Muri gahunda ya FPR Inkotanyi yo gushaka abakandida bajya ku rutonde rw’abazagenda ku itike yayo, mu karere ka Gasabo hatowe Mutimura Zeno, Bamporiki Eduard, Murumunawabo Cecile na Mukabutera Cecile.

Mu matora yitabiriwe n’abanyamuryango ba FPR basaga 1,000 muri Gasabo, kuri iki Cyumweru tariki ya 14 Nyakanga, abakandida 18 bitoje, Mutimura Zeno yagize amajwi 359, Bamporiki Eduard agira 320, Murumunawabo Cecile abona 416 naho Mukabutera Cecile agira 134.

Abo bane bahise bajya ku rutonde rw’abakandida ba FPR bazatorwamo abinjira mu nteko Ishinga amategeko bitewe n’amajwi izagira mu matora yo muri Nzeri ihanganye n’andi mashyaka kimwe n’abazaba biyamamaje ku giti cyabo.

Mbere y’uko aya matora atangira buri wese yabanje kwivuga imyato ku byo yakoze, ibyo ateganya gukora ndetse n’amashuri afite. Banwe bati tuzihatira gutora amategeko afitiye abaturage akamaro n’ibindi bitandukanye.

Amatora yatangiye buri munyamuryango wari ugize inteko itora ahabwa urupapuro rw’itora yasoza akarushyira mu nkangara yabugenewe haje gukurikiraho kubarura amajwi imbere y’imbaga yari yaje gutora.

Ndizeye Will, Chairman wa FPR Inkotanyi mu karere ka Gasabo, yavuze ko amatora yabanje gutegurwa neza ari nayo mpamvu akozwe mu mucyo nta bibazo bibayeho, ati “ Twifurije abazahagararira umuryango wa FPR Inkotanyi kuzatsinda amatora azakurikira.”

Amatora y’abadepite ateganijwe muri Nzeri uyu mwaka, hazatorwa abadepite 80, harimo 53 bahagarariye imitwe ya politike yemewe mu Rwanda, 24 bahagarariye abagore, na 2 bahagarariye urubyiruko n’umwe uhagarariye abafite ubumuga.

Usibye mu karere ka Gasabo no hirya no hino mu tundi turere amatora yagiye ahabera nubwo tutaramenya abagiye bahatsinda.

Abatsinze kuzahagararira FPR: Duhereye ibumoso Mutimura, Mukabutera, Murumunawabo na Bamporiki

Abanyamuryango ba FPR Inkotanyi mu karere ka Gasabo bari baje gutora abazabahagararira mu matora y'abadepite muri Nzeri

Aha bari batangiye kubarura amajwi