Didier Gomes Da Rosa yihanganishije abafana b’Amavubi anagaraza amakosa ya Ferwafa

Yanditswe na Philbert Girinema
Kuya 7 Kamena 2016 saa 07:08
Yasuwe :
3 3

Umufaransa wahoze atoza ikipe ya Rayon Sports, Didier Gomes yatangaje ko ibiri kuba ku ikipe y’igihugu Amavubi ari ingaruka z’ubuyobozi bubi bw’umupira w’amaguru mu Rwanda bwamwimye amahirwe yo gutoza iyi kipe ngo ayigeze kure.

Gomes yageze mu Rwanda mu Kwakira 2012 aje gutoza ikipe ya Rayon Sports yari yarangije shampiyona iri ku mwanya wa kane, inyuma ya APR FC, Police FC na Mukura VS.

Akigera mu Rwanda, izina rye ntiryari rizwi dore ko bwari ubwa mbere atoje muri Afurika ariko ahakora amateka atazibagirana mu mitwe y’abakunzi ba Rayon Sports nyuma yo kuyisanga ku mwanya wa 12 ifite amanota 2, irushwa n’iya mbere ku rutonde rwa shampiyona amanota 9, ava inyuma ageza iyi kipe ku gikombe nyamara ntabandi bakinnyi bakomeye yongeyemo.

Mu ntangiriro z’umwaka ushize, ubwo Ferwafa yashyiraga umwanya w’umutoza w’ikipe y’igihugu ku isoko, Didier Gomes yari umwe mu bifuzaga ako kazi.

Yari ku rutonde rumwe na Ratomir Djukovic wagejeje u Rwanda muri CAN 2004 na Luc Eymael watoje Rayon Sports ndetse n’abandi nka Adel Amrouche watoje u Burundi na Kenya.

Ku buryo butavuzweho rumwe n’abakurikirana umupira w’amaguru mu Rwanda, akazi kahawe Jonathan Mckinstry w’imyaka 29 wari uvuye gutoza Sierra Leone ndetse amaze no kwirukanwa kubera umusaruro muke.

Ntiyari yujuje ibyangombwa Ishyirahamwe ry’Umupira w’Amaguru mu Rwanda ryari ryasabye byatumye muri Gicurasi 2015 asubira i Burayi gukorera impamyabumenyi ya UEFA Pro Licence atari afite.

Icyakurikiye guhabwa akazi, ni uko u Rwanda rwasezerewe ku ikubitiro mu gushaka itike y’igikombe cy’Isi cya 2018, rukabura iyo gukina igikombe cya Afurika cya 2017 ariyo yari intego ye ya mbere by’umwihariko rukaba rumaze kuva ku mwanya wa 64 yarusanzeho ku rutonde rwa FIFA rukaba rugeze ku 103.

Mu bababajwe no kwitwara nabi kw’Amavubi muri iki gihe by’umwihariko gutsindwa na Mozambique mu rugo, harimo na Gomes wahise ananyuza ubutumwa bwe ku rukuta rwa Facebook avuga ko bibabaje ariko agaruka ku buyobozi bwazanye umutoza utabigombaga.

Yagize ati “Ndababaye kandi ntengushywe n’Amavubi. Ni bibi cyane, ariko umwaka ushize namubwiye ko hari ibyo nshobora kugeraho ndi kumwe n’ikipe y’igihugu nkunda. Bishobora kuzabaho mu gihe kiri imbere, ariko ubu ni akababaro n’agahinda.”

Uretse Gomes utishimiye uko Amavubi yitwaye, n’abafana bari ku kibuga kuri uyu wa Gatandatu Mozambique itsinda Amavubi 3-2, batashye bivovota cyane ndetse bwa mbere bavugirije induru umutoza Mckinstry basaba ko yasezererwa kuko ibyo yabasezeranyije nta byo barimo kubona.

Gomes yakoze amateka akomeye muri Rayon Sports

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza