“Abarozi bararutana”; ijambo rya nyuma Mutuyimana yabwiye bagenzi be bakinanaga muri Rayon Sports

Yanditswe na Manzi Rema Jules
Kuya 12 Nzeri 2017 saa 03:30
Yasuwe :
0 0

Mu gitondo cyo kuri uyu wa Kabiri, abakunzi ba Rayon Sports n’ab’umupira w’amaguru muri rusange bumvise inkuru y’incamugongo ko uwari umuzamu w’iyi kipe, Mutuyimana Evariste, yitabye Imana nyamara ejo yari muzima ndetse yagiye kuryama akiganira na bagenzi be.

Mutuyimana wari umwe mu bakinnyi bakuru muri iyi kipe haba mu myaka ndetse n’inararibonye dore ko yakinnye no ku rwego mpuzamahanga muri Kenya akanahamagarwa mu Ikipe y’Igihugu, Amavubi, ni umwe mu basetsaga cyane, akagarurira icyizere bagenzi be kandi bose bakamwisanzuraho, nk’uko kapiteni Ndayishimiye Eric uzwi nka Bakame yabitangarije IGIHE.

Bakame wanakinaga ku mwanya umwe na Mutuyimana, yavuze ko agahinda n’icyuho uyu munyezamu asize bigoye kubyakira ariko we nk’ufite inshingano zo kuba hafi bagenzi be mu bihe byiza n’ibibi yafatanyije n’abatoza guhumuriza abandi bakinnyi.

Yagize ati “[Mutuyimana] ni umuntu narinzi cyane kuko uretse no gukinana muri Rayon Sports twaranazamukanye mu makipe y’abana. Twakinanye mu Ikipe y’Igihugu. Ni umuntu twafataga nk’inshuti ikomeye, mu myitozo ni wa muntu wazanaga ibyishimo, nkubeshye nakubwira ngo hari umukinnyi nzi baba barigeze kugirana ikibazo.”

Bakame yavuze ko azahora yibukira Mutuyimana ku ishyaka yagiraga by’umwihariko mu myitozo ya nyuma yakoze kuri uyu wa Mbere akaba yarasigiye ikipe yose n’abafana bari bahari urwibutso.

Yagize ati “Mu myitozo y’ejo [kuwa Mbere] navuga ko hari ikintu yasize kuko ijya kurangira twateye penaliti noneho iya nyuma niwe wari uri mu izamu noneho iterwa n’akana gato ababyeyi bako bari bazanye ku myitozo karanayinjiza, abantu bose barishima.”

Bakame yakomeje avuga ko na n’ijoro ubwo abakinnyi bose ba Rayon Sports barimo baganira ku rubuga rwa WhatsApp bahuriramo, Mutuyimana niwe wanditse ubutumwa bwa nyuma mbere y’uko baryama.

Yagize ati “Navuga ko n’ubutumwa bwa nyuma kuri WhatsApp ariwe wabwanditse.”

Abajijwe ubwo butumwa icyo bwavugaga, yagize ati “Twateraga urwenya ku bintu biherutse gutambuka mu makuru byabaye muri Kenya aho umuntu bamwibye imodoka nyuma barayimugarurira, sinzi uwazanye ako ka video muri group tukavugaho noneho ijambo yanditse mu Giswahili ni ‘wachawi wanazidiana’ bisobanura ngo ‘abarozi bararutana’.”

Bitewe n’uko amasaha yari akuze bigeze mu ma saa tanu z’ijoro ngo nta n’undi wongeye kwandika bahise baryama kuko bari bafite imyitozo mu gitondo itegura umukino wa AS Kigali uzaba kuri uyu wa Gatatu kuri Stade Amahoro mu irushanwa rya Agaciro Development Fund.

Bakame yasabye abakunzi ba Rayon Sports kwihangana ahubwo bakazaza ari benshi kuri uyu mukino kugira ngo bashyize hamwe bazawutsinde bawuture Mutuyimana kuko no mu gihe cyose yamaze muri iyi kipe yahoraga yifuza ko yatsinda.

Kugeza ubu ntibiramenyekana igihe uyu mukinnyi azashyingurirwa gusa biteganyijwe ko ku mugoroba wo kuri uyu wa Kabiri, abakinnyi bose bari bujye aho yari atuye ku muhanda wo kwa Mutwe i Nyamirambo kumusezeraho.

Bakame (hagati) yari asanzwe ahanganira umwanya na Mutuyimana Evariste witabye Imana

Amafoto ya Mutuyimana mu bihe bitandukanye

Evariste Mutuyimana (wambaye umuhondo) yari inkoramutima n'abakinnyi bose muri Rayon Sports
Evariste Mutuyimana, Ndayishimiye Eric Bakame na Bashunga Abouba bari abazamu ba Rayon Sports
Mutuyimana (iburyo) ku ntebe y'abasimbura
Mutuyimana (wambaye icyatsi n'umuhondo)
Mutuyimana (wambaye umuhondo) asuhuzanya n'abakinnyi ba Espoir FC ku mukino wabahuje wo kwishyura muri shampiyona y'umwaka ushize
Mutuyimana aganira na bagenzi be ku mukino wa nyuma wahuje Rayon Sports na APR FC mu irushanwa ry'Intwari
Mutuyimana asuhuzanya na Perezida wa Rayon Sports, Gacinya Chance Denis
Mutuyimana Evariste yari umuzamu wa kabiri wa Rayon Sports
Mutuyimana yakinnye muri Sofapaka yo muri Kenya mbere yo kuza muri Rayon Sports

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza