Kwamamaza

Kuki amakipe yo mu Rwanda akomeje kwizera amarozi?

Yanditswe kuya 26-10-2016 saa 21:27' na Jah d'eau DUKUZE


“Biragoye gukina mu Rwanda udakoresha amarozi, wayemera utayemera urayakoresha mu buryo bwo kwirinda cyangwa se gushaka intsinzi”. Ayo ni amagambo umukinnyi umwe w’ikipe ikomeye mu Rwanda aherutse kuntangariza, byatumye nibuka ko ruhago nyarwanda yizera cyane izi mbaraga z’umwijima ni ko gutangira kujya hirya no hino nganira na bamwe mu bakurikiranira imikino hafi, ahanini ku kamaro k’amarozi mu mupira w’amaguru.

Kimwe mu birango bya Afurika yo munsi y’ubutayu bwa Sahara ngo ni ukubaha imigenzo n’imihango itandukanye, ni umuco abatuye aka gace bakura ku bakurambere babo kandi ngo badashobora kureka. Ibi ariko, ngo bijya bigera no mu mikino no kwishimisha bikagera kure, aho abakinnyi n’abahanzi bakunze kwizera ko hari izindi mbaraga zishobora kubafasha kugera ku ntsinzi cyangwa se gukundwa kurushaho. Iki ntabwo ari ikintu cyihariwe n’u Rwanda, ni umuco w’aka karere.

Mamelodi Sundowns yashinjijwe gukoresha amarozi nyuma yo kwegukana Champions League mu mpera z'icyumweru gishize

Abed Ayew Pele, wabaye igihangange kuri uyu mugabane mbere yo kwibaruka abakinnyi kuri ubu bakina i Burayi,yigeze kubwira itangazamakuru ko ikipe y’igihugu cyabo cya Ghana yajyaga ikoresha amarozi kandi ko babyizeraga. Aha kandi, bihurirana n’uko Perezida w’ikipe ya Zamalek Mortada Mansour, yaraye atangaje ko abizi neza ko kuba ikipe ya Mamelodi Sundowns yarabatwaye igikombe cya Champions League, ngo byatewe n’uko ikoresha “Juju” ahanini akabihera mu mukino wo kwishyura bahushijemo ibitego 19 nkuko abivuga.

Ubuyobozi bwakomeje gushimangira ko amarozi yagakwiye gucika mu mikino yo mu Rwanda

Mu Rwanda na ho umuco w’amarozi warimitswe gusa igitangaje ni uko nibura bivugwa ko abandi babikoresha bagatwara igikombe nka Champions League, ariko mu rwa Gasabo ho hakabura ikipe ibigerageza ngo ibe yagera mu mikino yo mu matsinda. Ikibabaje kurushaho, ni uko ibi bitangwaho amafaranga atagira ingano, yagakwiye kuba akora ibindi byafasha iterambere rya ruhago. Abantu bose baba muri siporo nyarwanda, barabizi ko ibi bintu bikorwa, gusa habuze ufata iya mbere ngo abihagarike burundu, cyangwa se wenda ngo abe ari ibyo bishyirwamo imbaraga niba byatanga umusaruro koko.

Ubuyobozi bukuru bw’igihugu ariko aha bubibona ukundi, mu kiganiro asanzwe agirana n’itangazamakuru, Perezida wa Repubulika y’u Rwanda Paul Kagame yavuze ko bitangaje kumva ko mu Rwanda hakiri amarozi mu mikino, anavuga ko iyo haza kuba imiyoborere myiza u Rwanda rwaba ruri ku yindi ntera mu mikino runegukana imidari mu mikino itandukanye.

Ati “Abakinnyi bacu bagakwiye gushyira umutima ku kazi n’abayobozi babayobora bakabaha umurongo mwiza aho gukomeza kugendera ku bintu nk’ibyo mu myaka 30 aho tucyizera amarozi na ruswa”.

Aha hari muri Mutarama 2015, aho iyi mvugo ya Perezida yagaragazaga ko na we arambiwe iyi myizerere idafite aho ishingiye. Ikibabaje, ni uko nta cyakozwe ngo icibwe cyangwa ihindurwe cyane ko byari byaje binakurikiye ubundi butumwa bumeze gutyo, uwari Minisitiri w’Umuco na Siporo icyo gihe Amb. Joseph Habineza, yari yahaye abarebwa n’imikino mu Rwanda muri Nzeri 2014.

Ku mukino w'igikombe cy'Amahoro hagati ya Espori na APR FC, umukecuru byavugwga ko ari umurozi wa Espoir, yaje gufatanwa liste y'abakinnyi ba APR FC yabashyizeho ibintu byinshi. Iyi yahise itwikwa n'abashinzwe umutekano i Nyamirambo

Amb Habineza yagize ati:“Nahaye amashyirahamwe y’imikino ubutumwa bwa Perezida wa Repubulika ko tugomba guca ibintu by’amanyanga n’umwanda birimo ruswa n’amarozi byamunze imikino yacu. Tugomba gukorera mu mucyo”.

“Umuntu agomba kwemera gutsinda, gutsindwa cyangwa kunganya. Kujya guca ku ruhande ujya mu bapfumu ujya kugura abasifuzi, ubeshya imyaka y’abakinnyi, ibi byose bigomba gucika burundu nta n’impamvu yo kubitindaho”.

Mu mwaka ushize wa shampiyona, imikino myinshi yagaragayemo ikoreshwa ry’amarozi

Nubwo mu buyobozi bukuru bw’igihugu ntako batagize ngo bakangurire amakipe kudakoresha amarozi, biragaragara ko amakipe yo akomeje gukoresha ibishoboka ngo arwanire abo bita abarimu bazi icyo gukora, aho kugira ngo ave muri iyi myizerere. Mbere y’umukino wa Rayon Sports na APR FC warangiye iyi kipe y’ i Nyanza inyagiye mukeba 4-0, habaye imirwano ku muryango ugana mu rwambariro, hagati ya perezida w’abafana ba Rayon Sports n’abashinzwe gukata amatike, bamushinjaga gushaka kwinjiza abagabo byavugwaga ko ari abarozi baturutse iBurundi, gusa n’ubundi birangira binjiye.

Umuyobozi w'abafana ba Rayon Sports Claude Muhawenimana yafatanye mu mashati n'umukozi wa Innovys bapfa umugabo byavugwaga ko ari umupfumu Rayon Sporst yashakaga kwinjiza ku mukino wa APR FC

Umukino uhuza aya makipe yombi byo birazwi ko ari wo ukoreshwamo amarozi ku rwego rwo hejuru kandi ku mpande zombi, bityo ibyari bibaye byo nta gishya. Aba “baganga” b’iyi kipe nkuko babita, ntabwo baje kuyifasha gutsinda mukeba 4-0 gusa, ahubwo ngo bakomeje kuyifasha no mu mikino ikurikira gusa baza kuburirwa irengero, ari na bwo ikipe yanganyaga imikino itatu ikurikirana, inatakaza igikombe cya shampiyona, nk’uko ababyizera babivuga.

Uretse aho, umukino Etincelles yanganyijemo na Rayon Sports 1-1, bamwe mu bari kuri stade ya Kigali biboneye baniyumvira umusore ukiri muto wari kuri telefoni, avuga amazina y’abakinnyi ba Rayon Sports uko bafataga imipira maze aba na bo si ukuyamurura kakahava.

Ku mukino wa ½ w’igikombe cy’amahoro Espoir yatsinzwemo na APR FC 1-0, kuri stade ya Kigali hafatiwe umukecuru wari ufite urupapuro ruriho amazina y’abakinnyi ba APR FC, yagendaga asoma anabakoreraho ibintu bitangaje. Uyu nyuma yo gusohorwa hanze, ni bwo ikipe yaje kubona igitego cy’intsinzi ijya ku mukino wanyuma yaje gutsindwamo na Rayon Sports 1-0.

Imikino ni myinshi niba atari hafi ya yose, byagiye bigaragara ko yakoreshejwemo amarozi. Uretse no muri shampiyona, ubwo Amavubi yatsindirwaga mu birwa 1-0, amwe mu makuru yagiye hanze yavugaga ko kimwe mu byatumye batsindwa ari uko urutonde rw’abakinnyi rwaba rwaragiye hanze(mu itangazamakuru) mbere yo kurwerekwa umuganga ngo aruhe umugisha… ni byinshi, ariko ikibazo ni uko inshuro nyinshi ari izo amakipe atsindwa kandi yatanze amafaranga yikorera abarozi batagira ingano ku kibuga.

