Ubutinganyi bwavuzwe muri AS Kigali bwaba buri mu byatumye Grace Nyinawumuntu ahagarikwa

Yanditswe na Jah d’eau Dukuze
Kuya 5 Mutarama 2017 saa 11:16
Yasuwe : XX
0

Umutoza w’Ikipe y’Igihugu wanatozaga AS Kigali y’abagore, Grace Nyinawumuntu yarangije guhagarikwa ku mirimo ye azira imyitwarire mibi irimo gutonesha bamwe mu bakinnyi be mu gihe abandi abashyira ku ruhande kubera ibibazo biri mu ikipe.

Amakuru agera ku IGIHE, avuga ko ubuyobozi bw’iyi kipe y’Umujyi wa Kigali, bumaze iminsi mu iperereza ku bibazo birimo ubutiganyi buvugwa mu ikipe ya AS Kigali bugatuma abakinnyi bacikamo ibice, dore ko ngo abatabwemera birangira babuze umwanya mu kibuga.

Grace Nyinawumuntu asanzwe ari umutoza w'Ikipe y'Igihugu Amavubi

Mu iperereza IGIHE ubwayo imazemo iminsi, bamwe mu bakobwa bakina muri AS Kigali, batangaje IGIHE ko iyo utabikora (ubutiganyi) akenshi udafatwa kimwe n’abandi, hari bamwe birukanywe abandi babura amahirwe yo kugaragara mu ikipe ibanzamo ya AS Kigali imaze kwigarurira ruhago y’abagore.

Umwe yagize ati “Kera twarabikoranaga, gusa nza kubyanga. Byangizeho ingaruka ntangira kubura umwanya mu ikipe ya AS Kigali ndetse no mu Ikipe y’Igihugu sinongera guhamagara kandi nshoboye”.

Ibi hamwe n’ibindi bibazo byo gutonesha abakinnyi muri iyi kipe ya AS Kigali, ni bimwe mu byatumye ubuyobozi bw’Umujyi wa Kigali bufata iya mbere butangira iperereza kuri uyu mutoza w’umunyabigwi kurusha abandi mu Rwanda, ni ko kuba bamuhagaritse kugira ngo iperereza rigende neza. Umuvugizi w’iyi kipe Teddy Gacinya yaduhamirije ibi.

Yagize ati “Ni byo twamuhagaritse kubera imyitwarire mibi. Hari abana batoneshwa mu ikipe hari n’abandi badatonekwa bityo ni byo turi gukorera iperereza ibihano byabyo bizakurikira nyuma”.

Nyuma yo guhagarikwa k’uyu mutoza, amakuru agera ku IGIHE avuga ko bamwe mu bakinnyi bahise bivumbura bikarangira imyitozo ya mbere yo kuri uyu wa gatatu ikozwe n’abakinnyi barindwi gusa. Ibi ubuyobozi bw’iyi kipe buvuga ko ari kimwe mu bigaragaza ibice byari muri iyi kipe gusa ko bizeye ko bari buze kuganiriza abakinnyi uyu munsi hakamenyekana umwanzuro.

Twagerageje kuvugana n’Umutoza Grace Nyinawumuntu ubugira kabiri ntabwo yitabaga telefoni ye igendanwa.

Ibibazo by’ubutiganyi mu ikipe ya AS Kigali ndetse no mu Ikipe y’Igihugu y’Abagore si ubwa mbere bivuzwe gusa akenshi byagiye birenzwa ingohe hamwe bivugwa ko nta bimenyetso bihagije bibihamya (nubwo abakinnyi babyitangarizaga) abandi bakavuga ko ari amatiku n’ishyari bafitiye umutoza Grace Nyinawumuntu.

AS Kigali iravugwamo ibice mu bakinnyi

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza