Ernesto umaze iminsi kuri Radio Ijwi rya Amerika yatangiye gukabya inzozi ze

Yanditswe na Dusabimana Aimable
Kuya 24 Nyakanga 2017 saa 02:34
Yasuwe :
1 0

Umunyamakuru Ernesto umaze umwaka umwe agiye muri Amerika kwiga, yasobanuye uko yakiriye akazi aherutse guhabwa ko gukora kuri Radiyo Ijwi rya Amerika, ubunararibonye amaze kuhungukira n’ibijyanye n’imishinga ateganya irimo n’iyo gushaka umugore.

Erneste Ugeziwe yamenyekanye nka “Ernesto” kuri Televiziyo y’u Rwanda na Magic Fm mu biganiro bijyanye n’imyidagaduro. Yerekeje muri Amerika ku itariki 19 Gashyantare 2016 agiye kuhakomereza ishuri mu cyiciro cya gatatu cya Kaminuza, mu ishami ry’ibijyanye n’itangazamakuru n’ikoranabuhanga.

Uyu musore amaze iminsi yumvikana kuri Radio Ijwi rya Amerika(VOA) mu makuru yo ku mugoroba ndetse no mu biganiro by’umuziki mu mpera za buri cyumweru.

Mu kiganiro yagiranye na IGIHE, Ernesto wahoze akorera Televiziyo y’u Rwanda yavuze ko kuri we iyi ari intambwe ikomeye yitezeho kuzamufungurira amarembo n’ahandi hakomeye yabyirutse yifuza kugera.

Yagize ati "Iyo nsubije amaso inyuma nkibuka nko myaka itanu ishize, sinatekerezaga ko umuntu yagera aho ageze ubu. Nibuka kera ngitangira ibijyanye n’itangazamakuru ubuzima bwose bwari inzozi." Yongeyeho ati "Ntabwo umuntu aragera aho yifuza ariko ibyo ari byo byose nanone hari icyo umuntu kugeza ubu yashimira Imana."

Ernesto wiga muri Kaminuza ya Charlotte State University yo muri North Carolina, yabanje kwimenyereza kuri Televiziyo ya NBC iri mu zikomeye muri USA, aho yakoraga ku ishami ryayo rya Kane. Avuga ko aho yahigiye amasomo atandukanye ku buryo bwo gutegura amakuru, uburyo bwihariye bayataramo n’ibindi byinshi byatumye asobanukirwa kurushaho kugeza ubwo atangiye gukora ku Ijwi rya Amerika aho ari kugeza ubu.

Yagize ati "Kimwe mu byanshimishije cyane muri iyi myaka yose ni kuba narabashije kumva ijwi ryanjye kuri radiyo mpuzamahanga, ni ibintu byanshimishije cyane."

Yakomeje ati "[Aseka] Ndibuka kera muri 2013 nigeze kuganira na Mama ndamubwira nti ’Wiyumva gute iyo wumvise umuhungu wawe avugira muri radiyo, [nasaga nk’umwiyemeraho ukuntu], maze aransubiza ngo ’uboshye ari BBC cyangwa Ijwi rya Amerika wavugiragaho’.”

Ernesto yanavuze ko urwego uruganda rw’imyidagaduro mu Rwanda rugezeho ari urwo gushima ariko avuga ko kimwe mu byo yasanze mu itangazamakuru ryo hakurya y’amazi cyane cyane iry’imyidagaduro, abakora uwo mwuga mu Rwanda bakosora ari ukugira amakuru atandukanye arimo n’anenga bakirinda gukora mu gusingiza kuko bihisha ibitagenda neza bigatuma bidakosorwa.

Ati "Tujye tunatobora tunenge kugirango twubake, kuko abandi niko babigenje kandi hari aho bagejeje imyidagaduro yabo. Ikindi tugire umuco wo kwishimira no guterwa ishema n’iterambere ryabahanzi bacu, aho kubarwanya kubera wenda inyungu runaka. Ngirango aho tugeze ubu ntawutabona ko hari icyakozwe."

Aracyasaba Imana kumugenera umugeni ukwiye

Ernesto wavuye mu Rwanda hanugwanugwa urukundo hagati ye na Miss Bagwire Keza Joannah ariko bikaza gucogora agiye, yavuze ko nubwo hari byinshi akumbuye mu Rwanda, aho ari ubu akihafite igihe bityo akaba ataremeza neza igihe azagarukira mu Rwanda.

Yongeyeho ko nubwo mu mishinga ateganya mu gihe cya vuba harimo no kurushinga agisengera kubona umugeni bazakora ubukwe bagasezerana kubana akaramata.

Yagize ati "Gushinga urugo burya si ibintu biza gutyo gusa, ntago ubikora kuko n’abandi babikoze kandi burya nta n’imyaka yo kurongora ibaho. Gusa si kera cyane na none, ndacyamusengera kuko burya umugore atangwa n’Imana. Ubwo naboneka, tuzabirangiza."

Yakomeje ati "Iyo nirebye mu yindi myaka nk’itanu iri imbere, sinavuga ngo nzaba ngeze aha gusa na none nkeka ko ntazahagarara. Icy’ingenzi ni ukudacogora."

Ernesto asigaye aba mu Mujyi wa Washington DC, ntarafata umwanzuro w’igihe azagarukira mu Rwanda kuko muri iyi minsi hari byinshi ahugiyemo mu kurushaho gushaka ubumenyi.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza