Laduma, umuhanzi w’imideli ukomeye agiye kuyimurikira i Kigali

Yanditswe na Ivan Nyagatare
Kuya 7 Kamena 2017 saa 08:38
Yasuwe :
2 0

Umuhanzi w’imideli ukomeye ku Isi, Laduma Ngxokolo, yatumiwe i Kigali mu gikorwa cyiswe “Collective Rw Week of Fashion” azerekaniramo imideli akora ndetse hakanagaragazwa intera abakora umwuga nk’uwe bagezeho mu Rwanda.

Laduma Ngxokolo ukomoka muri Afurika y’Epfo mu gace ka Port Elizabeth, ni umwe mu bahanzi b’imideli bakomeye muri Afurika umaze no kumenyekana hirya no hino ku Isi bitewe n’umwimerere agaragaza mu myambaro akora ndetse no kwambika abantu b’ibyamamare batandukanye.

Laduma yamenyekanye cyane biturutse ku nzu ya "Maxhosa" yashinze muri 2010, ikora imideli y’ubudodo igaragaramo uruvangitirane rw’amabara atandukanye agaragaza ubwiza n’umwimerere w’ibyo ahanga.

Igikorwa cya “Collective Rw Week of Fashion” uyu muhanzi w’imideli yatumiwemo kizamara icyumweru, kizabera Camp Kigali, ku wa 10 Kamena 2017. Hazerekanwa imideli itandukanye yiganjemo ikorerwa mu Rwanda ndetse n’iyakozwe na Laduma.

Umuyobozi w’itsinda ritegura iki gikorwa, Manzi Munana Derick, yabwiye IGIHE ko imyiteguro ikomeye y’iki gikorwa bayirangije igisigaye akaba ari ukwakira uyu muhanzi w’imideli ufite ibigwi akambika n’Abanyarwanda bakora umwuga wo kumurika imideli.

Ati “Kuzana umuhanzi w’imideli uzwi ku isi ku rwego nk’urwe, ni byiza cyane kuko bituma uruganda rw’imideli rutera imbere kandi rukavugwa hose, tutiyibagije ko azambika abana b’Abanyarwanda bakora akazi ko kwerekana imideli.”

Iki gikorwa cya “Collective Rw Week of Fashion” kizerekanirwamo imideli y’inzu icumi zikomeye mu Rwanda ari zo Haute-Baso, Inzuki Designs, House Of Tayo, Sonia Mugabo, UZI Collections, Moshions, Amizero, Ikwiize, Maxhosa ya Laduma na AFRIEK yo mu Buholandi.

Ibikorwa bya Laduma byagiye bishimwa n’abantu bakomeye ku rwego mpuzamahanga barimo n’umuririmbyi Beyonce. Imyambaro ikorwa n’uyu mugabo inambarwa na Jidenna waririmbye ’Classic Man’.

Yagiye yegukana ibihembo bitandukanye birimo icya Design Indaba cyitwa "Most Beautiful Object in South Africa", "Nelson Mandela Metropolitan University Rising Star Award", "Best Emerging Designer Award", "Marie Claire Prix D’Excellence" n’icya "ASFA" yatwaye mu mwaka ushize nk’umuhanzi mwiza w’imideli w’umwaka mu bakorera mu bihugu byo muri Afurika y’Amajyepfo.

Nyuma yo kwerekana imideli akora mu nzu ya “Maxhosa” mu mijyi itandukanye ku Isi irimo Milan, Toyko, New York, Paris na London, ubu Laduma Ngxokolo amaso ayahanze i Kigali.

Laduma utegerejwe i Kigali ni umwe mu bahanzi b'imideli bakomeye
Imideli ikorwa na Laduma ugiye kuza i Kigali iba yiganjemo amabara atandukanye
Imideli ya Laduma yashimwe n'abantu bakomeye barimo n'umuhanzi Beyonce
Jidenna na Banky ni bamwe mu byamamare byambitswe na Laduma

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza