Abanyarwanda benshi bifuza ko Perezida Kagame yabayobora ubuzima bwe bwose - Mushikiwabo

Yanditswe na Rabbi Malo Umucunguzi
Kuya 29 Ukwakira 2017 saa 07:04
Yasuwe :
1 2

Minisitiri w’Ububanyi n’Amahanga, Ubutwererane n’ibikorwa by’Umuryango wa Afurika y’Uburasirazuba, Louise Mushikiwabo,yavuze ko Abanyarwanda aribo bafite amahitamo ajyanye n’uko bagomba kuyoborwa, ku buryo hari benshi bifuza ko Perezida Kagame yayobora u Rwanda ubuzima bwe bwose.

Ayo mahitamo Mushikiwabo yayagarutseho ubwo yari mu kiganiro ‘Internationales’ gitumirwamo abayobozi batandukanye kuri TV5, cyayobowe n’umuyobozi w’amakuru kuri iyo televiziyo, Françoise Joly, cyitabirwa n’abanyamakuru, Sophie Malibeaux wa RFI na Christophe Ayad wa Le Monde.

Mushikiwabo yavuze ko u Rwanda ari igihugu gifite amateka yihariye arimo na Jenoside yakorewe Abatutsi mu 1994, ku buryo kitagendera kuri politiki imenyerewe ahandi ahubwo rugendera kuri politiki ijyanye n’imibereho y’igihugu.

Yavuze ko nyuma ya Jenoside igihugu cyari gifite amahitamo abiri gusa, kwiyubaka abaturage bakaguma ari igihugu kimwe cyangwa kuzimira burundu, ruhitamo iya mbere.

Muri icyo kiganiro, Minisitiri Mushikiwabo yabajijwe kuri Perezida Kagame uheruka gutorerwa kuyobora u Rwanda muri manda ya gatatu n’amajwi 98%, niba atekereza ku muntu uzamusimbura cyangwa niba azaba Perezida w’u Rwanda ubuzima bwe bwose.

Mushikiwabo yagize ati “Abanyarwanda benshi bifuza ko Perezida Kagame yaba Perezida ubuzima bwe bwose. Ni umugabo wakoreye byinshi iki gihugu, ni umuyobozi ufite ubushobozi budasanzwe, yageze mu gihugu kiri mu bihe bikomeye by’amateka cyanyuzemo, yakoze ibintu bikomeye ari nayo mpamvu Abanyarwanda benshi bishimiye ibyo Perezida Kagame akora.”

Yashimangiye ko Abanyarwanda aribo basabye ko Perezida Kagame yakomeza kubayobora babinyujije mu busabe bashyikirije Inteko Ishinga Amategeko, kugeza ubwo hanakorwaga referendumu.

Ku bijyanye no guhererekanya ubutegetsi, Mushikiwabo yavuze ko hari itandukaniro riri hagati y’ibyo Abanyarwanda bashaka n’ibyo abatari bo bifuza.

Ati “Twe mu buryo twumva ibintu, ibyemezo by’ihererekanya ry’ubutegetsi ni icyemezo gifatwa n’Abanyarwanda batora. Birumvikana ko hari abantu, ibihugu, abatavuga rumwe n’ubutegetsi baba hanze cyangwa imbere mu gihugu batabyumva gutyo. Gusa ibikorwa binyuze mu itora nicyo cyemezo cy’Abanyarwanda.”

Minisitiri Mushikiwabo yanagarutse ku mubano w’u Rwanda n’u Bufaransa ukomeje kuzamba nyuma y’uko u Rwanda ruheruka gufata umwanzuro wo guhamagaza Ambasaderi warwo mu Bufaransa, Jacques Kabale, bikiyongeraho ko u Bufaransa bumaze imyaka isaga ibiri nta wabwo bufite mu Rwanda.

Mushikiwabo yavuze ko u Bufaransa bumaze imyaka 23 bugerageza gusibanganya ibimenyetso by’uruhare rwabwo muri Jenoside, bufasha ubuyobozi bwayiteguye.

Yavuze ko u Rwanda rwakoze ibishoboka ngo umubano ube mwiza ariko u Bufaransa ntibukore butyo, kereka ku bwa Perezida Nicolas Sarkozy, ariko nabwo ngo abafaransa bagaragaje ko batiteguye gusaba imbabazi z’ibyo bakoze.

Yavuze ko u Bufaransa bukwiye kwemera uruhare bwagize muri Jenoside yakorewe Abatutsi kugira ngo umubano w’impande zombi wongere kuba muzima, kuko ntaho buzahungira uruhare bwagize.

Minisitiri w’Ububanyi n’Amahanga, Ubutwererane n’ibikorwa by’Umuryango wa Afurika y’Uburasirazuba yanashimangiye ko muri uwo mubano uteye gutyo, u Rwanda rubona ubutabera bw’u Bufaransa nta kwigenga. Ibyo abivuga mu gihe urukiko rwo mu BUfaransa rumaze iminsi rutangiye kumva uwitwa umutangabuhamya ku ihanurwa ry’indege ya Habyarimana, rugashaka ko Minisitiri w’Ingabo w’u Rwanda nawe yazarwitaba akisobanura kuri ubwo buhamya bushinja izari ingabo za FPR Inkotanyi.

Minisitiri Mushikiwabo mu kiganiro n’abanyamakuru Françoise Joly wa TV5, Sophie Malibeaux wa RFI na Christophe Ayad wa Le Monde

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza