Mu mukino wo gusiganwa ku magare ahareshya na Kilometero 20, Ndayisenga Valens yeretse abandi igihandure yegukana umwanya wa mbere mu bagabo, Uwimana Jeanette yereka ubworo bw’ikirenge abagore, yegukana umwanya wa mbere mu bakobwa.

Ku Cyumweru tariki ya 5 Gicurasi 2013, Ishyirahamwe ry’umukino w’amagare mu Rwanda (FERWACY) yakoresheje irushanwa ryo gusiganwa ku gihe ku muntu ku giti cye (Conte la montre individuel), ryitabirwa n’abakinnyi 22 barimo abakobwa 5 n’abagabo 17 batoranyijwe mu makipe agize FERWACY. Isiganwa ryakozwe kuri kilometero 20, ribera mu karere ka Bugesera.

Abasiganwa bahagurikiye i Gashora basoreza i Nyamata mu rugendo rw’ibilometero 20. Ndayisenga Valens wakoresheje igihe gito mu bagabo, yakoresheje iminota 27, amasegonda 16. Uwimana Jeannette wabaye uwa mbere mu bakobwa we yakoresheje iminota 34, amasegonda 35 n’ibice 46.

Mu gutanga ibihembo, mu bakobwa n’abahungu uwa mbere yahebwe amafaranga y’u ibihumbi 50, uwa kabiri ahembwa 40, uwa gatatu 30, uwa kane 20, uwa gatanu 10.
Uko bakurikiranye n’igihe bakoresheje.

Abagabo.

1. Ndayisenga Valens 27’16’’00

2. Karegeya jeremie 28’00’’17

3. Byukusenge Patrick 28’07’’33

4. Uwamungu Innocent 28’36’’16

5. Bintunimana Emille 28’37’’28

Abagore

1. Uwimana Jeannette 34’35’’46

2. Ingabire Beathe 34’36’’55

3. Girubuntu Jeanne d’Arc 34’42’’34

4. Uwamariya Benitha 35’34’’24

5. Niyonsaba Clementine 35’49’’30