gikora ibyo bikorwa cya ASTA.”

Icyangombwa cy’iyo sosiyete yahawe n’ikigo cy’igihugu gishinzwe iterambere handitseho ko ikora ibikorwa by’ubukerarugendo no gutegura ibijyanye n’imihango y’idini.

Namahoro yavuze ko ibyo bikorwa usanga bifata igihe kinini cy’ubukerarugendo , aho mu minsi 30 bamara muri urwo rugendo, itandatu ariyo bakoresha mu gusenga, indi bakayimara mu bikorwa by’ubukerarugendo ari nabyo banakora.

Ikindi ni uko viza z’abitabira uwo mutambagiro bazihabwa na leta ya Arabia Saoudite ibemerera gukora ibyo bikorwa ku kigero cya 100%.

Mu mwaka wa 2015, RMC na FAHICO zajyanye muri uwo mutambagiro Abayisilamu basumbana imibare ku buryo bamwe bavuga ko byatewe n’uko bamwe bagabanyije igiciro.


Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Saturday 20 August 2016
Copyright © 2009 -2014 - IGIHE Ltd - All Rights Reserved