Dore ikizakoreshwa amabuye y’agaciro mashya yavumbuye mu Rwanda

Ikigo cy’Igihugu Gishyinzwe Ubucukuzi bw’amabuye y’Agaciro kiratangaza ko hari amabuye y’agaciro ari kuboneka azatanga umusaruro, bimwe mubyo azakoreshwa harimo gukurwamo ibikoresho bitandukanye, azifashishwa mu bumenyi ndetse anakurure ba mukerarugendo. Muri ayo mabuye hari mo abonetse vuba hari n’akiri gukorerwa ubushakashatsi .

Amwe mabuye yabonetse yatangiye gucukurwa azabyazwa umusaruro ni aya granite ari imu mpande zitandukanye z’igihugu, aya Dolamite, na Marble,“Orgues de Basalte” n’ayandi.

Nyagatare hubatswe uruganda rwatangiye gutunganya aya Granite. Ramba Afrique uhagarariye Inama y’Ubuyobozi y’Uruganda rwa Nyagatare rukora makaro ava mu mabuye ya Granite, yavuze ko bafite amabuye azacukurwa akavamo amakaro mu gihe cy’imyaka irenga 100. Yavuze ko urwo rutare rucukurwa mo amabuye akorwamo amakaro ruzamara imyaka 75 rugicukurwa.

Yavuze ko hari urundi rutare rwa Gatore, i Runda ho mu Karere ka Kamonyi, i Huye n’i Mushubati ho mu Karere ka Muhanga naho hari ahazacukurwamo amabuye ya granite. Hose hazacukurwa mu gihe kitari munsi y’imyaka 50.

Ikigo cy’Igihugu cy’Ubucukuzi bw’Amabuye y’Agaciro kigaragaza urutonde rw’ahabonetse amabuye yo mu bwoko butandukanye. I Ngarama ho muri Gatsibo habonetse amabuye ya Granite Gneissique n’aya Migmatites, i Kigoma ho haboneka Granite hamwe na Amphibolite.

Iki cyegeranyo kigaragaza ko ku Mugonero habonetse Granite na Gneiss ,i Mbabara ho muri Karongi ho habonetse amabuye ya Marble yererana hamwe na Dolomite, i Nkuli ho mu Karere ka Nyabihu haboneka Guiness na Granite, n’ahandi haboneka ayandi atandukanye.

Ikigo cy’Igihugu Gishyinzwe Ubucukuzi cya (Gewologi na Mine) gitangaza ko hari n’ibumba ryiza mu butaka bw’u Rwanda ryavamo ibikoresho bitandukanye. Ibi byose bikazashyirwa mo ingufu bikabyazwa umusaruro uturuka ku bucukuzi bw’amabuye y’agaciro.

Iki kigo kivuga ko mu mwaka wa 2011 hashyizweho uruganda ruyungurura gasegereti rwa Karuruma. Muri uyu mwaka wa 2012 hatahwa uruganda rukora amakaro i Nyagatare, byose byerekana uburyo umusaruro uturuka ku bucukuzi ugenda wiyongera, kandi hakabaho akarusho kuri amwe muri yo nka granite ikorerwa i Nyagatare kuko ajya mu ruganda hatabayeho kuyavanga n’ibindi.

Abakuriye uru ruganda batangaje ko amabuye asaturwa mo ibipande ari umwimerere, akavamo amakaro meza akorehswa mu bwubatsi bw’amazu, mu bwogero n’aho bogereza, mu mbaraza zinyuramo ibisenge byinshi, akanakoreshwa mu gukora ibindi bikoresho birimo ameza, utubati n’ibindi.

Akarusho k’uyu mutungo kamere w’amabuye ya Granite yo mu Rwanda, ni uko akomeye kurusha ayakoreshaga avuye mu bihugu byo mu mahanga birimo u Bushinwa. Afite amabara menshi mu gihe ayo mu bihugu byo mu karere agaragara ari ibara rimwe ry’umweru.
Hanagaragaye amabuye yo mu bwoko bwa “Orgues de Basalte” ava munda y’Isi. Kanzira Hildeblande uyobora Ishami ry’Ubushakashatis ku mabuye y’agaciro mu Kigo k’Igihugu cy’Ubucukuzi bw’amabuye y’agaciro yabwiye IGIHE ko ayo mabuye yabonetse mu Karere ka Rusizi aboneka mu bice by’ibibaya byatewe n’impinduka zo mu nda y’isi” Rift Valley”.

Aya mabuye yabonetse muri Rusizi nayo ari mu gice cyagaragaye mo impinduka zatewe n’imyivumbagatanyo yomu nda y’Isi. Kanzira yavuze ko afite umwihariko ku bumenyi bwa siyansi hamwe n’ubukerarugendo kuko usanga abereye ijisho kubera uburyo ateye ku buryo yaba umusaruro w’ubukerarugendo.

Abaganiriye na IGIHE batandukanye bakurukiranira hafi umutungo kamere, by’umwihariko amabuye y’agaciro, bavuze ko aya mabuye afitiye igihugu akamaro mu bukerarugendo, mu ishoramari, mu bucuruzi n’ibindi no mu mibereho ya buri munsi ku bakora mu bigo bishyinzwe kuyacukura no kuyatunganya. Bavuze ko amabuye akomeje kuboneka azafasha mu kongera ubukungu no ku Banyarwanda.