Gusaba imbabazi kw’Abahutu ku Batutsi byunguranweho ibitekerezo mu nama ya FPR

Yanditswe na Mathias Hitimana
Kuya 15 Nyakanga 2013 saa 12:44
Yasuwe :
0 0

Nyuma ya byinshi bimaze iminsi bivugwa ku bijyanye n’ubumwe n’ubwiyunge, cyane Abahutu gusaba imbabazi Abatutsi ku cyaha cya Jenoside yabakorewe, aho abatavuga rumwe na Leta y’u Rwanda bakomeje kuvuga ko Perezida Kagame ahatira Abahutu bose gusaba imbabazi abatutsi, nyirubwite yagize icyo abivugaho mu nama yaguye y’Umuryango FPR Inkotanyi yabaye kuwa Gatandatu ushize.
Mu ijambo yagejeje ku bari bitabiriye iyo nama, Perezida Kagame akaba n’Umuyobozi wa FPR Inkotanyi yavuze ko ntawe yigeze (...)

Nyuma ya byinshi bimaze iminsi bivugwa ku bijyanye n’ubumwe n’ubwiyunge, cyane Abahutu gusaba imbabazi Abatutsi ku cyaha cya Jenoside yabakorewe, aho abatavuga rumwe na Leta y’u Rwanda bakomeje kuvuga ko Perezida Kagame ahatira Abahutu bose gusaba imbabazi abatutsi, nyirubwite yagize icyo abivugaho mu nama yaguye y’Umuryango FPR Inkotanyi yabaye kuwa Gatandatu ushize.

Mu ijambo yagejeje ku bari bitabiriye iyo nama, Perezida Kagame akaba n’Umuyobozi wa FPR Inkotanyi yavuze ko ntawe yigeze ahatira gusaba imbabazi ariko ko nta n’ikibazo abona umuntu asabye imbabazi mu izina ry’umubyeyi we, mukuru we cyangwa undi wese bagira icyo bapfana wakoze icyaha kandi nawe ubwe kikamwitirirwa.

Yabisobanuye agira ati ‘‘Jye natumiwe mu gusoza igikorwa cyateguwe n’urubyiruko ubwarwo rushaka kuvugisha ukuri ku bijyanye n’ubumwe n’ubwiyunge, nahageze ku gicamunsi ndetse nsanga byinshi byavuzwe ariko nsanga koko abantu barimo basasa inzobe bakavuga uko ibintu byagenze, byumvikane neza ko ntawe nabihatiye. Ariko rero, sinumva n’impamvu umuntu yagira ikibazo cyo gusaba imbabazi ku cyaha cyakozwe n’umubyeyi cyangwa umuvandimwe we niba koko dushaka ubwiyunge nyabwo.’’

Perezida Kagame yashimye cyane urubyiruko rumaze gutera intambwe igana ku bwiyunge nyabwo kurusha bakuru babo, ahanini agendeye ku kuba iki gikorwa cyo gusaba imbabazi kw’Abahutu bazisaba Abatutsi cyaraturutse ku rubyiruko ndetse kikagirwamo uruhare runini n’urubyiruko mu kugishyira mu bikorwa.

Yagize ati “Abana bato, abakobwa n’abahungu, n’urubyiruko muri rusange, ruraturuta. Abantu bakuru, guhera ku myaka 40 kuzamura, mwe mufite ikibazo, aba bana bato icyo twakora ni ukubatera inkunga bakabasha kwirera neza, naho mwe musa n’abananiwe.”

Ku bijyanye no gusaba imbabazi kw’Abahutu ku Batutsi, Perezida Kagame yagize ati “Kuba utararwanyije ibitekerezo by’ubwicanyi, icyo cyonyine uba ukwiye kugisabira imbabazi. Uwacecetse gusa nawe akwiye gusaba imbabazi, usaba imbabazi si uwatemye abantu gusa.”

Umukuru w’Igihugu byageze aho abaza ikibazo abari bitabiriye iyi nama ati “Iyo turi hano twubaka ubwiyunge, iyo dusaba abarokotse Jenoside gutanga imbabazi kugira ngo tubashe kugera ku bumwe, tubashe kongera kubaka igihugu, abandi tubasaba iki?”

N’Ababiligi basabye imbabazi Abanyarwanda ku mugaragaro

Mu gutanga urugero rugaragaza ko bisanzwe gusaba imbabazi ku cyaha cyakozwe n’undi mu izina ryawe, Perezida Kagame yagarutse ku mbabazi Ababiligi basabye Abanyarwanda ubwo Minisitiri w’Intebe w’icyo gihugu, Guy Verhofstadt, mu mwaka wa 2000 [Hibukwa ku nshuro ya 6 Jenoside yakorewe Abatutsi] yagiriraga uruzinduko mu Rwanda, yaboneyeho asaba imbabazi Abanyarwanda mu izina ry’Ababiligi bose, ku ruhare igihugu cye cyagize muri Jenoside yakorewe Abatutsi.

