Umuhanzi Uzamukunda Goreth yateguye igitaramo cyo guhimbaza Imana yitiriye album ye “SIOGOPI” kizabera mu Karere ka Kayonza kuwa 19 Gicurasi 2013, aho azajyanayo n’abahanzi bavuye i Kigali nka Nzeyimana Emile, Olivier Roy, Karyango Bright, Rachel Rwibasira n’abandi, mu rwego rwo kwegera abanyarwanda hirya no hino mu gihugu.

Goreth usanzwe ategura ibitaramo nk’ibi dore ko aherutse mu cy’i Rwamagana, SIOGOPI Tour Concert izabera mu rusengero rwa Assemble De Dieu kuri cyi cyumweru tariki 19 Gicurasi 2013 kuva saa munani z’igicamunsi (14h00’/2pm), nk’uko twabitangarijwe na Ndabarasa Sebatware Costa ushinzwe gutegura ibi bitaramo, unavuga ko abaturage bo mu bice bitandukanye by’iguhugu bishimira uku kwegerwa n’abahanzi bahimbaza Imana.

Mu kiganiro na IGIHE, Ndabarasa yagaragaje abazatarama, ati “Abahanzi bamaze kwemezwa ni Emile Nzeyimana, Olivier Roy, Karyango Bright, Rachel Rwibasira na Worship Team yo mu rusengero rwa Assemble De Dieu y’i Kayonza naho umwigisha akazaba ari Pasiteri Butera Augustine.”

Ndabarasa anavuga igituma hakorwa ibitaramo byinshi mu gihe gito yavuze ko aruko izi ndirimbo Imana izishyira mu bahanzi kugira ngo zifashe ubwoko bwayo, bityo ntibikwiriye ko ubutumwa Imana iba yatanze bubikwa mu mazu y’abahanzi no mu mitima gusa, bukwiye gukora icyo Kristo yabutangiye.”

Abahanzi bahimbaza Imana barashishikarizwa gukomeza kongera ibitaramo bakora, batibanda gusa mu mujyi wa Kigali.