Chris Brown yaririmbiye i Mombasa ahitwa Mombasa Golf Club mu ijoro ryo kuwa 8 Ukwakira 2016. Iki gitaramo cyari cyiswe Mombasa Music Festival bivugwa ko cyateguwe bigizwemo uruhare na Joho Hassan Umuyobozi w’Umujyi wa Mombasa.

Uyu muhanzi wakundanye na Rihanna igihe kirekire ngo yahawe amashilingi ya Kenya 67,200,000 [akabakaba ibihumbi 700 by’amadolari] kugira ngo yemere kuza kuririmbira muri uyu mujyi.

Muri iki gitaramo Chris Brown yabanjirijwe n’abandi bahanzi barimo Vanessa Mdee, Wizkid, Ali Kiba, Navio na Nazizi. Abahanzi bagize itsinda rya Sauti Soul bari mu bari baje kureba iki gitaramo gusa ntabwo baririmbye.

Ubwitabire ntibwari ku rwego rwo hejuru nk’uko byari byitezwe, kuri Mombasa Golf Club ahabereye igitaramo ntihari huzuye. Ubuyobozi bwa Mombasa Rocks bwabwiye IGIHE ko kuba abantu batarabashije kuza nk’uko byari biteganyijwe ngo byaturutse ku ntambara yashojwe n’abantu b’i Nairobi kuri Twitter bashinja Chris Brown guhohotera umugore ndetse icyo gihe basabaga leta ya Kenya kumwirukana muri iki gihugu.

Icyagaragaye muri iki gitaramo ku ruhande rw’abafana ni uko bizihirwa cyane ndetse ahanini babifashwamo n’inzoga ndetse n’itabi benshi baba batumura mu gitaramo hagati.

Abitabiriye igitaramo bari biganjemo urubyiruko rwanywaga inzoga zikomeye zirimo whisky zo mu moko atandukanye zirimo Red Label, Black Label n’izindi. Hari n’abanywaga inzoga zihenze cyane nka Ciroc, Maritini, Cognac zo mu moko atandukanye, Hennessy n’izindi. Abatifite bo banywaga inzoga z’ibifuro zirimo Tusker n’izindi zengerwa i Mombasa zitazwi cyane.

Abanywaga ibinyobwa bidasembuye washoboraga kubabara ku ntoki, wasangaga umukobwa w’inkumi yiteretse icupa rya Red Label arimanuza itabi nta mpungege.

Umuraperi Nazizi wakunzwe mu myaka yashize

Umuririmbyi Vanessa Mdee wo muri Tanzania

Wizkid wo muri Nigeria

Uyu mukobwa akorera Radio Capital FM ni we wahamagaye Aki Kiba, Wizkid na Chris Brown ku rubyiniro

Ali Kiba yaririmbye iminota itageze ku icumi bamukuraho

Inkumi yarabutswe Bien-Aimé Baraza wo muri Sauti Sol iramufotora

Bien-Aimé Baraza umwe mu baririmbyi b'imena muri Sauti Sol yari yaje kureba igitaramo

Chris Brown yaririmbye mu gihe kigera ku masaha abiri

Yabyinaga imbyino asanzwe azwimo

Chris Brown yeretse abafana ibishushanyo afite ku nda

Muri iki gitaramo wasangaga benshi mu basore buri wese yasohokanye inkumi zirenze imwe

Umusore n'inkumi baguze Red Label ngo ibafashe kumanura ivumbi mu gitaramo cya Chris Brown

Byari bigoye kubona umukobwa wo muri Mombasa abyina nta kirahuri cy'inzoga afite mu ntoki

Abakobwa benshi i Mombasa ubasangana ibishushanyo ku mubiri

Uyu mugabo ni we wari umuterankunga mukuru ku meza y'aba bakobwa

Uyu mugabo na we yari yazanye abakobwa babiri

Uyu yageragezaga kubyina nk'ab'iki gihe yasohoye ururimi

Uyu yatumuraga shisha mu gitaramo hagati

Amafoto: Sabin/Mombasa-Kenya