Kuri uyu wa Kane, Perezida Paul Kagame yakiriye amagana y’abitabiriye iyi nama mu birori byari byiganjemo imbyino nyarwanda bya Rwanda Night byaraye bibereye i Davos.

Abanyarwanda bibumbiye mu ishyirahamwe URUNANA ryasusurukije ibi birori byari byiganjemo imbyino nyarwanda. Perezida Kagame, abayobozi batandukanye mu nzego nkuru z’igihugu n’abanyamahanga bitabiriye iyi nama bizihiwe batarama gitore.

Perezida Kagame na we yabyinnye

Urunana, ni ishyirahamwe ryashinzwe na Jacqueline Karekezi de Meyrin na Béatrice Ntashamaje, bafatanyije n’indi miryango y’Ababyeyi b’Abanyarwanda n’inshuti zabo z’Abasuwisi. Basanzwe bategura ibitaramo bikomeye byerekana umuco nyarwanda mu Busuwisi bikitabirwa mu buryo bukomeye.

Muri iyi nama y’iminsi ine yatangiye ku wa 20 Mutarama, Perezida Kagame yagaragaje icyizere cy’iterambere mu by’ubukungu umugabane w’Afurika ufite, uruhare rw’ikoranabuhanga mu iterambere n’imibereho myiza y’abaturage n’ishoramari.

Abanyamahanga wabonaga baryohewe n'imbyino nyarwanda

Byari ibyishimo kuri bose

N'abanyamahanga bari bizihiwe

Abagize Urunana bafashe ifoto y'urwibutso n'Umukuru w'Igihugu

Beretse amahanga imbyino zo mu muco nyarwanda