Ku mugoroba wo kuri uyu wa Gatandatu tariki ya 4 Kamena 2016, abahanzi bari muri PGGSS batangiye guhatana baririmba mu buryo bwa live buri wese yerekana imbaraga n’igikundiro afite ari nabyo bishingirwaho hagenwa uwahize abandi.
Abahanzi icumi bari mu irushanwa rya Primus Guma Guma Super Star baririmbiye abafana babo mu gitaramo cya mbere cya Live banahabwa amanota n’akanama nkemurampaka kagizwe na Aimable Twahirwa, Tonzi na Lion Imanzi.
Iki gitaramo kiri mu byo bari gukora bazenguruka u Rwanda mu rwego rwo kwiyereka abafana banabashishikariza kubatora, amajwi yabo azongerwa ku manota y’abagize akanama nkemurampaka hanyuma igiteranyo cya byose kigenderweho mu kureba ukwiye kuzegukana miliyoni 24 za Bralirwa.
Irushanwa rya PGGSS ritangira, ryahuzaga abahanzi bakunzwe kurusha abandi mu Rwanda ni nacyo cyagenderwagaho. Ibi byaje guhinduka mu mwaka wa 2013 aho hongerwagamo n’isuzumwa ry’ubuhanga bw’umuhanzi mu miririmbire.
Mu by’ingenzi bishingirwaho mu guhitamo uhiga abandi harimo (1) Uburyo umuhanzi akunzwe (Popularity), (2) Uburyo umuhanzi aririmba anitwara ku rubyiniro , (3) Uko asa ku rubyiniro (Stage appearance) , imyifatire (Discipline) n’uburyo ashyigikirwa n’abafana.
Nyuma y’iki gitaramo, kuwa 18 Kamena 2016 abahanzi bazajya gutaramira mu Karere ka Ngoma mu Ntara y’Uburasirazuba.
UKO IGITARAMO CYAGENZE
– Abagize akanama nkemurampaka bamaze kuhagera, ndetse na Band yatangiye gucuranga mu buryo bwo gushyushya abafana mu gihe mu minota mike igitaramo kigiye gutangira.
– Itsinda rya TBB ni ryo ribimburiye abandi bahanzi kuririmba. Bahereye ku ndirimbo bise "Mbwiza ukuri", bakurikizaho "Vuza Ingoma".
– Danny Vumbi ahise yanzika mu ndirimbo ze nka "Ni uwacu". Afite abasore bamufasha kubyina na we agashyushya abafana aririmba live.
– Umutare Gaby mu ndirimbo zituje nka "Ntunkangure" na "Mesa kamwe" yiyerekanye bwa mbere muri Primus Guma Guma Super Star i Nyamirambo.
– Urban Boyz, itsinda ryitabiriye PGGSS inshuro enye kuva muri 2011. Safi, Nizzo na Humble Jizzo baririmbye live mu buryo butunguye benshi. Mu ndirimbo "Till I Die" na "Tayali" bigaragaje nk’abahanzi bafite ubunararibonye kandi bakuze mu mwuga, abafana babo na bo baberetse ko babashyigikiye.
– Jules Sentore, umwe mu bahanzi bazwiho ubuhanga mu kuririmba by’umwimerere ahereye ku ndirimbo "Udatsikira", imwe mu zizwi cyane n’abafana ndetse bamwe bari kumufasha kuyiririmba.
– Danny Nanone ageze imbere y’abafana abaririmbira ati "Iyi njyana niyo iyoboye, iyi njyana niyo iyoboye!" Ahise akurikizaho iyitwa "Njye Ndarapa", ayisoje afata ijambo avuga ko ’atanze 500,000frw mu Kigega Agaciro Development Fund’.
– Bruce Melody uje mu irushanwa bwa gatatu, mu ndirimbo "Ndakwanga", "Umutwe" yigaragaje mu gitaramo cya live i Nyamirambo.
– Christopher yifashishije indirimbo "Abasitari" na "Agatima", yongera kwiyereka abafana be bakurikirana PGGSS nyuma y’uko mu mwaka wa 2015 atayitabiriye.
– Allioni mushya muri PGGSS aririmbye izitwa "Pole Pole" na "Impinduka". Yari aherekejwe n’ababyinnyi biganjemo ab’igitsinagore.
– Young Grace asoje igitaramo cya PGGSS kibumburiye ibindi bya live bigomba kubera mu bice bitandukanye by’u Rwanda.
Ibirori byasojwe Bralirwa ishyira ahagaragara icupa rishya rya Primus nini, rifite icyapa n’ibirango bishya.
Amafoto: Mahoro Luqman
TANGA IGITEKEREZO