Bananiwe kumvikana none miliyoni 350 zigiye gushyirwa ku butaka

Mu mudugudu wa Rukurazo Akagari ka Kibagabaga, umurenge wa Kimironko mu karere ka Gasabo mu Mujyi wa Kigali, haravugwa inzu y’uwitwa Munyaneza Jean Bosco igomba gusenywa kuko yubatse ku butaka bugomba guhabwa Ntaganzwa Charles wabutsindiye kuko bwagurishijwe n’umuryango we atabizi.

Ku wa 19 Ugushyingo uyu mwaka ni bwo hari hateganyijwe isenywa ry’iyi nzu, icyakora yaba nyir’inzu n’ushaka ubutaka yubatseho ntibari bahari. Nyuma y’iminota 40 abayobozi bategereje ishyirwa mu bikorwa ry’iki cyemezo, bafashe icyemezo cyo kubisubika bikazashyirwa mu bikorwa igihe ba nyir’ubwite bazaza kubisaba.

Umunyamabanga Nshingwabikorwa w’Umurenge wa Kimironko Niragire Theophile, avuga ko ubuyobozi bwagerageje kunga impande zombi, ariko ngo ntibyakunda.

Amakuru dufite avuga ko nyir’ubutaka ari we wanze ikiguzi cyose yahawe, akavuga ko icyo ashaka ari ukubona ubutaka bwe. Twagerageje kumuvugisha kuri telefoni ariko ntibyadushobokera tukaba tukibigerageza ngo atubwire icyo abitekerezaho.

Uko ikibazo cyatangiye

Amakuru dukesha umwe mu bakunzi ba IGIHE watwandikiye atumenyesha iki kibazo ndetse n’ayo ubwacu twakurikiranye avuga ko mu mwaka wa 2003 umubyeyi yagurishije isambu, igurwa n’uwitwa Amoni ku mafaranga ibihumbi 800 y’u Rwanda, noneho uyu mugabo na we aza kuhagurisha n’undi.

Hashize igihe uyu wahaguze na Amoni na we yashatse kuhagurisha umugabo bita Munyaneza Jean Bosco, ariko uyu mugabo agira amakenga ko ibyangombwa byaba bituzuye maze babijyana kwa Noteri yemeza neza ko byuzuye.

Yarishyuwe uwahaguze akenera kuhabyaza umusaruro. Yasabye icyemezo cyo kubaka ku biro by’akarere ka Gasabo barakimuha kuko ’plan’ y’inzu yari yatanzwe yari yemewe ndetse yubaka mu buryo bwemewe n’amategeko nk’uko bisabwa n’amategeko y’u Rwanda.

Yarubatse inzu irarangira, ariko haza kugaragara umuhungu umwe mu ba wa mudamu wagurishije muri 2003 na Amoni utarasinye ku nyandiko z’ubugure.

Uyu muhungu Ntaganzwa Charles yatanze ikirego avuga ko Amoni yihereranye nyina akamugurira kandi we atarabishakaga, ariko nanone bashiki be na barumuna be bo bari barasinye baranabyemera.

Umusore yaraburanye atsinda Amoni, ubutabera buvuga ko agomba gusubizwa ubutaka bw’umuryango aburana, mu gihe nyamara hari uwubatsemo inzu kandi mu buryo bwemewe n’amategeko.

Kuri ubu barashaka ko uwashyizemo ibikorwa bye abivamo ubutaka bugasubirana nyirabwo nta ngurane bahaye nyir’inzu.

Iyo nzu ifite agaciro ka miliyoni zibarirwa muri 350 z’amafaranga y’u Rwanda.