TPF 5 : Umunyarwanda Jackson Kalimba akeneye inkunga y’Abanyarwanda ngo yegukane igikombe

Kuri iki Cyumweru tariki ya 29 Nyakanga 2012 haratangazwa umuhanzi wegukana umwanya wa mbere mu irushanwa rya Tusker Project Fame Season 5. Umunyarwanda Jackson Kalimba arabura gusa rimwe ku ijana (1%) ngo abashe gutsinda iri rushanwa. Ibi bisobanuye ko atowe cyane yabasha kwegukana iri rushanwa.

Gutora Jackson Kalimba ni ukujya ahandikirwa ubutumwa bugufi ukandika ijambo Tusker ugasiga akanya ukandika umubare 10 ukohereza kuri 7333, ukoresheje MTN. Uhita wohererezwa ubutumwa bugufi bukubwira ko watoye umuhanzi Jackson Kalimba.

Ushobora no ku mutora ku rubuga rwa Internet rwa www.tuskerlarger.com n’ubwo ibihabwa amahirwe menshi ari kuri SMS.

Mu ijoro ryo kuri uyu wa Gatandatu tariki ya 28 Nyakanga 2012, umwe muri batanu bahatanaga yavanywe muri iri rushanwa. Uyu akaba ari Umunyakenya witwa Steve.

Ni ukuvuga ko bane basigaye bari guhatanira umwanya wa mbere ari Ruth, Jackson, Joe, na Doreen.

Mu kiganiro na Eric Mucyo, umuhanzi waririmbanye na Jackson Kalimba igihe kirekire, yabwiye IGIHE ko bishoboka ko Kalimba yakwegukana iri rushanwa mu gihe buri munyarwanda yaba atoye Jackson Kalimba.

Yagize ati :"Hasigaye nk’amasaha ane kandi arabura rimwe ku ijana (1%) kugira ngo abashe gutsinda Ruth uri ku mwanya wa mbere. Ejo nakurikiye Tusker Project Fame mbona ko bishoboka. Ndasaba buri munyarwanda kwandika ijambo Tusker agasiga akanya akandika umubare 10 akohereza kuri 7333, ukoresheje MTN byaba byiza."

Shyigikira uyu muhanzi nyarwanda umutora ngo abashe kwegukana umwanya wa mbere muri iri rushanwa, azahabwe igihembo cy’amashiringi miliyoni 5 z’Amanyakenya ni ukuvuga asaga miliyoni 35 z’Amanyarwanda.

Mu mwaka wa 2009, mu Rwanda hatashye inkuru nziza ko umunyarwanda Alpha Rwirangira yegukanaga iri rushanwa, ubwo u Rwanda rwitabiraga bwa mbere aya marushanwa abera muri Kenya.

Rwirangira yaje gushimangira iyi ntsinzi ye yegukana Tusker Project Fame All Stars , irushanwa nk’iri ryahuzaga noneho abahanzi bagiye bitwara neza mu yandi marushanwa ya Tusker yabaye mbere.