Abakuru b’ibihugu byo mu Karere bafashe imyanzuro yo gukemura ikibazo cya Congo

Nyuma y’inama idasanzwe y’iminsi ibiri yahuzaga Abakuru b’ibihugu bigize Inama Mpuzamahanga y’Akarere k’Ibyaga bigari(ICGLR), hafashwe imyanzuro itandukanye igamije guhagarika imirwano mu Burasirazuba bwa Congo, kugarura umutekano no gutabara abasizwe iheruheru nayo.

Nyuma yo kugendera ku byemezo byafatiwe mu nama yabereye Addis Abbeba ku itariki 15 Nyakanga ; Inama yahuje Abaminisiti b’ingabo ku kibazo ya Congo yabereye i Khartoum ku itariki 1 Kanama ; iy’Abaminisitiri b’ububanyi n’amahanga yasojwe kuwa Mbere tariki 6 Kanama n’izindi nyinshi zitandunye zigaga kuri iki kibazo cya Congo, Abakuru b’ibihugu bigize Inama Mpuzamahanga y’Akarere k’Ibiyaga bigari bafashe imyanzuro ikurikira :

1. Gukoresha imbaraga zikenewe mu rwego rwo gukumira intambara ibera mu burasirazuba bwa Kongo, birimo no guhana ababangamira inzira y’amahoro bahanwa.

2. Gushyigikira ibikorwa bya Leta ya Kongo bigamije kugarura amahoro n’umutekano mu burasirazuba bwa Kongo, by’umwihariko intara ya Kivu y’amajyaruguru

3. Gushyiraho itsinda rigizwe n’Abaminisitiri b’ingabo baturuka muri ibi bihugu bikurikira : Repubulika ya Angola, Repubulika y’u Burundi, Repubulika iharanira demukarasi ya Kongo, Repubulika y’u Rwanda, Repubulika ya Uganda na Repubulika ya Tanzania.

Iri tsinda ryahawe inshingano zikurikira :

 Rihawe inshingano zo gutanga ingamba z’ibikwiye gukorwa kugira ngo intambara ihite ihagararara ngo hagaruke amahoro n’umutekano

-Rihawe inshingano zo gutanga ibindi byose bikenewe kugira ngo umutwe w’ingabo mpuzamahanga ubashe gukora.

 Iri tsinda ry’Abaminisitiri b’ingabo riyobowe na Minisitiri w’Ingabo wa Uganda.

 Umukuru w’inama y’abaminisitiri ihuza abahuriye kunama mpuzamahanga y’ibihugu byo mu biyaga bigari igomba gushyigikira akanama gahuza abaminisitiri ijyanye n’imibanire y’ibihugu

4. Akanama k’abaminisitiri kagomba gutanga raporo yabo k’umukuru w’inama mpuzamahanga y’ibihugu byo mu biyaga bigari mu gihe cy’ibyumweru bibiri, naho raporo ya nyuma ikazagezwa ku nama y’Abakuru b’ibihugu na za Guverinoma mu byumweru bine.

5. Gusaba umukuru w’inama mpuzamahanga y’ibihugu byo mu karere k’ibiyaga bigari gukomeza imikoranire harimo kongera gukoresha intumwa zidasanzwe mu kugarura amahoro mu burasirazuba bwa Kongo.

6. Gushyiraho ikigega gifasha abagizweho ingaruka n’intambara iri mu burasirazuba bwa Kongo banasaba ibihugu bigize ihuriro n’abafatanyabikorwa gutanga inkunga, Bashimiye Leta ya Uganda yabashije gushyiramo miliyoni imwe y’amadorali muri icyo kigega.

7. Gusaba umuryango mpuzamahanga gufasha abagizweho ingaruka n’intambara ibera mu burasirazuba bwa Kongo kandi ko uburyo bwo kugeza imfashanyo ku bayikeneye butagomba kubangamirwa.

8. Bashimiye Leta n’abaturage ba Uganda uko bakiriye ndetse no gutegura iyi nama idasanzwe y’Abakuru b’ibihugu.

Iyi nama idasanzwe ihuza abakuru b’ibihugu bigize Inama Mpuzamahanga y’Akarere k’ibiyaga bigari, yateranye hagamijwe gushakira hamwe umuti ku ntambara iri hagati y’umutwe wa M23 n’ingabo za Congo, ikomeje gukura ibihumbi by’abaturage mu byabo, aho benshi bari guhungira mu bihugu by’ibituranyi nk’u Rwanda na Uganda.