U Bubiligi:Muri 2017,Abanyarwanda basabwe kuzibuka aho Kagame agejeje igihugu

Yanditswe na Ishimwe Israel
Kuya 14 Nyakanga 2016 saa 11:31
Yasuwe :
0 0

Ambasaderi w’u Rwanda mu Bubiligi, Olivier Nduhungirehe yasabye Abanyarwanda baba muri iki gihugu kuzitabira amatora y’Umukuru w’igihugu ateganyijwe muri 2017 mu rwego rwo gushimangira ihame ntayegayezwa rya Demokarasi igihugu kimaze kugeraho.

Nduhungirehe yatangaje ko iterambere igihugu cyagezeho rigomba kubabera umusemburo wo kuzirikana ko byose bituruka ku buyobozi bwiza budaheza.

Ati “Iyo urebye iterambere u Rwanda rwagezeho muri iyi myaka itandatu gusa ishize, inzu zigerekeranywa umunota ku wundi, ibikorwa remezo byubakwa umusubirizo, amashuri kuri bose, ndetse n’umutekano usesuye byose bishimangira ko Umunyarwanda agomba guterwa ishema n’imiyoborere myiza irangajwe imbere na Perezida Paul Kagame.”

Amb. Nduhungirehe yatsembeye abatavuga rumwe na Leta bashaka ko Abanyarwanda bahindura ikipe itsinda, ko bidashoboka kuko bidahuye n’amahame ya demokarasi ashingiye ku miyoborere myiza n’iterambere.

Ati “ Ndagira ngo mbasabe mwese kuzitabira amatora muri benshi, mubagaragarize ko abanyarwanda bashima iterambere bagezemo kandi batavugirwamo. Igihe nikigera rero, muziyandikishe ku malisiti y’itora, mubwire na bagenzi banyu bose aho mutuye babikore. Ndasaba ko buri wese yaharanira ko abanyarwanda batuye mu Bubiligi baza ku isonga mu kwitabira ayo matora maze tugakomeza kwesa imihigo.”

Kuwa gatandatu w’icyumweru gishize, tariki 9 Nyakanga 2016, nibwo Abanyarwanda batuye mu Bubiligi na Luxembourg bizihije ‪‎umunsi wo Kwibohora ku nshuro ya 22.

Uyu muhango waranzwe n’ibiganiro byagarutse ku mateka ‬ y’urugamba rwo kubohora igihugu ndetse n’uruhare rw’Ubuyobozi mu iterambere ry’u Rwanda, amahanga ahora atangarira.

Amb. Nduhungirehe yagaragaje ko u Rwanda rwibohoye ibintu bitandukanye birimo ingoyi y’ubukene, amacakubiri, ndetse n’ivanguramoko ahubwo rwimika umuco rusange wo gukunda igihugu no kwiteza imbere.

Yashimye aho u Rwanda rumaze kugera ku ruhando mpuzamahanga ndetse rukaba rusigaye rwakira inama zikomeye nk’ihuza Umuryango wa Afurika yunze Ubumwe AU, iri kubera mu mujyi wa Kigali kuva ku 10 Nyakanga 2016.

Amahoteli nka Marriot , Kigali Convention Centre na Radisson Blu, aheruka gufungurwa mu minsi ishize agaragaza bidasubirwaho isura nshya ya Kigali.

Ibi bikaba bijyanye na gahunda ya Leta yo kugira Kigali umurwa mukuru w’Afurika ndetse n’uw’isi, ku byerekeye no kwakira inama mpuzamahanga, ari nabyo bizongera umubare wa ba mukerarugendo, bikanateza imbere ubukungu bw’igihugu.

Abanyarwanda baba mu Bubiligi biyemeje gutekereza ku ishoramari n’imishinga ibyara inyungu, ku bikorwa by’ubwisungane, ndetse no guteza imbere umuco gakondo, byose binyuze mu kwishakamo ibisubizo.

Ambasaderi w’u Rwanda mu Bubiligi, Olivier Nduhungirehe
Abanyarwanda baba mu Bubiligi basabwe kuzitabira amatora ya Perezida wa Repubulika ateganyijwe muri 2017 ku bwinshi

Amafoto:Jessica Rutayisire

karirima@igihe.com


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza