"Sinshobora gukora byose, umusirikare mukuru ntaho yagera adafite abasirikare bato"

Mu kiganiro cyahise kuri France 24, kuwa 19 Nyakanga 2012, saa tatu na mirongo ine n’itanu z’umugoroba, cyatanzwe n’umunyamakuru Philome Robert, kikaba cyarakozwe na Marc Perelman, Nicolas Baker, Joel Procope na Sébastien Eugène abanyamakuru ba France 24, Perezida Paul Kagame yababwiye ko adashobora gukora byose wenyine kuko no ku rugamba umusirikare mukuru ntaho yagera adafatanyije n’abato.

Ubwo abanyamakuru ba France 24 basuraga u Rwanda, batemberanye na Perezida wa Repubulika y’u Rwanda Paul Kagame, bamubaza byinshi kandi abaha ibisubizo.

Ubwo bari mu modoka yo mu bwoko bwa Range Rover y’umutamenwa, Perezida Kagame ayitwariye, berekeza mu Bugesera nk’uko byatangajwe, Perezida Kagame ngo ntakunda kwicara inyuma mu mwanya w’icyubahiro. Umunyamakuru yatangiye agira ati “uyu mwaka mu Bugesera, ibihe byabaye byiza, imvura yaraguye.” Perezida Kagame amusubiza agira ati “nk’iyo ngenda mu modoka nk’uku, nkabona hari ikibazo nka hariya mu baturage, ndahagarara nkabaza uko byagenze.”

Muri urwo rugendo, bakomeje bagana Gashora mu Bugesera, gusura ishuri ry’abakobwa ryashinzwe n’Abanyamerika.

Mu ishuri, Perezida Kagame yatanze ikiganiro kandi abazwa n’ibibazo, abwira abanyeshuri ati “ntimugomba kugira ipfunwe imbere y’Abanyaburayi.” Umwe mu banyeshuri yabajije Perezida Kagame ati “ni gute twebwe abakiri bato tuzagera ku byo mwifuza (Vision) ?” Perezida amusubiza ati “Ntimuzigere na rimwe mwiyima amahirwe abasanze. Niba mugize amahirwe yo kwiga…. nimuyakoreshe nyabyo, mutwaze kandi mugere aho mushaka, nta munota n’umwe mutaye.”

Umunyamakuru wa France 24 yakomeje avuga uburyo Perezida Kagame aha umwanya n’agaciro mu buyobozi igitsina gore, atanga ingero nko mu Nteko Ishinga Amategeko y’u Rwanda n’ahandi mu buyobozi. Perezida yamusubije agira ati “birakwiye guha umwanya umutegarugori mu gihugu cyacu, akagira uruhare mu bikorwa byo kwiteza imbere.”

Umunyamakuru wa France 24 akomeza avuga ko Perezida Kagame ashaka kujyana u Rwanda imbere heza, ariko imihanda yose yo mu Rwanda imuganisha ahakorewe amarorerwa ya Jenoside yakorewe Abatutsi.

Ibyo yabivuze bari mu nzira bagana ku rwibutso rwa Jenoside yakorewe Abatutsi rwa Nyamata mu Bugesera. Perezida Kagame yakomeje amubwira ko ibyo arimo amwereka, we yabibonye kuva kera bakiri ku rugamba. Ati “rimwe na rimwe naje no gusaba abasirikare kudakomeza kunyereka imirambo y’abantu bishwe urw’agasinyaguro, ngo bitamviramo uburakari n’akababaro kenshi, kandi ndi ku rugamba. Kenshi abasirikare twari kumwe basangaga mu ntoki, n’ahandi henshi twacaga hose hari imirambo myinshi, n’inkomere zibabara cyane, bakampamagara, bakanjyana kunyereka.”

Umunyamakuru avuga ko bakomeje bajya gusura ibiro byo Perezida wa Repubulika akoreramo, aho bagaragaje arimo asinya amasezerano y’ubufatanye mu bucuruzi. Kuri iyo ngingo irebana n’ubufatanye mu by’ubucuruzi, Perezida Kagame agira ati “dukora ibishoboka byose ngo tworohereze abashaka gukorera business yabo mu Rwanda, kuko twasanze ari kimwe mu bintu bikomeye mu bukungu ku gihugu cyacu.”

