Abanyamuryango ba FPR bunguranye ibitekerezo ku mico n’imikorere bidakwiye kubarangwamo

Yanditswe na M. M.
Kuya 31 Kanama 2014 saa 11:18
Yasuwe :
0 0

Imyitwarire, imikorere ndetse n’imigenzereze ikwiye kuranga umunyamuryango wa FPR Inkotanyi ni zo ngingo-pfundo z’ibiganiro abagize uyu muryango bagiranye muri biro politiki yateraniye kuri Petit Stade i Remera, kuri iki Cyumweru tariki 31 Kanama.
Iyi nama yari iyobowe n’Umuyobozi Mukuru wa FPR Inkotanyi, Perezida Paul Kagame, yitabiriwe n’amagana y’abanyamuryango bayo b’imena, biganjemo abari mu nzego z’ubuyobozi za Leta ndetse n’abikorera ku giti cyabo; ingingo irebana n’imyitwarire ikwiye ku (...)

Imyitwarire, imikorere ndetse n’imigenzereze ikwiye kuranga umunyamuryango wa FPR Inkotanyi ni zo ngingo-pfundo z’ibiganiro abagize uyu muryango bagiranye muri biro politiki yateraniye kuri Petit Stade i Remera, kuri iki Cyumweru tariki 31 Kanama.

Iyi nama yari iyobowe n’Umuyobozi Mukuru wa FPR Inkotanyi, Perezida Paul Kagame, yitabiriwe n’amagana y’abanyamuryango bayo b’imena, biganjemo abari mu nzego z’ubuyobozi za Leta ndetse n’abikorera ku giti cyabo; ingingo irebana n’imyitwarire ikwiye ku banyamuryango yaganiriweho biratinda.

Ubwirasi, ikinyoma, gutekinika, kwitaka wivuga ibigwi n’myato, ubwirasi, kuba rutemayeze (opportunist), kutagira ibanga, gukwirakwiza ibihuha n’ibindi; ni imwe mu myitwarire idakwiye abanyamuryango ba FPR Inkotanyi bakanguriwe kwamagana bivuye inyuma na Perezida Paul Kagame, kuri iyi ngingo wunganiwe na Tito Rutaremara.

Mu ijambo rye ubwo yatangizaga iyi nama, Perezida Kagame yagarutse ku bayobozi bamwe bafite imwe mu myitwarire nk’iyo idahwitse, agaragaza ko bene abo usanga akenshi barangwa no kugira akarimi keza, ugasanga bavuga ubwabo ko ari ibitangaza.

Umukuru w’Igihugu yagarutse kandi kuri bamwe mu bayobozi usanga bashyira imbere kuba hari ibyo bakoreye igihugu mu bihe byo hambere, ubundi bakitwara nk’aho igihugu kibafitiye ideni. Aba yabasabye gusubiza amerwe mu isaho, agaragaza ko kuba barakoreye igihugu, ntawe ubafitiye ideni ku buryo baza kurimwishyuza.

Yagize ati "Ntidushobora kubaho mu mpitagihe, dukwiye kubaho mu ndagihe, ndetse n’inzagihe, ubutwari bwawe bwo mu gihe cyashize ndashaka kubureba n’ubungubu, wabusize inyuma kubera iki? (...) ntukambwire ibikorwa byawe ntagereranywa byo mu mpitagihe utari no ku mbwira ibikorwa byawe nkabyo mu ndagihe."

Muri iyi minsi ishize hakunze kuvugwa itabwa muri yombi rya bamwe mu basirikare bakuru barimo Col Tom Byabagamba, Brig Gen Frank Rusagara na Capt David Kabuye, aba bose bahoze muri APR yari umutwe w’ingabo w’umuryango FPR Inkotanyi mu gihe cy’urugamba rwo kubohora igihugu, nyuma baza kugira uruhare no muri RDF. Ibyaha bose baregwa birimo kwangisha ubutegetsi abaturage, ndetse no gukwirakwiza ibihuha.

Mu kiganiro umukambwe Tito Rutaremara yatanze yunga mu rya Perezida Kagame, yagarutse birambuye ku ndangagaciro zikwiye kuranga buri munyamuryango wa FPR Inkotanyi akangurira buri wese gukorera mu mucyo, kurangwa n’umuco wo kugira ibanga, kudatinya kwamagana ikibi, ndetse no kunenga mu ruhame abakora amakosa.

Yitandukanyije na murumuna we

Ibi byahaye rugari bamwe mu banyamuryango baboneraho kunenga inshuti n’abavandimwe basanga barataye umurongo, aho kuri ubu basigaye barigabije ibikorwa byo gusiga icyasha igihugu n’abayobozi bacyo. Umwe mu basabye ijambo muri uru rwego ni Depite Edda Mukabagwiza, witandukanije ndetse akanamagana ku mugaragaro murumuna we Odette Mukabakomeza utuye muri Leta Zunze Ubumwe z’Amerika kuri ubu usigaye warayobotse ishyaka ritavuga rumwe n’ubutegetsi RNC, agaragaza ko we n’abo mu muryango we ibikorwa by’umuvandimwe wabo bibakoza isoni, ariko ko babyamaganira kure.

Uku kuvugusha ukuri kwa Depite Mukabagwiza, Perezida Kagame yakumushimiye amubwira ko ari byiza kuvugisha ukuri mu ruhame agaragaza aho ahagaze n’icyo atekereza ku bikorwa by’umuvandimwe we.

Nk’uko umwe mu bari mu nzego z’ubuyobozi za FPR Inkotanyi yabidutangarije, biro politiki y’umuryango FPR Inkotanyi iba ari umwanya nyunguranabitekerezo ku banyamuryango, aho basuzumira hamwe imyitwarire y’abanyamuryango, ku rundi ruhande ariko bakajya inama kuri gahunda ziba zigomba gushyirwa mu bikorwa mu gihe runaka.

Gasamagera Wellars, umwe mu bakomiseri ba FPR Inkotanyi, yafashe umwanya agaragaza bimwe mu bikorwa uyu muryango umazemo iminsi birimo ibigamije guteza imbere urubyiruko, abari n’abategarugori, ndetse n’ibikorwa bigamije kongerera ubumenyi abanyamuryango.

Mu gihe muri iyi minsi hari kuvugwa ikibazo cy’abana bakiri bato basigaye bigabiza manyinya mu tubari nta nkomyi, iki kibazo na cyo kiri mu byagarutsweho muri iyi nama, aho Perezida Kagame yagaragaje ko ababyeyi bo ubwabo bagakwiye kugira uruhare rufatika mu burere bw’abana babo, aho kugirango bibe ngombwa ko polisi ubwo burere ibugiramo uruhare.

Aha yagarukaga ku mikwabo imaze iminsi ikorwa na polisi mu tubari hirya no hino ifata abana baba banywa inzoga ikabatesha ndetse ikanabasubiza ababyeyi babo, ari nako ba nyiri utwo tubari bahanwa.

Iyi nama yamaze amasaha asaga umunani yaranzwe no kuririmba ndetse n’imbyino bikunze kuranga abagize umuryango FPR Inkotanyi, yaba mu bihe bibi kimwe n’ibyiza, aho usanga urubyiruko kugera ku basheshe akanguhe mu bawugize, ntawe uba watanzwe mu kwizihirwa.

Umuyobozi Mukuru w'Umuryango FPR Inkotanyi ubwo yakirwaga n'abandi bayobozi mu nzego zo hejuru z'uyu muryango kuri Petit Stade i Remera
.
..
Mu gihe cyo gucinya akadiho buri wese aba yizihiwe
Abato n'abakuru morale yari yose
Edda Mukabagwiza ubwo yarimo yamaganira kure ibikorwa bya murumuna we Odette Mukabakomeza usigaye warayobotse RNC
Tito Rutaremara ubwo yarimo yibutsa ndetse anasobanurira abanyamuryango imwe mu myitwarire ikwiye kubaranga

.
Amafoto; Urugwiro Village


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza