{Umunyaportugal, Cristiano Ronaldo w'imyaka 28 ukinira Real Madrid yo muri Espagne yegukanye igihembo cy’umukinnyi mwiza wa 2013 atsinze Umunyargentina Lionel Messi ukinira FC Barcelona n" Umufaransa Franck Ribery ukinira Bayern Munich. Ni ku nshuro ya kabiri Cristiano atwara iki gihembo nyuma ya 2008 akinira Manchester United.}

Christiano yatsindiye Real Madrid na Portugal ibitego 66 mu mikino 56 harimo inshuro 5 yatsinze ibitego 3 mu mukino umwe (hat-trick) ubwo bakinaga na Suède mu Ugushyingo byahaye Portugal itike y’igikombe cy’Isi kizabera muri Brazil.

Aherekejwe n’umuhungu we, Cristiano yagiye gufata igihembo ashimira bagenzi be bakinana mu ikipe y’igihugu na Real Madrid, maze amarira amubunga mu maso.

Yagize ati “Mudahari ibi ntibyari gushoboka. Ndishimye kuko bitaba byoroshye gutwara iki gihembo.”

Yakomeje agira ati “Ndashimira umugore wanjye [Irina Shayk] n’umuhungu wanjye. Ni ibihe by’ibyishimo birenze. Icyo nasorezaho ni ugushimira buri umwe watumye mbona iki gihembo.”

Ibindi bihembo byatanzwe

Umukinnyi mwiza w'umwaka w'umugore 2013 ni Nadine Angerer, umunyezamu akaba na kapiteni w'ikipe y'igihugu y'u Budage, batwaye igikombe cy'u Burayi.

{Umutoza mwiza w’umwaka:} Jupp Heynckes watozaga Bayern Munich, batwara UEFA champions league mu 2013.

{Umutoza mwiza w’umugore} yabaye Silvia Neid utoza ikipe y'igihugu y'u Budage.

FIFA Puskas award 2013, igihembo cy'igitego cyiza, cyahawe Zlatan Ibrahimovic, yatsindiye Suède ubwo bakinaga n'u Bwongereza mu mukino wa gicuti.

Dore igitego Zlatan yatsinze u Bwongereza

Ikipe nziza ya 2013:

{Umunyezamu } : Manuel Neuer (u Budage / Bayern Munich)

{Myugariro:} Philipp Lahm (u Budage / Bayern Munich), Sergio Ramos (Espagne/ Real Madrid), Thiago Silva (Brazil / Paris Saint-Germain), Dani Alves (Brazil / Barcelona)

{Abo hagati:} Andres Iniesta (Espagne / Barcelona), Xavi (Espagne / Barcelona), Franck Ribery (u Bufaransa / Bayern Munich)

{Ba Rutahizamu:} Cristiano Ronaldo (Portugal / Real Madrid), Zlatan Ibrahimovic (Suède / Paris Saint-Germain), Lionel Messi (Argentina / Barcelona)

{FIFA Presidential Award 2013} cyahawe Jacques Rogge wayoboye Komite mpuzamahanga y’imikino olimpiki imyaka 8 kugeza mu 2013.

{2013 FIFA Fair Play Award} cyahawe Ishyirahamwe ry'umupira w'amaguru muri Afghanistan.

Ku nshuro ya mbere, Ishyirahamwe ry'umupira w'amaguru ku Isi (FIFA) ryatanze ishimwe, FIFA Ballon d'Or Prix d'Honneur, cyahawe Umunya Bazil, Pele, watwaye ibikombe bitatu by'Isi, ufatwa nk'umukinnyi mwiza w'ikinyejana cya 20.

Mbere yo guhabwa iri shimwe, Pele yafashwe n'imbamutima, amarira abunga mu maso.

Yagize ati " Nari nasezeranyije umuryango ko ntarira gusa birandenze. Nari mfitiye ishyari abatwara Ballon d'or kuko sinari kuyibona kuko ntakinnye i Burayi nyamara mfite ibihembo byose. Imana ishimwe kuko icyaburaga imuhira nkibonye"

Umunyamideli Fernando Lima, wayoboye ibirori yari yasabwe n'Abanya Irani kwambara yikwije
Umunyamideli Fernando Lima, wayoboye ibirori yari yasabwe n'Abanya Irani kwambara yikwije

Ni ku nshuro ya 57 hatanzwe iki igihembo cy’umukinnyi mwiza, cyatanzwe bwa mbere mu 1956 gihabwa umukinnyi mwiza w’i Burayi gitangwa n’ikinyamakuru France Football gihabwa Stanley Matthews wakiniraga Blackpool mu Bwongereza.

Mu 1996, hemewe ko abakinnyi batari Abanyaburayi batorwa, cyegukanwa n’Umunyaliberia George Weah wakiniraga Mila AC.

Mu 2007, iki gihembo cyashoboraga guhabwa umukinnyi aho yaba akina hose, umubare w’abanyamakuru batora ugera kuri 96.

Ishyirahamwe ry’umupira w’amaguru ku Isi (FIFA) ryaje guhuza na France Football mu 2010, batanga FIFA Ballon d'Or, Messi niwe mukinnyi watwaye iki gihembo inshuro nyinshi enye.

{[email protected]}