Ni umuhango wabaye Kuwa Gatandatu tariki 30 Mata muri Kaminuza ya Botswana, witabirwa Dr. Dinokopila Bonolo, Umwarimu Mukuru mu ishami ry'amategeko muri iyo Kaminuza n’abandi banyacyubahiro barimo Ambasaderi wungirije wa Kenya, uhagarariye Uganda, Ghana, Mozambique n’uhagarariye Umuryango w’Ubumwe bw’u Burayi muri Botswana.

Ambassaderi Vincent Karega uhagarariye u Rwanda muri Botswana, ntiyashoboye kwifatanya n’abo Banyarwanda kubera imirimo itunguranye yahuriranye n’iyo gahunda, ariko yohereje ubutumwa bwasomewe abari bahari.

Kwibuka byabimburiwe n’isengesho ko kuzirikana no gusabira inzirakarengane z’Abatutsi zazize Jenoside yo muri 1994, gucana urumuri rw’icyizere, impanuro zitandukanye no kureba film mbarankuru kuri Jenoside yakorewe Abatutsi n’urugendo rwo kwiyubaka kw’Abanyarwanda.

Mu kiganiro cyatanzwe na Dr. Dinokopolo Bonolo cyibanze ahanini ku bapfobya Jenoside yakorewe Abatutsi mu Rwanda.

Umuyobozi ushinzwe ibikorwa muri Ambasade ya Kenya, Wilfred M. Musau, yagaragaje uko ibihugu bya Afurika y'Iburasirazuba bikwiye gufatira isomo ku Rwanda bikirinda kuzagwa mu mutego wa Jenoside.