IGIHE.com > Amakuru > U Rwanda
Serivisi ya ‘internet’ mu mahoteli iracyari ingorabahizi

Serivisi ya ‘internet’ mu mahoteli iracyari ingorabahizi


Yanditswe kuya 9-02-2013 - Saa 11:24' na Ange de la Victoire Dusabemungu

Kuri uyu wa gatanu tariki ya munani Gashyantare 2013, Minisiteri y’Urubyiruko n’Ikoranabuhanga ifatanyije n’ikigo gishinzwe iterambere mu Rwanda RDB bakoze inama igamije kureba uko ikoreshwa ry’umurongo mugari wa ‘internet’ ryagezwa mu mahoteli hagamijwe kunoza serivisi zihabwa abayagana.

Rica Rwigamba ushinzwe ubukerarugendo aganira na Minisitiri w'Ikoranabuhanga Jean Philibert Nsengimana ku ikoreshwa ry'ikoranabuhanga mu mahoteli

Icyagaragaye muri iyi nama yarimo na bamwe mu bafite amahoteli ni uko aba banyamahoteli bavuze ko ‘internet’ bahabwa idahagije, bagasaba ko hakorwa ivugurura mu mitangire ya ‘internet’ ndetse no kubagezaho ibikorwa remezo biborohereza kugera ku murongo mugari wa ‘internet’ ku buryo bwihuse.

Umwe mu bafite hoteli wo mu Ntara y’Amajyaruguru yavuze ko hari n’amahoteli usanga arimo ‘internet’, ariko ngo ikaba itihuta ku buryo birutwa no kuba idahari.

Ba nyir'amahoteli bagaragaje ko 'internet' ibageraho ari nke

Kuri ibyo bibazo Minisitiri w’ikoranabuhanga Jean Philibert Nsengimana yavuze ko bishoboka ko hari n’amahoteli ashobora kugira ibikorwa remezo bidafite ubuziranenge bigatuma ‘internet’ idakora neza cyangwa se n’abakozi bashinzwe ikoranabuhanga muri ayo mahoteli ugasanga nta bumenyi babifitiye.

Inama yafashe umwanzuro ko ibi bibazo byose bigomba kuba byabonewe umuti kugeza mu kwezi kwa Werurwe uyu mwaka ubwo hazaba harebwa uko imyanzuro y’iyi nama yashyizwe mu bikorwa.

N’ubwo nta bushakashatsi burashyirwa ahagaragara bwerekana uko ikoreshwa rya ‘internet’ mu mahoteli rihagaze mu Rwanda, umuyobozi w’ishami ry’ubukerarugendo muri RDB Rwigamba Rica avuga ko bikiri hasi ndetse ko n’ibiciro bya ‘internet’ bikiri hejuru kuko abatanga iyo serivisi bakiri bake.

Nubwo ikoranabuhanga ari rike mu mahoteli Minisitiri Nsengimana avuga ko ryakwirakwijwe mu gihugu

Mu rwego rwo gukwirakwiza ‘internet’ mu Rwanda hafashwe icyemezo cy’ishyirwaho ry’umurongo mugari, Minisitiri Nsengimana akaba avuga ko uwo murongo wamaze kugera hose mu gihugu ku kigereranyo cy’ibilometero 2300.

TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!

IBITEKEREZO