Muri icyo kiganiro hanagaragayemo Ambasaderi w’u Budage mu Rwanda, wavuze ko u Budage butera inkunga u Rwanda kandi buzakomeza.

Bagarutse no ku ijambo Perezida wa Repubulika yavuze ubwo hizihizwaga imyaka 50 y’ubwigenge na 18 yo kwibohora, aho Perezida Kagame yavuze ko kuva abakoroni bagenda, u Rwanda rutigeze rugira ubwisanzure. Ati “ni muri iyi myaka 18 ishize gusa, u Rwanda rwabonye ubumwe n’ikiruranga, twari twarambuwe inshuro ebyiri. Habanje ubukoroni, hakurikiraho igihe cy’ingirwabwigenge.”

Muri iki kiganiro kandi, hagaragayemo aho Perezida Kagame yajyanye n’abanyamakuru ba France 24 iwe mu rugo, ari na ho bamubajije icyo atekereza ku bibazo bya Congo Kinshasa. Mu kubasubiza yagize ati “ntabyo nzi, kandi ntibintwarira umwanya. Si ibibazo byanjye rwose, mubigire ibibazo bya b’Abanyekongo cyangwa ibibazo by’Isi yose, ntabwo ngomba guhora ari Jye ubazwa ibibazo bya Congo.” Perezida Kagame akomeza agira ati “twivugire u Rwanda.”

Bamubajije ku byerekeranye n’amatora aherutse mu Rwanda n’uko yayatsinze, Perezida Kagame yagize ati “hano iwacu muri Afurika, iyo umuperezida akunzwe n’abaturage b’igihugu cye, iwanyu mu Burayi babibonamo ko yananiranye, abayoborana igitugu. Ibyo ariko iyo bibaye iwanyu, biba ari bizima nta kibazo, nta gitugu kigaragaramo. Jye ibyo mbibonamo amacakubiri y’amako.”

Perezida Kagame akomeza agira ati “Paul Kagame ntashobora gukora byose. N’iyo ku rugamba umusirikare mukuru ayobora, ntaho yagera adafite abasirikare bato bari kumwe, kandi umusirikare nyawe ntabana n’umujinya w’ibyahise ; kuko twagize amateka akomeye kandi mabi, ariko ntituzemera ko bitumena imitima, ngo bitubuze gukomeza gutera imbere. Tuzabibyaza umusaruro tugana imbere, kuko nta kindi twakora byarabaye. Icyo tugomba gukora ni uguhindura amateka yacu akagarura isura nziza.”

Muri icyo kiganiro kandi Perezida yeretse abo banyamakuru ko adatwarwa gusa n’akazi ka Politiki. Ni bwo yabakiriraga munzu ye atuyemo, aho byagaragaye asangira amafunguro n’umugore we n’abana babiri bari mu rugo ku meza. Nyuma anatembera mu busitani, aho yaganiraga n’abanyamakuru.

Bamubajije igihe ateganyiriza guhagarika imirimo ya Politiki no kuva ku mwanya wa Perezida wa Repubulika n’icyo azakora, Kagame yabasubije agira ati “mfite igihugu. Ni ikintu ntigeze ngira mu buzima bwanjye bwa mbere. Igihe cyose kizaba kidahungabanywa mu mahoro n’umutekano, nta kindi nkeneye rwose. Nta kindi kibazo mfite, kandi mfite urwuri rwanjye, ahantu nshobora kujya kuruhukira, ngasoma, nkandika kandi mu munezero.”

Ikiganiro cyarangiye Perezida acinya akadiho, aho yabwiye umunyamakuru ko iki ari igihe asabana nta bibazo by’akazi asubiza, n’ubimubajije ko amusaba kuzabiha umwanya wabyo. Basoza agira ati “ubu ni mwanya wo kujya kureba umupira wa Arsenal.”