Ibirori by’ubukwe bw’umuririmbyi Kavutse Olivier na Amanda Fung byabereye ku nkengero z’ikiyaga cya Kivu mu Mujyi wa Rubavu ahari hateraniye abantu babarirwa mu gihumbi. Ubukwe bwabo bwabaye kuwa Gatandatu tariki ya 9 Nyakanga 2016.

Ubukwe bwa Kavutse na Amanda bwabereye mu bihugu bibiri. Muri Gicurasi 2016 basezeranye imbere y’amategeko muri Canada hanyuma kuwa 9 Nyakanga 2016 bambikanye impeta mu rusengero.

Aba bombi basezeranye imbere y’Imana mu Mujyi wa Rubavu mu Itorero New Life Bible Church gusa ibirori byabereye ku kiyaga cya Kivu. Imiryango ya Amanda Fung yo muri Canada yari yaje kubashyigikira, cyo kimwe n’abo muri Hong Kong aho uyu mukobwa akomoka.

Mu muhango wo gusezerana kwabo, byari ibirori binogeye ijisho, byabereye ku nkengero z’ikiyaga cya Kivu kuva bitangiye kugeza bihumuje. Nyuma yo kwambikana impeta y’urudashira, habaye igitaramo gikomeye cyo guhimbaza cyarangiye ahagana saa sita z’ijoro.

Mu Gushyingo 2015 nibwo Olivier Kavutse yambitse Amanda Fung impeta y’urukundo bemeranye kuzarushinga. Kavutse Olivier na Amanda Fung bari bamaze imyaka itanu bamenyanye, beruye ko bari mu rukundo mu mwaka wa 2014.

Foto: Jonathan Lau