Ubuhamya bwinshi bwaratanzwe ko umupira w’u Rwanda wuzuyemo amarozi

Mu kiganiro na Televiziyo ya Royal, umukinnyi wo hagati w’ikipe ya APR FC Buteera Andrew, aherutse kuvuga ko atizera amarozi kuko yizera Imana, gusa avuga ko kera mu ikipe y’igihugu hari ubwo bakoraga ibintu bijyanye n’iyi myizerere. Ibi byaje binakurikira ubuhamya bwa Eric Nshimiyimana kuri ubu utoza As Kigali, watangaje ko mbere yo gukizwa yakoreshaga amarozi mu makipe yagiye anyuramo, yaba Inter Star, APR FC n’ikipe y’igihugu Amavubi.

Tariki ya 19 Mutarama 2015, ikipe y’Isonga yakoze inama yari iyobowe n’Umuyobozi mu bya tekinike w’iyi kipe Uwimana Igan. Iyi nama yatangiye saa tatu, ahanini yagombaga kuvuga ku kibazo cy’amarozi yavugwaga mu ikipe y’Isonga. Nkuko imyanzuro y’iyi nama dufitiye kopi ibigaragaza, nyuma y’impaka ndende no kubaza abakinnyi batandukanye, umwe mu batoza b’Isonga(tutari butangaze amazina), yaje kwemera ko koko yakoreshaga amarozi anabisabira imbabazi. Iyi ubundi yari nka sakirerego kumva ikipe y’abakiri bato ya Minisiteri y’Umuco na Siporo yemera ko ikoresha amarozi, gusa byarangiranye n’icyo gihe.

Iki kintu utamenya ubwoko bwacyo cyaje kumenywa ku kibuga cya Nyamirambo ku mukino Rayon Sports yatsinzemo APR FC 2-1. Bivugwa ko ari ho intsinzi yari izingiye

Aha kandi, nta minsi ishize Visi Perezida w’ikipe ya Mukura Nayandi Abraham, ashinjije umutoza w’ikipe ye Okoko Godefroid gukoresha amarozi ndetse no kubishyira mu bakinnyi. Ubwo twaganiraga na Okoko, yavuze ko kumwita umurozi nta kibazo bimutwara, gusa ntiyahakana cyangwa ngo yemeze niba koko ajya abukoresha, kuri ubu aracyatoza ikipe ya Mukura. Mu nama yabaye mu ikipe ya As Kigali ubwo umwaka ushize wa shampiyona waganaga ku musozo, na ho ikibazo cy’amarozi cyavuzwemo bivugwa ku bakinnyi baroga abandi, na ho byarangiranye no gutanga imbabazi.

Ingero ni nyinshi, ndetse bimaze gufata indi sura aho bivugwa ko abakinnyi barogana hagati yabo cyane cyane abarwanira imyanya, ikintu gituma n’abakinnyi bake igihugu cyari gifite bamwe kigenda kibahomba ku maherere. Nkuko twatangiye tubivuga, ngo iki ni na cyo gituma benshi mu bakinnyi bagana mu bapfumu ngo byibura babahe ibyatuma birinda kurogwa bya hato na hato.

Ni byinshi byibazwa ni byinshi byashyizwe hanze gusa amarozi gukoreshwa arakoreshwa ariko se kuba bidacibwa ni uko ari ikintu cyo gushimwa? Niba bigeze aho ikipe ishobora kubura amafaranga ya ’Locale’ ariko ntibure ayo guha “Muganga” ubwo aho tugana ni heza ? Igikomeye kurushaho ni uko ubuyobozi bukuru bw’igihugu bwabyamaganiye kure, ahibazwa impamvu nta mbaraga abashinzwe siporo mu Rwanda bashyizemo ngo babirandure burundu.


Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Wednesday 7 Ukuboza 2016
Copyright © 2009 -2014 - IGIHE Ltd - All Rights Reserved