Team Rwanda yarangije ku mwanya wa 7 muri Tropicale Amissa Bongo

Team Rwanda yarangije ku mwanya wa 7 muri Tropicale Amissa Bongo


Yanditswe kuya 30-04-2012 - Saa 11:56' na Egide MUGISHA

Guhera tariki ya 24 kugeza kuri 29 Mata 2012 mu gihugu cya Gabon haberaga irushanwa mpuzamahanga ryo gusiganwa ku magare La Tropicale Amissa Bongo, umufaransa Anthony Charteau ku nshuro ya gatatu yikurikiranya yaryegukanye, Team Rwanda ibona umwanya wa 7.

Team Rwanda yatangiye La Tropicale Amissa Bongo itorohewe kuko kuri étape ya mbere umwe mu bakinnyi Team Rwanda igenderaho, Byukusenge Nathan yahuye n’impanuka bituma aza ku mwanya wa 80, ikindi nkuko twabitangarijwe n’umutoza Munyankindi Benoit ngo ubushyuhe ntibwaboroheye.

Mu byiciro byakurikiyeho Team Rwanda yagiye yitwara neza aho nk’umusore Ruhumuriza Abraham yafashe umwanya wa 13 akomeza kuba hafi aho arinda arangiza irushanwa ari ku mwanya wa 12 bituma afata umwanya wa 4 mu bakinnyi babanyafurika.

Mu kiganiro kuri terefone umutoza Munyankindi Benoit usazwe atoza ikipe ya Benediction club y’i Rubavu akaza kujyana ikipe y’igihugu kuko Jonathan Boyer atari ahari yadutangarije ko Jock yagiye muri USA gushaka andi marushanwa Team Rwanda yakwitabira ndetse n’ibikoresho bishya, Munyankindi ati “:Nasabye abakinnyi gufatikanya kandi bagashira ubwoba, ikirere twari twatangiye kukimenyera buhoro niyo mpamvu twatangiye kwitwara neza”.

Irushanwa rya Tropicale Amissa Bongo rirangiye basiganwe ahantu hareshya na 579.4 km muri mu byiciro bitandatu , umufaransa Anthony Charteau ukinira Europcar yongeye kwegukana iri rushanwa ku nshuro ya gatatu yikurikiranya (2010,2011 na 2012) akurikirwa n’umunya Eritrea Meron Russom wa MTN QHUBEKA n’umunya Morocco Adil Jelloul ku mwanya wa gatatu.

Mu banyarwanda Ruhumuriza yarangije ku mwanya wa 12, Rudahunga Emmanuel ku mwanya wa 22, Habiyambere Nicodem ku mwanya wa 30, Byukusenge Nathan ku mwanya wa 33, Hadi Jamvier ku mwanya wa 42 na Biziyaremye Joseph wa 50 mu bakinnyi 74 barirangije muri 90 bari baritangiye, ibi byatumye Team Rwanda iza ku mwanya wa 7 mu makipe 15 yakinnye iri rushanwa, ku makipe y’ibihugu bya Afurika u Rwanda rwegukanye umwanya wa 3 inyuma ya Eritrea na Morocco, mu bakinnyi bakiri bato Rudahunga Emmanuel yaje ku mwanya wa 10.

Mu kiganiro kuri terefone na IGIHE.com , umuyobozi wa FERWACY Aimable Bayingana yadutangarije ko irushanwa ryagenze neza ko ariko icyamushimishije ari uburyo Team Rwanda yitwaye ndetse n’abakinnyi b’Abanyafurika muri rusange cyane ko babaga bahanganye n’abakinnyi babigize umwuga bakomeye baturutse i Burayi n’ahandi.

Bayingana ati :”Kwitwara neza kwa Team Rwanda ni umusaruro w’amarushanwa menshi twongeye mu gihugu nayo hanze twitabira, ibi tuzabikomeza kuko ikigaragara ni uko abakinnyi babigize umwuga icyo barusha abacu ni amarushanwa menshi, ikindi cyo kwishimira ni abakinnyi bakiri bato nka Hadi Jamvier uburyo yitwaye, ibi bigaragaza ko bafite ejo hazaza heza kuko burya ikibazo ba Ruhumuriza bagize batangiye gukina bakuze ariko bariya bana umutoza abakurikirana uburyo bwose ibyo bimpa ikizere ko umukino w’amagare mu Rwanda dufite ejo hazaza heza cyane”.

Abakinnyi batanu bambere

1. CHARTEAU Anthony 13h47’57’’

2. RUSSOM Meron 13h48’05’’ 08’’

3. JELLOUL ADIL 13h48’09’’ 12’’

4. UMERBEKOV Nikita 13h48’11’’ 14’’

5. GENE Yohan 13h48’15’’ 18’’

6.
Irushanwa rya Tropicale Amissa Bongo niryo rushanwa mpuzamahanga rikomeye ribera ku mugabane wa Afurika aho riri ku rwego rwa 2.1 muri UCI Africa, ni ku nshuro ya 7 ryari ribaye rikaba ritaregukanwa n’umunsi n’umwe n’umukinnyi w’Umunyafurika.

Andi makuru y’umukino w’amagare kanda www.ferwacy.com urubuga rwa interineti rw’ishyirahamwe ry’umukino w’amagare mu Rwanda.

Antony wegukanye iru shanwa
Team Rwanda

Foto:ferwacy

TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!

IBITEKEREZO