Umuririmbyi Patient asanga kwitabira Salax atari uguta agakiza

Umuririmbyi w’indirimbo zihimbaza Imana mu Rwanda Bizimana Patient, avuga ko igihe kigeze ngo abanyamadini bitiranya amarushanwa ya Salax Awards bakwiye gutandukanya inshingano n’imyemerere y’idini n’ibindi bikorwa.

Uyu muhanzi w’umunyeshuri mu ishuri rikuru rya ULK, na we ari mu bahatanira ibihembo bya Salax 2012 mu cyiciro cy’abaririmba indirimbo zihimbaza Imana.

Mu kiganiro yahaye IGIHE, yagize ati “Hari benshi bitiranya Salax Awards no guteshuka ku nshingano zabo mu itorero. Si ko biri kuko Kristo yaziye bose. Rero ntidukwiye kwitiranya ibintu ! Salax Awards n’ubupagani biratandukanye, kimwe mu byo abakirisito bakunze kwibeshyaho. Nta muntu n’umwe usaba kujya muri Salax, kandi nta n’uwiyamamaza cyangwa ngo ajye mu marushanwa yo kuririmba. Ababakurikirana ubwabo ni bo bitorera umuhanzi bitewe n’ibikorwa bye.”

Bizimana yakomeje adutangariza ko ashimira abakomeza gutera inkunga umuziki cyane cyane mu ruhande rw’abaririmba Gospel. Avuga ko uzahabwa iryo shimwe uyu mwaka mu bo bari kumwe mu itsinda, azabyishimira kuko azaba abikwiriye n’ubwo ataba we.

Uretse kwitabira ubutumire mu matorero atandukanye, igihe cye kinini, Bizimana Patient yadutangarije ko agiharira amasomo ye, kuko nayarangiza uyu mwaka ubwo azaba anasoza Album ya kabiri.

Muri Salax Awards za 2010 umuririmbyi Dominic Nick ni we wari wegukanye igihembo cya Salax mu cyiciro cy’umuririmbyi witwaye neza mu baririmbira Imana, ariko mu idini rye rya ADEPR ntibabyakira neza bavuga ko ibi nta muntu uririmbira Imana ukwiye kujya guhatanira ibihembo kandi akora ’umurimo w’Imana’. Byakomeje kuvugwaho cyane kugeza n’ubwo Dominick Nick wari witabiriye aya marushanwa yasabwe gusaba imbabazi.