IGIHE.com > Politiki > Amakuru
Perezida Kagame yitabiriye inama ya 20 y’Abakuru b’Ibihugu bya Afurika Yunze Ubumwe

Perezida Kagame yitabiriye inama ya 20 y’Abakuru b’Ibihugu bya Afurika Yunze Ubumwe


Yanditswe kuya 28-01-2013 - Saa 07:54' na ORINFOR

Perezida wa Repubulika y’u Rwanda Paul Kagame na Madamu we Jeannette Kagame, kuri iki cyumweru tariki ya 27 Mutarama 2013 bitabiriye Inama ya 20 y’Abakuru b’Ibihugu na Guverinoma bigize Umuryango wa Afurika Yunze Ubumwe iri kubera i Addis Abeba muri Ethiopia.

Mu butumwa bwatanzwe iyi nama itangira, ibihugu bya Afurika byahamagariwe kugira ubumwe nk’ubwaranze ibihugu byo kuri uyu mugabane mu myaka 50 ishize, ubwo byishyiraga hamwe bishaka ubwigenge.

Madamu we Jeannette Kagame yitabiriye umuhango wo gufungura iyi nama y’iminsi ibiri ari kumwe n’abandi badamu b’abakuru b’ibihugu bari kumwe mu ihuriro riharanira kurwanya icyorezo cya SIDA organization of African Leaders Against HIV/AIDS, iri huriro rikaba ryizihiza imyaka 10 rishinzwe.

Madamu Jeanette Kagame mu nama y'ihuriro ryiyemeje kurandura Virusi itera SIDA

Inama y’Abakuru b’Ibihugu yo ibaye mu gihe umuryango wa Afurika wizihiza isabukuru y’imyaka 50 icyari Umuryango w’Ubumwe bwa Afurika gitangijwe, ari na cyo cyahindutse Afurika Yunze Ubumwe.

Mu ijambo yavuze mu muhango wo gutangiza iyi nama, Madamu Nkosazana Dlamini Zuma yasabye ko ibihugu bya Afurika bikwiye kurushaho kubaka ubumwe bwatumye hanabaho uyu muryango, ati “Mu myaka 50 ishize icyari kiraje inshinga ibihugu bya Afurika ni ukubona ubwigenge no kurandura ivanguramoko rya ’Apartheid’. Muri ibyo bihe umugabane wose washyize hamwe habaho kwitanga no gutanga ibyo igihugu gifite bashyigikira urugamba rwo kwigobotora ubukoloni. Biteguwe n’Umuryango w’Ubumwe bwa Afurika, Afurika yashyize hamwe abantu barebera hamwe icyakorwa kandi bakavuga n’ijwi rimwe.“

Umuryango w’Ubumwe bwa Afurika watangijwe mu mwaka w’1963 hasinywa amasezerano awushyiraho mu nama yabereye i Adis Abeba muri Ethiopia, ari na ho hateranira Inama y’Abakuru b’’Ibihugu na Guverinoma mu Muryango wa Afurika Yunze Ubumwe iba kabiri mu mwaka.

Mu nama y’uyu mwaka hafashwe umunota wo kwibuka uwari Minisitiri w’Intebe wa Ethiopia Meles Zenawi hamwe n’uwari Perezida wa Ghana John Atta Mills bapfuye mu mwaka ushize wa 2012.

Umunyamabanga mukuru wa Loni Ban Ki-moon na we witabiriye iyi nama yavuze ko kuba aba bari bayobozi barasimbuwe ku butegetsi mu mahoro bifite icyo bivuze gikomeye. Yagize ati “Tumaze gufata umunota wo kuzirikana nyakwigendera Meles Zenawi wari Minisitiri w’Intebe wa Ethiopia, na John Atta Mills wari Perezida wa Ghana. Barigendeye hajyaho abandi bayobozi mu mahoro, byerekana ko amahame ya Demokarasi arushaho gushinga imizi ku mugabane wa Afurika wose.“

Bamwe mu bitabiriye Inama ya 20 ya Afurika Yunze Ubumwe

Muri iyi nama habayeho guhererekanya ubuyobozi, Minisitiri w’Intebe wa Ethiopia Haile Mariam Desalegn akaba ari we wabaye umuyobozi mushya wa Afurika Yunze Ubumwe asimbuye Perezida wa Benin Yayi Boni nk’uko biteganywa n’amategeko.

Photo/Internet

TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!

IBITEKEREZO