Aha Perezida Kagame yasobanuye ko Ababiligi bagize uruhare muri Jenoside cyangwa se mu bikorwa byayiganishagaho ari mbarwa, ariko ko mu gusaba imbabazi, zasabwe mu izina ry’Ababiligi bose. Aha niho yahereye agira ati “Warakoresheje izina ryanjye ugakora icyaha, nagisabira imbabazi, ikibazo kirimo kiri he? Ntabwo bivuze ko njye nagikoze.”

Kudatabara umuntu uri mu kaga ni icyaha gihanwa

Minisitiri w’Intebe Dr Pierre Damien Habumuremyi, nawe uheruka gusaba imbabazi mu izina ry’Abahutu bene wabo, ku byaha bya Jenoside bakoreye Abatutsi, muri iyi nama nawe yunze mu rya Perezida Kagame avuga ko kudatabara umuntu uri mu kaga ari icyaha ubusanzwe gihanwa n’amategeko, icyaha bita mu gifaransa “Non assistance aux personnes en danger”, bityo ashimangira ko kuba harabayeho kurebera abaturanyi bawe b’Abatutsi bari kwicwa ntubyamagane, icyo gihe ari ngombwa ko usaba imbabazi.

Minisitiri w’Intebe Habumuremyi yagize ati “Ku misozi yose byaragaragaye Abahutu biruka ku Batutsi bashaka kubica. Utaragize ubutwari avuge ngo reka nkize umuntu ugiye kwica undi, icyo cyaha utacyemera sinzi uko yaba ameze.”

Yakomeje agira ati “Ntabwo ari ugutema gusa ngo ufate umuhoro wice umuntu, no kudakiza umuntu urimo wicwa kandi wowe nta kibazo ufite ndizera ko nacyo ari ikibazo.

Aha Minisitiri w’Intebe yakomeje asobanura ko Abatutsi batishwe kuko ari abanyamahanga cyangwa abavantara, ati "Bishwe kuko ari Abatutsi, ababishe nabo si abanyamahanga ni Abanyarwanda b’Abahutu."

Minisitiri w'Intebe, Dr Pierre Damien Habumuremyi mu nama yaguye ya RPF

Inzigo

Kuva cyera, nk’uko Minisitiri w’Intebe Habumurenyi yakomeje abisobanura, iyo umuntu yicaga umuntu wo mu wundi muryango, yabaga inzigo, bityo kugira ngo iveho hakaba hari icyakorwaga.

Habumuremyi yasabye ko abantu bareka « gusigiriza », bityo igikorwa cyo gusaba imbabazi kigategurwa neza. Ibi kandi yabihuriyeho na benshi mu bagiye bafata ijambo, biganjemo Abahutu n’Abahutukazi, mu bari bitabiriye iyi nama yaguye y’Umuryango FPR Inkotanyi.

Depite Mukayisenga Francoise yafashe ijambo avuga ko ibyo Minisitiri w’Intebe yarimo avugaho byerekeye gusaba imbabazi, we na bagenzi be babitekereje hambere aha ariko bakabura aho bahera ngo babishyire mu bikorwa.

Mukayisenga yagize ati "Icyo ngira ngo mvuge ni uko Abatutsi mwaduhaye imbabazi ntazo dusabye. Kugeza uyu munsi wa none gutekereza tugihunguka muri za 1998 igihe twazaga turi igihiriri, ku giti cyanjye numvaga ku gahanga kanjye hariho ‘etiquette’ (ikirango) y’ubuhutu, kandi nkumva ko ari umuhutu w’umwicanyi."

Ati “Iteka numvaga nta n’agaciro dukwiye kugira muri kino gihugu kubera ibyakozwe mu izina ry’Abahutu (…) Abatutsi bari muri kino gihugu umutima bagira ntako usa, kuko iyo bashaka kwihorera twajyaga gupfa.”

Ku kijyanye n’abahakana ko Jenoside yakorewe Abatutsi, Depite Mukayisenga yagize ati “Iyo utekereje ukuntu bavuga ngo Jenoside yakorerwaga Abanyarwanda, ugatekereza ukuntu twanyuraga kuri bariyeri Abatutsi bakahasigara, Abahutu rero nimutuze dukorere igihugu, twamagane ko ibi byongera kubaho, twamagane abashaka kongera kudushyira mu macakubiri.”

Ku birebana n’amacakubiri, muri iyi nama benshi bakomeje gutunga agatoki abanyapolitiki bo mu mashyaka atavuga rumwe na FPR Inkotanyi barimo Gasana Anastase wigeze kuba Minisitiri w’Ububanyi n’Amahanga na Gen BEM Habyarimana Emmanuel wigeze kuba Minisitiri w’Ingabo, bombi babarizwa mu buhungiro, mu gitondo cyo kuwa Gatandatu ushize bakaba bari bumvikanye mu kiganiro “Imvo n’Imvano” kuri BBC Gahuza Miryango bahanganye mu bitekerezo n’Umuyobozi wa Art for Peace, Edouard Bamporiki, afatanyije n’Umuyobozi Mukuru w’Itorero ry’Igihugu, Rucagu Boniface, muri iyi nama benshi bakaba baragarutse kuri babiri ba mbere bagaragaza ko "bigize abavugizi b’Abahutu" aho kuvugira Abanyarwanda, bityo bakababonamo umugambi wo gushaka kongera gushora Abanyarwanda mu icuraburindi.

Mushiki wa Gasana Anastase yasabye abanyamuryango ba FPR Imbabazi

Umuyobozi w’Akarere ka Nyarugenge, Mukasonga Solange, ni mushiki wa Gasana Anastase bonse rimwe, gusa mu bitekerezo n’imyumvire baratandukanye cyane nk’uko yabigaragaje. Ubwo yafataga ijambo muri iyi nama yaguye y’Umuryango FPR Inkotanyi, Madamu Mukasonga yasabye imbabazi ku bikorwa yise « iby’ubugambanyi ku gihugu » biri gukorwa na musaza we Anastase Gasana.

Yagize ati “Ndasaba imbabazi nyinshi kubera ibyo musaza wanjye ari gukora kandi akabikora mu izina ry’umuryango we, agakora ibibi, asebya igihugu, ni umwanzi w’igihugu, nsabye imbabazi Nyakubahwa Perezida wa Repubulika.”

Mukasonga yasobanuye ko musaza we Gasana ari we mfura y’iwabo naho we akaba umuhererezi, aha Perezida Kagame yahise abwira Mukasonga ati “ Umurusha ubwenge ibyari byo byose”, n’undi nawe amusubiza agira ati “Murusha ubwenge kuko nkunda igihugu cyanjye nivuye inyuma, kuko we aho ageze ni umwanzi wacyo.”

Yakomeje asobanura ukuntu atumva uburyo umuntu wabaye Minisitiri igihe kitari gito muri Leta y’Ubumwe ahinduka akigira umuvugizi w’Abahutu. Mukasonga yagize ati "Abana be bitwa iki ko umugore we ari umututsikazi ? Kwa sebukwe Jenoside yarabamaze, ariko iyo avuga ngo aravugira Abahutu wibaza umuhutu avugira niba ari nde, niba ari inda avugira nagira ngo mbabwire ko twebwe umuryango we tutamushyigikiye, kandi ni ikimwaro kuri twe.”

Icyo uwacitse ku icumu avuga ku mbabazi zisabwa n’Abahutu

Ntazinda Erasme, ni uwacitse ku icumu rya Jenoside yakorewe Abatutsi nawe wari witabiriye iyi nama yaguye y’Umuryango FPR Inkotanyi, ubwo yafata ijambo, yasobanuye ko kuri we ubusanzwe ubwiyunge bwari inzozi, ariko ko muri iyi nama akimara kumva neza iby’iki gikorwa cyo gusaba imbabazi kw’Abahutu ku byaha byakozwe ku Batutsi mu izina ry’Abahutu, yumvise abohotse, bityo avuga ko we kimwe n’abandi bacitse ku icumu imbabazi bazazibaha kuko n’ubundi ngo bazimaranye imyaka igera kuri 19. Yagize ati “Umunsi iki gikorwa kizayoborwa, imbabazi rwose twizeye kuzitanga.”

Umuyobozi w’Akarere ka Nyarugenge, Mukasonga Solange anenga imyitwarire ya musaza we Anasthase Gasana ko asabye igihugu
Rucagu Boniface atanga igitekerezo
Perezida Kagame ubwo yarimo ageza ijambo ku bitabiriye inama yaguye ya FPR Inkotanyi
Abanyamuryango ba RPF
Depite Gatabazi Jean Marie Vianney ubwo yarimo abwira abacyeka ko Abahutu bari muri Leta ari udukingirizo ukuntu atanga ibitekerezo mu buyobozi kandi bigashyirwa mu bikorwa nta shiti

Amafoto: Urugwiro Village


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza